RSS訂閱 牛年農曆大年初一係新曆２月１２號，仲有唔使一個月就有到啦，大家係咪好期待呢，雖則咁代表唔少爸爸媽媽同長輩荷包大出血……話時話，因為農曆新年臨近同經濟復甦概念，魚缸體品同食品等消費品股都炒起咗；而一啲電影股，例如ＩＭＡＸ中國（０１９７０）同阿里影業（０１０６０）股價反而無乜起息。有分析話，雖然新年檔期對電影行業嚟講係有好大利潤空間，但神州政府冇放寬戲院入座率限制，加上神州疫情死灰復燃，政府提倡「就地過年」（啫係叫啲人唔好穿州過省返鄉下），一啲規模較細嘅影城可能要繼續蝕錢呀。
農曆新年預計神州有７部戲上映，包括上年緊急取消上畫嘅《唐人街探案３》同《熊出沒：狂野大陸》，以及《你好，李煥英》、《刺殺小說家》等等。一位票房數據平台嘅分析師話，陣容可以話係強強競爭，導演、演員、劇本、製片都係業內頂尖，如果疫情可以再好返啲，《唐人街探案３》同《你好，李煥英》票房都有機會衝擊歷史紀錄。
但係暫時業內嘅預估係，低風險地區嘅戲院可以照常營業，仍然要受限於７５巴仙嘅入座率限制，爆谷、飲品等非票房收入都肯定會減少。另一方面，好多四五線城市嘅戲院都有「春節開張吃一年」嘅特徽，如果因為疫情冇咗一連兩個生意黃金期，佢哋好有可能會被兼併重組呀。
咁辛苦先挨過２０２０年，估唔到２０２１年都係烏雲蓋頂，希望快啲守得雲開見月明啦。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
