RSS訂閱 只要有人嘅地方就有人交易，只要有交易就會有人炒賣，香港人最叻就係炒嘢啦！炒股炒金都未夠，過往炒公仔、炒郵票、炒演唱會飛，總之有錢搵就自然有鑊氣。不過盈盈最近聽聞，由於市場近期資金寬鬆，所以近年來資金開始流入消費品，其中威士忌更曾掀起炒風。
盈盈我就少飲酒，不過都知道威士忌有兩個地方最出名，一個就係蘇格蘭，一個就係日本，而日本又因為「匠人精神」關係，酒嘅品質相當之高，所以受到酒客歡迎；而２０１８年開始，「響」呢個牌子嘅１７年系列威士忌突然宣布停產，連帶一系列日本威士忌價格炒高。近年來都好多人開始炒威士忌，好似三得利控股嘅「山崎５５年」，喺去年８月嘅香港拍賣會上，以８５００萬日圓（約６５０萬港紙）成交，成為一時熱話。
威士忌嘅價值，在於生產時間長，所以市場稀少性高，特別係５年或１０年期熟成嘅威士忌，價格只會有升無跌；而有啲酒廠有屬於自己啲酒桶，部分酒桶可能有過百年歷史，陳釀出嚟會有特別嘅味道，例如果香、煤味等，咁又可以賣貴多啲。
至於日本威士忌炒高，純粹係供應問題，因為日本目前得１０間威士忌蒸餾所，而蘇格蘭就有１２０間，所以日本產嘅威士忌根本供不應求。但如果真係想炒，又應該點入手呢？高人教路，可以搵返日本近年已經停產嘅酒，因為投資價值比較高；而高年份嘅日本威士忌又比高年份嘅蘇格蘭威士忌有更好價值。
仲有一點，威士忌收藏價值係唔會暴升，而係慢慢咁升值，所以太過心急嘅，不如都係去返炒股炒金算啦。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
WoW WoW星期三：健康網購產品低至$99 (只限今天)► 立即行動
