RSS訂閱 《笑傲缸湖》「私家的士」Ｕｂｅｒ最近問題多多，ＣＥＯ卡蘭尼克（Ｔｒａｖｉｓ
Ｋａｌａｎｉｃｋ）星期二就俾投資者要求讓位，話要揾個更有能有嘅人令Ｕｂｅｒ重振聲威。
雖然Ｕｂｅｒ最近表現的確令人失望，但令到Ｕｂｅｒ由一間寂寂無名嘅細公司，去到今時今日
喺世界各地都可以見到佢嘅足跡，無功都有勞，投資者一見到公司遇到難題就趕走呢位創世
ＣＥＯ，難免令人覺得有啲忘恩負義，噚日（２２日）一班Ｕｂｅｒ員工都為卡蘭尼克發聲呀！
原來卡蘭尼克喺Ｕｂｅｒ有個粉絲會，佢地知道佢唔再做ＣＥＯ後，即刻Ｓｅｎｄ請願信要
求佢繼續帶領公司。有員工話卡蘭尼克係佢認識最能鼓舞人心嘅人，更有人話唔相信公司會揾到
一個有好似佢咁有視野同熱誠嘅人。咁多位打工仔都應該明白，遇到一位好上司係幾咁難能可貴
嘅事，有員工話曾經同卡蘭尼克講覺得要改善下公司內部風氣，雖然佢聽到之後有啲ｓａｄ，不
過都仍然用心耹聽佢地嘅意見。盈盈唔知佢真人係點，不過可以肯定嘅係下任ＣＥＯ上任嘅第一
個難關，就係要諗下點得民心，令呢班忠實粉絲信服。
有傳Ｆａｃｅｂｏｏｋ營運總監桑德伯格（Ｓｈｅｒｙｌ Ｓａｎｄｂｅｒｇ）同前迪士尼
營運總監Ｔｏｍ Ｓｔａｇｇｓ都喺考慮中嘅人選，不過亦都有人推薦花旗國前總統奧巴馬，話
雖然要令Ｕｂｅｒ逆轉唔喺咁易，但連花旗國總統呢份咁具挑戰性嘅工佢都做得有板有眼，相信
奧巴馬會令奇蹟發生咁話！奧巴馬得民心的確有一手，或者Ｕｂｅｒ一班話事人可以認真考慮下
網民嘅建議！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
