RSS訂閱 《笑傲缸湖》噚晚（１０日）花旗國、歐洲魚缸齊齊急挫，香江呢邊亦連續兩日直插冇水花
，月頭辛辛苦苦儲落嘅升幅一下子就消失晒，唔少缸友都叫苦連天。呢次環球小股災罪魁禍首之
唔係「侵侵」同「肥仔金」，一個話要畀金仔試吓「烈燄與怒火」，一個話會計劃射導彈炸關島
，兩個狂人大打口水戰各不相讓隨時擦槍走火，卻可憐無辜嘅星斗市民。
莫講話小股民被搞到損手爛腳，一眾富商都未能幸免。據有心人統計，星期四西洋魚缸大跌
，足足令全球頭５００大富豪身家合共蒸發４２７億美金，即約３３３１億港銀！當中最慘痛嘅
係亞馬遜揸ｆｉｔ人貝索斯，足足唔見咗２０億美金，富豪排名因而跌一級落到第３位。
Ｆａｃｅｂｏｏｋ教主朱仔亦唔好得去邊，單日損失１６億美金。
不過，似乎「侵侵」仲未識收口，啱啱同泡菜北國對罵完，轉頭又跟戰鬥民族俄國開火。事
源花旗國之前向俄國實施新制裁，戰鬥民族總統普京即刻驅逐７５５名花旗國外交官報復，但「
侵侵」竟然多謝對方，話「我原本仲煩緊人工問題，依家可以慳返唔少錢」！言下之意，即係唔
理呢批外交官從此失業？
「侵侵」上任唔夠１年，已經四處點火，難為一班下屬要為佢補鑊。若然佢仲唔改改「小學
雞」、口不擇言嘅性格，嚟緊３年多恐怕會有更多人受累。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
