RSS訂閱 《笑傲缸湖》講起瑞士呢個歐洲小國，盈盈除咗諗起手錶、軍刀同朱古力出名之外，就諗起
好食到冇朋友嘅芝士火鍋。不過，瑞士將會喺嚟緊嘅２１號，即係下個禮拜一，喺當地嘅超級市
場就可以買到「昆蟲漢堡」。
老老竇竇，歐洲有國家食蟲都係第一次聽，有食蟲習慣嘅都喺一啲亞洲同非洲國家，而盈盈
都曾經喺東南亞打過唔少「大佬」，好似喺一條生區區嘅椰子蟲同炸蟋蟀都擺過落口，所以盈盈
收到風話瑞士會推出「昆蟲漢堡」，都有啲心動想去試試。
瑞士今次咁有「吉士」喺歐洲打響頭炮推出「昆蟲漢堡」，原來都係為咗拯救地球，所以意
義都非常重大架，原因係養牛養羊會釋放唔少溫室氣體，而且仲會污染水源。另外，唔少昆蟲仲
有好豐富嘅蛋白質同礦物質，營養價值相當高，又唔怪得聯合國早喺２０１３年已經叫人食多啲
昆蟲啦。
西方人接受昆蟲嘅程度一向都比較低，更唔好講要成隻好完整咁吞落吐，而呢款「昆蟲漢堡
」嘅設計都算「貼心」，消費者暫時唔會原汁原味品嘗到成隻昆蟲，而係喺配料入面添加昆蟲肉
嘅成份，當中主要來自蟋蟀、草蜢同黃粉蟲，所以佢嘅外觀係同一般漢堡包冇乜分別。
如果唔係機票太貴，盈盈都想飛瑞士一轉，試吓呢個「昆蟲漢堡」。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
