RSS訂閱 《笑傲缸湖》香江嘅磚頭價格之高，喺全球嚟講「坐亞望冠」就梗架啦，至於人工，呢幾十
年嚟長期巳跑輸喺樓價後面食塵，唔通去少幾次日本旅遊就真係上到車咩，少年你實在太年輕了
。對於剩係間唔中去莎莎搵吓平嘢嘅盈盈嚟講，買樓嘅夢想依然係遙不可及。
繼早排香江有一位喺置業方面好成功嘅人士，出嚟勸勉依家年青人，如果喺香江買唔到樓，
可以將目光放諸四海，去吓印度、墨西哥同越南「見識」下喎，盈盈都覺得佢幾有道理架，佢都
係想後生仔開闊吓眼界啫。噚日（１５日）有一位局長嘅講法就比較「貼地」少少，叫年青人就
算買唔起樓，都可以買住架車頂住先，而且仲略有詩意咁形容：「讓自己的軀體和靈魂出來遊走
一下！」
盈盈覺得呢位局長嘅講法，非常之有創意得嚟又相當實際，證明局長呢啲位都唔係盈盈呢啲
食開人間煙火嘅廢青做啦。其實，買唔起樓兼唔夠錢使嘅，又點止香江，米字國嘅後生仔都一樣
有咁嘅煩惱。據英倫銀行最新嘅數據話，全英國嘅消費者貸款已經超過２００億英鎊，已經超過
咗金融海嘯以嚟嘅水平，當中主要來自卡數同汽車貸款，每年都會有一成增長。
不過，米字國有一位金融專家出嚟話，米字國後生仔之所以要孭咁多卡數，主要都係租金上
升速度好似火箭，而人工上升速度都好似烏龜行路咁，所以嗰邊嘅後生仔都係為咗維持生計而去
借錢。
換言之，其實諗深一層，米字國有唔少後生仔一到１８歲就要獨立搬出去住，反之香江冇乜
呢方面嘅文化，加上因為「土地問題」一個人都好難負擔房租。除咗好難上車之外，盈盈暫時都
係覺得香江係一個唔錯嘅地方，唯有咁樣嚟安慰自己啦﹒﹒﹒﹒﹒﹒《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
