RSS訂閱 《笑傲缸湖》做開大生意嘅侵侵（特朗普），自從上位做咗花旗國揸Ｆｉｔ人之後，依然不
改舊時做「腦細」嘅本色，成日擺出一款「唯我獨尊」嘅姿態，只要有官員同佢意見分歧，或者
講咗Ｄ佢唔啱聽嘅嘢，一係就自己醒目Ｄ「劈炮唔撈」，一係就等食「豉椒炒魷」。原來侵侵自
舊年１月做咗一哥之後，收大封信同自己話唔撈嘅人，真係十隻手指都數唔晒，最新鮮熱辣嘅就
係國務卿蒂勒森（Ｒｅｘ Ｔｉｌｌｅｒｓｏｎ）。
侵侵噚日朝早就喺Ｔｗｉｔｔｅｒ發文，話正式「叮走」蒂勒森，下個月開始原中央情報局
（ＣＩＡ）局長蓬佩奧（Ｍｉｋｅ Ｐｏｍｐｅｏ）就會上位接任國務卿一職。由於蒂勒森今次
喺白宮人事大地震中職位最高，「孖屐」對呢件事都感到嘩然。不過，亦有唔少人對蒂勒森被炒
拍爛手掌，其中，僅僅做咗半年，位都未坐暖嘅前白宮發言人斯派塞（Ｓｅａｎ Ｓｐｉｃｅｒ
）竟然喺Ｔｗｉｔｔｅｒ上寫咗句話，感謝呢位堅定嘅愛國者對「分裂國家」嘅付出
（Ｓｅｖｅｒｅｄ Ｏｕｒ Ｎａｔｉｏｎ Ｗｅｌｌ）！雖然唔知佢係有心定無意，事關呢句
嘢喺個幾鐘頭後就改返做「Ｓｅｒｖｅｄ Ｔｈｅ Ｎａｔｉｏｎ Ｗｅｌｌ」，但佢原本嗰句
就已經獲得唔少網民讚好。
事實上，「孖屐」一直都有傳，話蒂勒森同侵侵「撈亂骨頭」，佢地喺好多政策上都有好多
分歧，仲有消息話蒂勒森喺一次國安會議上面話侵侵係「白痴」，搞到侵侵一直懷恨在心，所以
就想「叮走」呢個眼中釘。
花旗國有媒體分析就認為，蒂勒森自上台之後，加上佢同俄國強人普京都算係幾
Ｆｒｉｅｎｄ，「孖屐」都覺得佢同「通俄門」呢單嘢唔多唔少都有關係，加上國務院就阻止外
國勢力干預大選上面，唔肯投放更多資源，而且佢在任期間，人才流失嚴重，所以都有唔少網民
都贊同斯派塞嗰一句「Ｓｅｖｅｒｅｄ Ｏｕｒ Ｎａｔｉｏｎ Ｗｅｌｌ」。
盈盈雖然對政治唔係太熟悉，但如果白宮持續出現高層人事大地震，相信香江以及其他魚缸
都唔會有運行，唔通真係要揸「茄殊」為上策？《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
