RSS訂閱 《笑傲缸湖》噚日（１１日）魚缸突然急瀉過千點，嚇到唔少缸友「騰騰震」，盈盈見到股
海一片紅後，喺股海有返咁上下博殺經驗嘅缸友都知道，每逢股市插水，缸友都會即時諗起廿幾
年前嘅經典神劇《大時代》入面嘅秋官（鄭少秋）所演嘅角色丁蟹，而自從呢套劇出街之後，每
逢秋官有新劇出街或搞演唱會嘅時候，魚缸都會插水。
而盈盈噚日無聊上網，果不其然真係搵到秋官嘅最新新聞，有神州嘅媒體放風，話秋官有份
參與嘅一部最新神州電視劇《將風》，即將於今個月底喺湖南衛視首播，難怪噚日有缸友話除咗
因為花旗國因素搞到魚缸走晒樣外，「丁蟹效應」都喺其中一個跌市原因。
雖然秋官喺《大時代》唔係做咩「缸湖大俠」教人炒股，但秋官幾十年以嚟武俠英氣澟然嘅
形象已經迷倒唔少師奶，包括盈盈個阿媽，而當盈盈拎住秋官嘅最新劇照畀家母睇個陣時，阿媽
雙眼即時閃閃發光。劇照入面嘅秋官白髮蒼蒼，但佢銳利嘅眼神，加上佢堅挺嘅鼻子，再加埋一
身白色嘅素服，依然掩蓋唔到佢「型英帥」嘅獨有氣質，年屆古稀仍然保持到年青大俠嘅韻味，
難怪有唔少網民話佢搶晒男主角風頭，仲話呢套劇會因為秋官會收視長紅，睇嚟盈盈同阿媽嚟緊
都要擔定櫈仔，眼仔「ＬＯＯＫ ＬＯＯＫ」坐定定喺電腦螢幕前煲劇了，暫時忘卻魚缸牛去熊
來嘅煩憂。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
