RSS訂閱 《笑傲缸湖》話說早幾日法蘭西聖母院大火，差啲就燒個清光，真係心痛死盈盈囉，事關聖
母院不單只係法蘭西名勝，重係全球文明嘅其中一塊寶地，盈盈本來今年都想去打個卡，可能呢
個夢想要延期啦。
至於聖母院祝融光顧後，法蘭西話事人馬克龍呼籲，希望政治上左中右三路人馬，但暫時放
低成見，所以佢當時已經發表講：「今夜嘅巴黎，我見到嘅係大家團結嘅力量，我深信我哋應該
化悲憤為力量，同時我哋都要反省下現時嘅經歷、乜嘢應該要做，希望大家集中火力重建聖母院
！」
起初呢句說話真係集到氣！依家法蘭西就好似當年華東水災咁，香江呢邊有錢出錢，有力出
力。連馬克龍班富豪Ｆｒｉｅｎｄ都一齊出下錢，消息指目前為重建聖母院而收到嘅捐獻已經突
破８億歐元（大概７１億港紙）！
咪住，「有錢佬從來唔會死錯人，點解好地地會肯捐咁多錢呢？」呢個時候，左翼就出嚟話
，有錢佬為捐錢，可以有免稅優惠，重話捐咁多錢不如盡責交返多啲稅咁話！亦都有人指出，班
有錢人捐咁多錢，其實都係想幫自己洗底，亦都顯示出社會貧富懸殊嘅差距，其中法國總工會
（ＣＧＴ）秘書菲利浦重話，班有錢人隨便就可以拎一兩億出嚟，除咗顯示出不平等之外，班有
錢人就唔應該話無錢幫助社會增加福利啦！
呢件事嘅連鎖效應下，馬克龍呼籲班「黃背心」應該暫時放低成見，集中重建聖母院問題再
講。但呢班極端分子點會放過佢，有指馬克龍呢番說話引起佢地不滿，並被視為趁火打劫政治資
本，加上左翼份子仇富情緒加劇，所以有傳係呢個禮拜六（２０日）「黃背心」會策劃一場更大
型嘅示威行動，以反對馬克龍及其一切政見。
法蘭西果然係搞革命嘅戰鬥民族，一件火燒聖母院事件都可以搞到咁政治化，盈盈覺得，有
啲價值觀係世界共同，例如文物被燒毀而感到可惜係人之常情，但如果將佢複雜化同政治化係咪
對社會好呢？呢樣嘢大家真係要思考下啦。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
