《笑傲缸湖》打工仔最開心係咩?梗係加人工啦,如果你老細肯加一成相信大部分人都爽到
彈起!但盈盈最近收到風,原來微軟CEO納德拉(Satya Nadella)上一個財年
度嘅年薪加咗六成六,總共有4290萬美金,兌返港紙有成3﹒3億銀,較上次香江中秋六合
彩金多寶頭獎8000萬銀多超過三倍,真係打跛腳都唔駛休!
微軟話納德拉領導有方,又令業務達標同埋股價大升,佢接任呢五年入面,公司市值由
3000億美金升到過萬億美金,股東總報酬率(TSR)較97巴仙嘅科技公司好,所以要獎
勵佢咁話!微軟又話,納德拉基本年薪係100萬美金,佢人工嘅主要增幅嚟自股票獎勵增加,
唔怪得人工咁高啦!
自從納德拉入職之後,公司嘅智慧雲端(Intelligent Cloud)業務成長
好似坐火箭咁咁快,近呢三年仲係第一次成為微軟三個主要業務中最大嘅部門。而商業社群平台
LinkedIn、雲端商業服務收入、Windows 10每月活躍數字等等,增長都非常
可觀,佢真係功不可沒啦!
其實納德拉有咁高人工其實都好正常,因為近年微軟同蘋果喺美股市值第一寶座上面輪住坐
,認真犀利!
盈盈覺得納德拉當然值得咁高人工,但希望佢都可以做到一個慈善榜樣比大家,幫吓D窮人
!依家仲未加人工嘅大家都唔洗咁灰住,只要努力工作,保持希望,終有一日會係你!
《任盈盈》
《編者按》本欄搜羅即市傳聞,惟消息未經證實,《經濟通》亦不保證內容之準確性。
全新etnet健康網購,送你【健骨維他命D3(1000IU)】乙樽(價值$108)► 立即行動!