RSS訂閱 《笑傲缸湖》當大家有錢存入銀行，但突然間ＡＴＭ拎唔到錢，仲以為自己存款歸零，真係
驚到個心離一離，盈盈好耐之前都試過！但噚日（１７日）可能全寶島人都咁好驚青，因為全台
灣ＡＴＭ都壞咗！
事緣尋晚有消息傳出，就話好多寶島民眾喺ＡＴＭ拎唔到錢，不過經過財金公司巡查之後，
確認係ＩＢＭ嘅人員喺系統維修過程入面好大頭蝦，唔小心郁到相關線路，搞到線路鬆脫，令交
易資訊傳送失敗。個系統係下晝５點９起陸續發生網結異常狀況，搶修之後，係６點４已經正常
返。
寶島監管當局就話，根據銀行同財金公司所講，跨行交易系統係噚晚６點出現堵塞，但發覺
唔對路嘅情況喺６點４排除咗，初初以為係大量交易當機，最後發覺係人為疏忽。
盈盈聽落都覺得有Ｄ誇張，就算人為疏失誤觸線路，點會造成咁大規模ＡＴＭ出現問題？雖
然只停２０分鐘左右，都係令人Ｒ哂頭。
講開又講，寶島財金公司都唔係第一次畀ＩＢＭ搞到中伏啦！原來舊年８月，財金公司因
「ＩＢＭ大型主機ＩＭＳ系統異常」，搞到跨行交易跪低兩粒鐘，最後仲因為比人話「未能妥適
監督系統服務商ＩＢＭ」，比當局罰款。
計盈盈話，錢銀呢Ｄ嘢真係要留神呀！好似早排香江交易所咁，突然期指當機，搞到投資者
震騰騰，何況今次影響嘅普羅大眾市民。汲取寶島呢次教訓，大家以後都要醒定Ｄ，記得放住Ｄ
茄殊旁身啦！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
