RSS訂閱 《笑傲缸湖》日本國民壽司店「壽司郎」由日本紅到香港，以價錢平同服務優質取勝，係排
隊名店嚟。不過近年日本乜都加價，就連開業３８年嘅「壽司郎」都捱唔住，宣布今年９月開始
首次加價喇！唔知香港分店會唔會受到影響呢？
經營日本迴轉壽司品牌「壽司郎」的ＦＯＯＤ＆ＬＩＦＥ ＣＯＭＰＡＮＩＥＳ宣布，因應
原料價格及高運費等因素影響，最低１００円起嘅未連稅價，將從１０月起首度上調。《日本經
濟新聞》仲話從１０月起加到連稅嘅１２０円到１５０円不等呀。
壽司郎今次決定加價，主要原因在於原料價格同運費上調，加上日円貶值。
ＦＯＯＤ＆ＬＩＦＥ ＣＯＭＰＡＮＩＥＳ社長水留浩一說，喺經營環境快速發生大幅變化
嘅情況下，佢哋嘅營業情況都要改變喇。不過佢話，目前嘅價錢將維持到９月底，「希望喺呢個
暑假能夠等後生仔女同小朋友，都可以盡情享用最後嘅１００円壽司喇」。
聽近日嘅新聞講，日本政府計劃由６月開始，重新開放俾外國觀光客入境。唔知香港人又會
唔會蠢蠢欲動趕返「家鄉」呢？如果答案係「Ｙｅｓ」，咁睇嚟大家都可以趕搭百円壽司尾班車
喎！但盈盈相信，壽司郎獲消費者公認價廉物美，服務又好，如果真係加價，呢個印象應該無咁
容易降低啩？再加上疫情令大家「思鄉」足足兩年幾，到時無論係日本定香港分店都應該會照舊
大排長龍，生意興隆喇。
其實日本嘅平價食品加價係近期普遍現象，因為就算唔講壽司郎，連日本另一款平價國民美
食蕎麥麵都加價，有麵店老闆話加幅由１０％至１５％，原因同俄烏戰爭有關。事關喺２０２０
年，日本嘅蕎麥產量只佔全國需求４２％咁大把，缺口由進口填補，主要來源就係俄羅斯，而且
舊年取代中國，成為日本第一大蕎麥進口國。不俄羅斯入侵烏克蘭，導致商品價格急升，加上針
對俄羅斯的制裁行動以及日圓大幅貶值，令蕎麥進口商和製粉業者很頭疼，進口蕎麥成本梗係上
升，睇嚟日本人嘅「窮人恩物」選擇又少一項喇，真係欲哭無淚呀！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
