fb香港辦公室揭秘 坐天王椅隊啤酒

　　如果Google係打工仔天堂，Facebook絕對係你屋企張床。皆因，fb香港新office尋日開張，得三分一地方用黎開工，梳化位保守估計就有30個，好嘆!

「優閒酒廊」供人聊天，互相了解，配搭激發思考的書櫃、遊戲與本地藝術品。

我要做筍工! fb幫到你

　　辦公室座落鰂魚涌港島東中心60樓，一推開磨砂門，超級燦眼。唔只有陽光由180度落地大玻璃四方八面照入黎，反射去腳下維港更加係波光粼粼，最爆的是近百個記者雙眼發光。

　　嘩!嘩!嘩聲始起彼落，唔係，係根本無停過。嘩!前面係無敵大海景；右邊係酒廊；行入啲係麻雀檯、望遠鏡、育嬰室。嘩，左邊係open kitchen，左上角是小型圖書館，盡頭係乒乓波檯、跑步機同OSIM天王椅!

 麻雀檯

任飲任食

　　「我啤酒選擇可能係全世界最好。」Facebook大中華區總經理梁幼莓好自豪。望住兩個大雪櫃就知所言非虛，四十幾款凍飲大曬冷。藍妹、青島、Hoegarden、
Corona、Asahi、Guinness、Blue Ice，十幾款啤酒任隊。

　　Haagen-Dazs、Movenpick、New Zealand Natural三款貴價雪糕任食。仲有齊早午晚餐熱辣辣無限量供應、30幾隻包裝零食任揀、茶水姐姐仲煲定中湯畀你飲，連合味道杯麵都有六隻味你揀，夫復何求。

 零食無限量供應

想肥都難

　　伙食咁好，伙計咪隨時變火腩? 放心，朱克伯格都無乜肥到。

　　秘訣係一人一大張電腦檯，每張檯至少可以擺8部Macbook。噢，我想哭。

　　fb大中華區業務總監Benny Chu仲同我親自示範，張檯有幾神奇「可以較高矮架，升到胸前咁高，方便企係度做，每朝早我實企返一兩個鐘。」難怪做三年，依然好
slim。

　　就算飯後肚凸凸，唔怕。因為，連員工T恤都好講究，有cutting、質地滑溜溜有彈性，一睇標籤原來係American Apparel，贏晒。

　　講真，公司入面又有扭蛋機，又有ukulele，仲有獅頭任你舞，邊有員工會坐定定做? 想肥都難。

臉書無得輸

　　吃喝玩樂式office，很想要吧?

　　等等，「WIND BLOW WATER RISE」、「BIG TEA RICE」?

　　堂堂一間外國公司，竟然用chinglish? 其實係fb明撐廣東話，會議室通通叫做「風生水起」、「大茶飯」、「掂過碌蔗」、「夠薑」、「吹水」，抵讚。仲有間叫「渣fit」，唔知係咪大老闆間房呢?

　　而最有共鳴，就莫過於，有幅牆仿摹九龍皇帝曾灶財墨寶，同埋「路姆西」公仔，竟然無處不在，太用心了。

幅牆仿摹九龍皇帝曾灶財墨寶

　　臉書無得輸，你間公司呢?

文：方然 攝：Dennis 

全新節目《說說心理話》青少年不可以戀愛！？真實個案講述驚心動魄經歷► 即睇