英SIR黃國英 股壇30年 股民百態錄

　　踏入2019年港股彈完再彈，恒指近日更挨近30000點，似乎牛氣沖天，是追是揸是沽，股民心態也不同。

　

　　入行30年的著名基金經理黃國英，現管理的資產總值超過14億元。他由外匯分析員走上「Fund Man」之路，試過贏到開巷，亦試過輸到貼地，但最後都能化險為夷，打番上來幫客賺大錢。他自嘲可能是全港錯得最多的股評人，皆因自己不是模稜兩可，而是實實在在「有嗰句講嗰句」。

　

　

黃國英（Alex）

50歲

現為豐盛金融資產管理部董事

學歷︰

香港大學社會科學經濟學學士

工作︰

1990年 外匯技術分析員

1996年 轉投股票分析，擔任嘉洛證券研究部經理

1997年 萬信證券研究部主管

2002年 開始為客戶管理資產，擔任御泰資產部主管

2005年 申銀萬國基金經理

2007年 自立門戶，開設豐盛金融集團

現管理資產總值超過14億元

　

　

　　論股無數，亦見盡不少股民百態，直言這一代的股民跟上一代大不同，以前的股民愛長揸藍籌，或者深信內幕消息，只要個「冧把」就得。現今的股民既有「疊水」保守派，亦有專搏買牛熊窩輪的「賭仔」心態。還有一批被他形容為「落錯車股民」，他們睇市不炒市，年復年靜待再來一次大冧市，彌補以前錯失入市的機會。

　

　　不論是哪類股民，也不應只想像贏大錢的場景，而忽視輸大錢的反應。「英Sir」對股民只有一個忠告︰「不要All-in也不要All-out」，否則不論有沒有股災都會死，而是應趁機會拿部分資金出來入市，了解市場運作，就會明白市場不是那麼容易末日。

　

　　黃國英與「股」相當有緣，在股市大起大落的90年代，由外匯分析員轉投證券行，到12年前自立門戶，成為今天人稱「英Sir」的著名基金經理，論股無數的他，原來細細個已聽過長實（00001）、匯豐（00005）等大藍籌。英Sir的外公是越南華僑，六十年代在當地經營製衣廠，是名副其實的有錢人，但越南解放後來到香港設廠，因經歷過時代洗禮不敢再投資房產，於是主要投資都放股票上。英Sir記得小時候，經常有一兩名經紀上門跟外公處理股票買賣交收手續，他對長實（00001）和匯豐（00005）等大藍籌絕不陌生，或許這些經歷，造就今天這位股評人。

　

　　「我應該係全港錯得最多的股評人！」入行近30年的英Sir這樣自嘲，但這也是他在眾股評人中站得住腳的其中一個原因。「我做股評人之後，點解覺得自己仲企得住腳，原因係我無咁模稜兩可，因我的講法最容易被市場證明係錯，唔會話在對和錯之間，亦唔會話Count唔到嗰次睇法係中定大唔中，有得Count的話，必然係中一大堆和錯一大堆，兩邊的Count都好多，就係喺我第一份工度學番嚟。」

　

轉捩點成基金經理

　

　　港大經濟系畢業後，他先後見過渣打、匯豐、BCC（即未倒閉前的Bank Of Credit Commerce）等大行，怎料每次到最後面試，臨門一腳都射失波，最後要「量地」4個月才當上外匯技術分析員，每日工作就是不斷預測下一浪的市況怎樣走。「貼的不斷啱、不斷錯，（錯了如）被市場摑（一巴），（預測）除咗要中Level，仲要中Picture，呢個係好好的鍛練。」

　

　　這6年間，英Sir已練得一身好武功。他後來轉投股票分析，當時是「Ben哥」鄺文彬聘請他擔任嘉洛證券研究部經理。後來一次的機會，更為英Sir舖下成為基金經理之路。「有朋友話萬信（證券）請人，萬信同嘉洛分別係，萬信要求出埋鏡，橫掂都係梗係搏下出埋鏡嗰邊。」97年後，股市爆煲變淡靜，他自言當時如留在研究部，會無聲無色地被人裁走，但在萬信因要出鏡關係，就算要削減部門人手，也輪不到他。另一個轉捩點是，他於2000年開始在報章及雜誌寫股評，其專欄又正中當年股民口味，自然在行內變得有影響力。

　

港大畢業後，英Sir第一份工是外滙分析員，每日工作就是不斷預測下一浪市況，這鍛鍊令他日後做股評時，不會模稜兩可。

　

　　人是出了名，但現實是零客，英Sir也深明搵客難的事實。2002年，萬信證券被裕泰收購，原本是萬信證券研究部主管的他，有感做研究部「得個吹字」，即又做書生又做打仔，於是大膽嘗試轉做資產管理。「裕泰（當年）殘留咗隻細Fund畀我哋，我一接手嗰年，升咗90幾%！」據當年華爾街日報報道，由他主理的Rexcapital Asian Pacific基金，在2002年9月至2003年9月期間，回報在亞太區，包括亞洲及日本內排名第一。

　

　　這一戰，英Sir贏到開巷，但擔任申銀萬國基金經理時，經歷通縮轉通賬，而他所選的股票屬通縮型，表現很差跑輸大市。當年陷入低潮，英Sir隨即被「照肺」，敢於嘗試的他，抱著「主動可能殺出一條生路」的心態，除港股外，索性炒期指和外國期指，最後集合一班敢於冒險的死士客投資期指，再一次證明他的眼光。

　

　　後來，英Sir自立門戶，開設豐盛金融集團幫人投資，現約有700名客戶，管理資產總值超過14億港元。他坦言，至今已經歷3次大跌市，而最壞要數2014年。「唯一一次人哋賺錢我蝕錢係2014年，係我生涯入面最衰的一年。如睇Bloomberg排名，我哋排第三，係最差3%（表現）入面。但計到2017年年底，我哋打番上來排（最好表現的）95%，如沒有那（最差）3%，我哋可能係99%或100%，那年真係衰到貼地。」

　

要做好功課先落場

　

　　股票價格有上有落，當然有輸不起的投資者︰「有啲係輸唔起的，最記得以前有個客上嚟證券行，會質疑你點解會在嗰個位幫佢買入，為免麻煩我哋最後都請他走，唔做佢生意，但咁多年只係得一個。」但當然亦有支持者，試過有跟隨10年的投資者這樣跟他說︰「你今年會贏硬，未見過你連輸2年，又跟我說︰我哋無輸錢，我哋只係輸時間啫，反而呢種客多啲。」

　

　　入行接近30年，英Sir又論盡股民百態，指九十年代的股民有兩種，一是愛揸藍籌兼作長線投資，另一批則是他剛入行。細價股盛世下的股民，只要「畀個冧把」就得，亦好相信內幕消息，跟現今的股民是兩類人。「90年代中啲股民好信專家畀的冧把，如說明天會見2蚊，啲股民真係信，但如現在話見2蚊，啲股民會走（沽）咗去先。現時的股民想發達，會買牛熊證買窩輪，完全係兩個世界，因牛熊證快手吖嘛，是賭仔心態，以前啲人不會覺得（買股）係賭，覺得係贏硬的，依家啲人買牛熊，其實知道係賭，唔係贏硬，風險意識係進步咗好多。」

　

英Sir記得小時候，已聽外公（右圖中間者）跟經紀談天說股，對大藍籌絕不陌生。

　

　　股票交易所由「紅衫仔」年代，走到去人化進展電子化，英Sir認為，交易費平是催化劑，也令交投活躍。「以前唔買三、四萬元（股票）好唔抵，因每次手續要100蚊，依家邊仲有100蚊最低手續費呢回事㗎？所以依家啲人賭額細咗。」

　

　　至於現今的股民，大致也分兩種，一是「疊水」保守型，另一種是進取型，但英Sir又觀察到有些被他稱之為「落錯車的股民」。「佢哋基本上係睇㗎啫，即睇市唔炒市的一堆人，我懷疑佢哋在過去10年沽錯樓，唯一望就係再次大冧市，畀佢哋入番場，因佢哋可能有好多現金，資產就無乜，但問題係，等吓等吓等足10年，個世界都好似現在咁運作下去，無嘢會保證去番以前的Cycle。」英Sir只有一個忠告，就是希望這些投資能做個逆流股民。「你唔好All In，但亦都唔好All Out，因All Out就返唔到轉頭，要盡力去搵好公司逆流而上。」

　

　　英Sir以日本首富柳井正的故事舉例，指柳井正不會在日本經濟最差時「等低位撈、高位沽貨」，反而是創造價值出來，說明不要守株待兔，否則只會坐以待斃。「如有100萬，咪攞25萬出來嘗試搵好的公司，唔好諗住等一個位去All In，因第一未必等到，第二就算等到一個低位入市，入場嗰刻個注碼變得太大了。另一點是，如作戰經驗係零，之後好難駕馭個過程，即有沒有出現股災你都死，倒不如在這時拎部分資產出來投資，會令你明白個市場多啲，唔係咁容易末日。」

　

　　他又叮囑散戶不要股神上身。「首先風險意識要有，除非係買煤氣（00003）、領展（00823）、中電（00002）等，講真，好多人係沒有注碼的考慮，如投資100萬股票，從來無諗過蝕20萬時會有咩反應，只會想贏20萬時會點，一心要做股神。」他說，美國蘋果股價都可以跌廿幾個百分點，直指「知識型經濟的股票起碼有二三十個%上落好正常」，要理解個人是否能承受這風險。

　

　　投資股票波幅大兼具流動性，跟要諗清諗楚才會買樓的心態大不同。「股票屬流動性，無諗清楚就買，諗住有事即走，輕率程度勁好多，無諗個上落覆度比以前大好多。」英Sir又教路，投資要揀如領展的收租股、令大眾不得不用的網絡，如騰訊等網絡股，以及產品能做到領先地位的消費品股。「作為散戶要明白，如果唔係投機，你就應該放棄捕捉周期，應集中火力在這三種股上。」又苦口婆心說︰ 「唔好聽人講買就乜買乜」，股民自己也要做功課，揀啱股後，就要去看這家公司背後賺錢方法能否持續下落，這才算是投資者。

　

去年英Sir擴充辦公室，與太太齊剪綵。

　

科技股+品牌股+收租股 三類股看高一線

　

　　熱愛足球的英Sir，去年年中在他的投資講座列出足球陣，分別砌出港股及美股組合，港股組合以騰訊控股（00700）為前鋒，中場有微創醫療（00853）、物業管理股的中海物業（02669）、碧桂園服務（06098），後衞則有友邦保險（01299）、首都機場（00694）等，而守龍門則有收租股領展（00823）。美股組合方面，前場有瑜伽服裝品牌Lululemon、獸醫器材公司IDEXX Laboratories及支付平台Paypal；中場有亞馬遜、Netflix及Facebook等；貝萊德、皇家加勒比郵輪等為後防；蘋果公司則是龍門。

　

　　今回來個檢討，英Sir不諱言足球陣「贏番次」，贏的主要是物業管理股和收息股跑出，輸則是首都機場、中國燃氣（00384）和微創醫療，但總括是贏多過輸。在美股方面，他指因去年仍未追捧雲計算，揀得最好是Lululemon，但貝萊德卻輸。

　

　　今年以來，港股彈完再彈，近日恒指挨近30000點，似乎牛氣沖天。截至2019年4月3日，恒指為29986點。英Sir直言，今年揀股重點是一個字︰「Service」（服務）。「依家啲人愈來愈睇Service，就算物業管理都係一個Service，不只係賣一個產品，賣Service是與客人建立關係，係會有Recalling或持續到生意，所以現在的公司都睇重可否與客建立長久關係，最好係啲客定期進貢仲好，變咗各行各業都會向這方向邁進。」他舉例，如物業管理、雲計算、軟件股，又或個別行業如滅蟲清潔，如與客人建立關係後，公司會變得好穩陣，但這些公司的股價會較貴。他又教路，從投資角度而言，股民日後要考慮間公司所賣服務，是否令其價值貴過其他公司，而科技股、品牌股和收租股是他今年心水推介。

　

幫富豪投資最輕鬆 管理費夠買樓

　

　　他自立門戶後，有位城市富豪派了名手下來，暗地以手下之名開戶口投資。1年後，這名手下再來開戶，這次說明是代表富豪，還問英Sir是否記得他，因對上一次投資回報甚豐，想再下一城。「好記得富豪畀咗5,000萬投資，最差時輸到剩番3,300萬，但他一點壓力都冇畀我。跟住3個月內，我將3,300萬打番上5,050萬。1年後富豪再加碼到3億，後再額外畀多5億投資，因他短期睇好個市，講明只係玩到年尾叫盡炒，我仲炒咗8,000萬返嚟，即由5億變5.8億。」英Sir說，管理富豪的戶口最輕鬆，因該筆錢對他來說好濕碎，但對於剛自立門戶的基金經理，則這是大支柱，當年的基金管理費足夠去買樓。

 

全新節目《說說心理話》青少年不可以戀愛！？真實個案講述驚心動魄經歷► 即睇