英SIR黃國英 股壇30年 股民百態錄

英Sir論盡愛股：億元入新地成第一大倉

　　黃國英旗下的豐盛金融，現約有700名客戶，這位操盤領航人所管理資產總值超過14億港元，其基金投資在港股多於美股。一直以來，騰訊控股（00700） 是英Sir的愛股，儘管騰訊去年曾由上市新高476.6元，年中回落至380元左右，但當時他對「股王」的信心不變，更曾笑言︰「不要騰，只要信」，並成為旗下港股第一大持倉。至去年11月，英Sir開始看中新鴻基地產（00016），在102元至105元之間買入，當時差不多投資近億元落新地，成為旗下港股第二大持倉，排第三則是美股的亞馬遜。踏入今年首季，港股反彈，新地在愚人節當日升勢擴大，創逾7年新高，炒上逾140元水平，躍升為第一大持倉，騰訊變第二，第三仍是亞馬遜。究竟英Sir為何推崇這三大股？且聽他娓娓道來原因。

新鴻基地產（00016）收租模式穩陣好賺

　　「去年11月開始鍾意新地，因想通了一點︰就是新地的收租都等於領展（00823）咁。如計領展的價值，其收租已Cover成間公司的價值兼還有多出，即所有發展業務都係送的。如跟領展比較，新地仲可以將個地方搞旺，反觀領展係要買一個已存在的地方返嚟，然後搞旺佢，新地則是搬啲人入去（地方）然後搞旺佢，主動權好過領展。新地好多樓盤的車位都唔賣，留來收租，即係領展嗰招，相信這（模式）會逐漸變主流，收租業務的重要性愈來愈增加，間公司會愈來愈穩陣。」

騰訊控股（00700）和美股亞馬遜（AMZN）超級抵博

　　「以外國經驗來看騰訊，阿里巴巴和騰訊都係超級抵搏的，因遇正雲計算5G年代，天下間最大的兩間公司亞馬遜和微軟，股價升其實都係靠雲計算升。而阿里巴巴和騰訊係有機會好似亞馬遜和微軟咁升法。唯一不好的地方是，兩間公司的其他業務都相當賺錢，為爭取市場佔有率，未必急於收一個合理費用而去打一個消耗戰，令雲計算的貢獻在短時間內都不會太大。雲係大勢所趨，啲人將嘢放上Cloud，令佢哋電腦和手機的Processing唔需要咁快，變咗可在雲端高速運算，這變成必需品，但現在是建立期，未來幾年係一個好新的業務來帶動成間公司，所以阿里巴巴和騰訊都好抵搏。」

維他奶國際（0345）維檸貴都要買

　　「維他奶隻股，我哋持股好耐，原來檸檬茶先係佢哋的殺著，上到大陸會好欣賞維他奶，因大陸係殺陸戰場，所有產品萬幾人抄你，維檸賣6.8元，康師傅賣2.8元，你企硬價格變大價值，啲人都係買你，所以股價咁貴，而睇佢的銷售係賣到。」

預言港財演被內地分析員淘汰

　　由2012年開始至今，英Sir已舉辦5場Talk Show，開騷地點均選擇在新伊館，每場約2,000張門票全都爆滿，連他自己也覺得是個奇蹟，他歸功於自己夠貼地，不扮高深只求傳真的性格。現又預約明年3月至7月的檔期，再次與股民粉絲近距離接觸。

　　有人會以「財演」一詞貶稱經常曝光的股評人，但英Sir對這貶稱並無特別感覺，反而卻看深一層，大膽預言，在3至5年間，財演會沒落。「無可否認我哋係出鏡多得滯，比較勁的鬼佬基金經理，佢哋都出鏡多，但密度無我哋咁密，又不會寫專欄。」英Sir批評，本港的財經評論太過單一，長此下去，財演也很快沒落，而港中小行的財經分析員會被中資行的分析員搶去「飯碗」。

　　「我估將來可能中資行分析員佔晒所有評論位置，因香港的證券行根本唔夠資源同佢哋硬拼，亦唔夠佢哋多人。港分析員講的千篇一律，如現在跟20年前比，看到的評論唔會好大分別。」他估計整個轉變生態應是3至5年之間的事。

財演論股 將會消失

　　他續稱︰「如靠低級趣味，大師上身喺度當係燈，然後好高Hit Rate，維持鬧劇式、醜角化財演世界，係唔會維持好耐，因股民唔會聽你講嘢，因為無乜特別View，股民會覺得自己唔係盲，唔使聽你講條50天線喺邊度。」

　　他估計財演將來會消失，因內地分析員不會只跟股民說十天二十天線，指這個行業將會有好大變化。「因一間（中資）行養住百幾二百個分析員，而他們是跟公司，講的唔係十天二十天線，而係講間公司有咩產品、有咩隱憂，這才是大方向。」

　　講到做Fund Man，就算做到成績，未必會有人拍手掌，做得差更會被稱為「明燈」，但英Sir都會笑罵任由人。「投資者最後都係睇P&L（賺定蝕）㗎啫。如從低潮走出，有人會話你唔係打詠春，用旁門左道方法走出低潮，咁我只可以同你講，邊個話要打詠春，唔係詠春又So What？即沽晒貨揸Cash，或走去買A股或美股，這正正是對沖基金精神，就係要搵條路出嚟。」

　　擅於分析美股的英Sir，比較欣賞美國著名財演節目主持Jim Cramer，而在本港，他則沒時間留意行家，但指最突出是他不願開名的「徒弟」。「他是一個奇才，16、17歲嚟做暑期工，佢自小已睇股票，現做一個細基金的Fund Manager，但時勢唔就佢，他叫我師傅只係尊重，後來他去一間中大型行跟另一位老行尊。」至於傳承，英Sir指，擴充辦公室其中一個目的是日後多聘「Trader」，從中培育人才。

etnet榮獲HKEX Awards 2023 「最佳表現證券數據供應商」大獎► 了解詳情