《古臣雙周記－古臣》受惠國策加自身改革，「生發發」有運行

　　孖屐仍然方向未明，等咗好耐嘅七翻身冇出現，反而大市幾次試穿過兩萬七關，年內升幅一度盡失！響黑暗中螢火蟲就顯得更耀眼，生發發(00388)逆市炒高，最高上番530銀水平，重獲「啡底」股之位，阿臣就同大家睇吓佢呢排有咩咁好炒，分析吓點解生發發真係「有買貴，冇買錯」！

中概股回歸趨勢有利港交所。（資料圖片） 

　　雖然我呀媽都知生發發係做咩業務，但為咗顧及股壇新鮮人需要，都係花少少篇幅同大家講清楚。香港交易所，喺香江獨市經營證券及期貨市場，提供現貨、期貨、衍生工具買賣平台，但近年最令人留意嘅係佢嘅IPO業務。上半年生發發IPO集資額為2104億銀，按年升1.27倍；總集資金額為4825億銀，按年升1.08倍。畢馬威更預期中概股回歸趨勢持續，料全年集資額不少於4000億銀。

神州加強監管外地上市 生發發發達

　　近期神州收緊對中企赴美上市監管，中國網信辦對「滴滴出行」啟動網絡安全審查，事件慢慢發酵之下佢連App都下埋架，多間公司亦已傳出暫停美國上市計劃，包括社交平台小紅書、運動科技平台Keep等公司都收回美國上市念頭。其後網信辦更加公布重磅新規，為免訊息外流，以後所有外地上市嘅公司，只要擁有100萬用戶個人信息，就需要網絡安全審查。

　　咁又關生發發咩事呢？有金融業界人士就響新規出爐後同監管官員開會，局方就同佢業界透露赴港上市嘅公司可以免於審查，新框架下所有中企發行股份都需要中證監批准，而為咗集資，響香江上市程序又比美國簡單，未來自然有更多公司喺生發發IPO。

　　匯豐指，神州收緊中概股海外上市監管內將會推動生發發成為「東方納斯達克」。該行分析，有25間中概股符合二次上市條件，有機會來港上市。已在美國上市的中企，亦有望逐步回流香江。

改革浪接浪 勢引發金融熱潮

　　除咗國策利好外，生發發嚟緊更改革多多，有意緊貼孖屐潮流推SPAC(特殊目的收購公司)上市，第三季將會諮詢市場！最近亦落實推出全新股平台FINI，以全面簡化及數碼化IPO程序，現行新股結算周期將由「T+5」縮短至「T+2」，不過預期最早都要下年第四季先會啟用。　　

　　最令人期待嘅都係跨境理財通同南向債券通，特首早前放風，話跨境理財通準備工作已經搞掂，相信好快會揀個好日子公布！睇番5月份神州監管部門嘅相關文件，業務試點總額度暫定為1500億銀人民幣，首階段將提供債券、基金、股票基金和貨幣基金等中、低風險投資產品，預料計劃逐步成熟下，投資範圍將會進一步開放。大灣區內有超過600萬銀人幣可投資資產嘅家庭有成45萬戶，累計可投資資產總額至少達2.7萬億人幣，生發發交投有望受提振。

　　講開生發發嘅新方向，又想提下佢近年嘅改革史。李小加上馬之後陸續改革上市制度，由3年前開始批准未有收入的生科公司、同股不同權嘅新經濟公司及合資格的海外上市公司來港第二上市。截至今年3月底，共有146間新經濟公司響香江上市，總融資額達6822億銀；63間醫療健康同生物科技公司響香江上市，融資額超過1969億銀。反映生發發作為新股市場吸引力續增，中企現時想籌集海外資金，又唔想赴美上市經歷重重批核，基本都係要揀嚟香江。

 港交所日線圖走勢。（經濟通HV2系統截圖）

股票印花稅上調未致資金出逃

　　港府由今年8月1日起將股票印花稅由0.1巴仙上調至0.13巴仙，上調幅度達三成，在增加投資者的交易成本的背景下，孖屐怕港股交投受到負面影響。雖然上調後交易費用未有大增，但當全球市場維持低印花稅，甚至主要競爭對手美股市場未有徵收的情況下，難免缸友憂慮。

　　然而，近期港股交投由北水主導，但北水又以大額交易為主，炒到咁大舊錢就唔會理加多嗰0.03巴仙雙邊股票印花稅，而且最近北水愛股郁下就炒一成，有得賺、有鑊氣真係唔怕你收多些少手續費。至於高頻交易方面，阿臣認為相關投資者都係注重資產質素同回報，與其怕加稅不如怕熊市交投縮減。

古臣倉增至百萬

　　總結阿臣呢幾年個港股倉，成個組合大約都有25.57萬銀，今個星期開始泵大個倉到100萬銀，首先就買生發發(00388)沖一沖喜，近期佢做番「啡底」股之後一路強勢，弱市之下仍然企穩，阿臣都唔怕高位加倉，入多三手生發發，博年內升破歷史高位582.54銀。

　　另外，現時內房板塊畀恒大搞到氣氛咁差，融創(01918)剔除預收款資產負債率為78.3巴仙、淨負債率96巴仙、現金短債比1.08倍，指標仲仍然貼緊三條紅線，阿臣都係決定止蝕，以22.65銀沽出一手，套現2.26萬銀，不過輸國策冇計，蝕一皮野買個教訓。

　　為令缸友跟得貼倉位變動，如果阿臣有郁下個倉，就會喺《小傳日記》專欄同大家交代聲！想知道古臣百萬倉有咩變動嘅話就記得睇實喇！

WoW WoW星期三：健康網購產品低至$99 (只限今天)► 立即行動