《小傳日記》香江下任新特首已經塵埃落定，林鄭月娥噚日（２６日）以７７７票勝出，成
為首位「女揸ｆｉｔ人」，另外兩位候選人曾俊華同胡國興就以３６５票及２１票落敗。其實無
論邊個當選，總會有人感到失望。作為香江一份子，小傳寄望林鄭喺未來五年修補社會撕裂，帶
領香江邁步向前，人人安居樂業！
好喇，講番魚缸表現先，話說花旗嗰邊，侵侵提出嘅醫保改革，被自己友共和黨突然撤回。
孖屐愈來愈擔心侵侵往後施政將舉步維艱，道指上星期五（２４日）都無眼睇，收跌５９點報
２０５９６。而香江今朝都被拖累，恆指低開１２２點，加埋祖國磚頭遇冷鋒，中字輩又無力，
恆指埋單碌低１６４點報２４１９３；國指就傷Ｄ，瞓低１１５點報１０３６２，全日魚缸總成
交就有８９０億銀左右。
＊特朗普碰壁道指即無力，銀聯限刷卡地主難招積＊
特首選舉噚日投票，林鄭月娥得票７７７張，一於所料當選下屆行政長官。唔少大孖沙早已
表態支持林太，好似恆地（０００１２）主席李兆基就話林鄭係眾望所歸，公司股價今朝就曾經
領漲地產股，不過最後都隨市腳軟，收４８﹒２銀。至於超人愛股長實（０１１１３）就跌多少
少，唔見０﹒５巴仙收５３﹒９５銀。
香江首位女特首將於７月１日正式上台，唔知佢到時會有咩「理財新哲學」，處理市民最關
心嘅土地房屋問題？
雖然瑞信話，銀聯落閘唔畀祖國同胞刷卡買港樓嘅影響有限，但一眾磚頭佬仲係腳軟軟，九
倉（００００４）、新世界（０００１７）碌低１至２巴仙，收６７﹒９５同９﹒６４銀。
＊調控又升級內房鬥腳軟，佳兆業復賽粉絲兜番轉＊
阿爺不斷加大力度控制樓市，上星期京城、廣州、成都等十幾個城市開始限價，京城更加針
對房地產中介執法，有２８間因為涉嫌違規代理等，被責令停業整頓。調控又升級，中海外
（００６８８）趴低逾４巴仙，報２２﹒７銀，仲係全日最曳藍戰士。中海外宏洋
（０００８１）亦跣低６巴仙，報４﹒０３銀。綠城（０３９００）就算上年純利１９﹒２億人
幣急增１﹒４倍，依然要瞓低近１２巴仙，得返７﹒８５銀。
佳兆業（０１６３８）舊年虧損收窄至６﹒１億人仔，佢停賽兩年之後終於復出，結果飆高
近５６巴仙，報２﹒４３銀。
＊美圖蝕得勁股價再碌低，中石化息優抽高尾段曳＊
蝕住錢都照上到市嘅美圖（０１３５７）派咗成績表，上年虧損仲要擴大到近６３億人仔，
真係嚇親人。再睇返美圖當時以招親價８﹒５銀上場，但上年每股基本虧損３蚊，股價同業績完
全背馳，主席蔡文勝仲話股價波動係因為內地投資者買太多貨云云！相就話可以美圖，但成績表
一出就嚇親人，難怪今日又蒸發番近１７巴仙收１２﹒８８銀。
同樣獲北上湧入嘅埃芝芝（００７９９）就曾經試過高見１０﹒５４銀破頂，但高處不勝寒
，之後跟住個市回落番，全日跣低３巴仙，報９﹒７６銀。股王ＱＱ（００７００）今日幾硬淨
，輕輕腳軟唔夠半個巴仙，收報２２４﹒８銀。
中石化（００３８６）上年賺多咗４４巴仙至４６７億人仔，末期息好爽派１７分，仲預測
今年首季會多賺１﹒５倍，開市曾逆市跳高逾２巴仙，但最終都係得番唔夠半個巴仙落袋，報
６﹒２１銀。
＊華晨業績靚飆前來慶祝，同係汽車股長汽向下碌＊
輝山（０６８６３）今日繼續停賽，主席楊凱承認資金鏈斷裂，要透過重組喺一個月內籌
１５０億人仔，平安錢莊（深：０００００２）話輝山個仔有２１億貸款同３４億股抵押，但就
同平保（０２３１８）一樣無持股；平保腳軟近１巴仙，報４３﹒５銀。至於遠東宏信
（０３３６０），就即刻劃清界線，直頭話債同其他業務都無，但跌低近２巴仙，報７﹒３３銀
。
華晨（０１１１４）上年賺多咗超過半成獲多間大行唱好仲升目標價，今日逆風飆前近６巴
仙，報１３﹒５２銀。長汽（０２３３３）賺多咗３１巴仙，但就後退２巴仙，報８﹒８９銀。
中銀香江（０２３８８）賣走集友股權今日交割，炒高至破頂（３２﹒５５銀）後腳軟番，
最終軟近１巴仙，報３２﹒１銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
