《小傳日記》馬克龍先拔頭籌，香江市靜靜高收！

　　《小傳日記》花旗魚缸上星期五（２１日）只係收跌３０點報２０５４７，皆因法國大選投
票之前，缸友都唔敢輕舉妄動。結果，反對「脫歐」嘅中間派候選人馬克龍贏咗首輪投票，而民
調預計５月７號舉行嘅次輪投票，佢可以以逾六成得票，成為史上最年輕嘅法國總統。避險情緒
突然一掃而空，歐元升到去５個月新高，歐洲魚缸岩峒亦急升慶祝。
　　香江魚缸今朝（２４日）開市叨光衝前１４３點，可惜Ａ場腳震碌低逾１巴仙收３１２９點
，影響咗香江市氣氛，加上祖國移動（００９４１）逆市被質低逾１巴仙，令到恆指收市只係有
９７點進帳報２４１３９；雖然收復十天線（約２４１１８），但廿天線（約２４２０７）就得
而復失。國指有內險股頂住，唔使跟Ａ場瞓低，埋單跳起５７點報１０１０７。
　　雖然外圍暫時無咁危險，但係香江都準備迎接季績期，全日魚缸靜蠅蠅，得返約６５５億銀
。

＊法國傳喜訊歐元即抽上，長建與一號同樣氣高漲＊

　　法蘭西總統選舉選情利好歐元走勢，加上花旗走出嚟唱好長建（０１０３８），因為成功收
購袋鼠國ＤＵＥＴ而升佢目標價同埋評級，今日彈高４巴仙，報６６銀；超人一號
（００００１）傳旗下赫斯基同米字國石油互換楓葉國資產，表現亦唔執輸，飛起２巴仙，報
９５﹒０５銀。
　　傳中移動（００９４１）競投獅城電訊商Ｍ１股權，可能要６４億銀咁多，但缸友們似乎唔
多支持，結果唔見１巴仙，報８２﹒８銀。中聯通（００７６２）上季賺多咗７９巴仙去到
８﹒６億人仔，但淨係慢慢行前超過半個巴仙，埋單１０﹒２６銀。

＊中移覬獅城粉絲唔受落，麥記來讚好ＡＳＭ落鑊＊

　　金山軟件（０３８８８）向ＱＱ（００７００）出售遊戲開發商附屬西山居集團３９８２萬
股，ＱＱ另外會再斥８０００萬美金買西山居５﹒５６巴仙權益。附屬泊到ＱＱ呢個大碼頭，金
軟應聲彈高逾８巴仙，報２１﹒９銀。ＱＱ又獲野村維持「買入」評級，「他屐」繼續睇２６０
銀，佢曾經跳起近２巴仙，高見２４０銀破頂，最終就微微收穫唔夠１巴仙，報２３８銀。
　　ＡＳＭ（００５２２）獲麥格理大升目標近２５巴仙至１６２銀，花旗亦唱好叫「買」，讚
後端業務收入同毛利潤勝預期，結果飛起２巴仙，埋單１１４﹒８銀，亦一度創上市新高
１１６﹒２銀添！

＊Ａ仔腳軟軟水泥跣一跣，附屬泊ＱＱ金軟有榮焉＊

　　上海調控樓市又升級，唔畀商辦土地起公寓式辦公同埋酒店，今日班祖國磚頭都無咩心機。
當中，摩通仲踩恆大（０３３３３），指雖然回購可以繼續撐到股價，但就認為佢唔會減少負債
，重申「沽貨」評級。結果恆大碌低近３巴仙，報８﹒７８銀。
　　Ａ場唔掂連水泥股都遭殃，潤泥（０１３１３）首季賺６億按年勁升近９１倍，但缸友似乎
都係唔多滿意，股價碌低６巴仙，報４﹒２６銀；中國建築（０３３１１）首季營業額多咗２１
巴仙去到１０６億人仔，但都要趴低超過３巴仙，報１３﹒８銀；街坊中國建材（０３３２３）
就跟大隊瞓低逾４巴仙，報５﹒１６銀。

＊昂納搞批盪復賽即趴低，摩通又發功賭仔有點翳＊

　　昂納科技（００８７７）折讓近１６巴仙先舊後新配股，淨籌２﹒６２億嚟買互補芯片技術
公司；又花費１９２０萬美金，收購法國激光雷達產品商。可惜缸友唔太受落，佢今日復出缸湖
，即趴低近１２巴仙，得返５﹒４９銀。
　　有報道話，有３名感染退伍軍人症嘅患者曾經去過金沙（０１９２８）旗下巴黎人酒店，金
沙腳軟近２巴仙，報３５﹒４５銀。摩通又踩多腳話，賭股再大幅走高嘅機會唔大，未必保得住
收入快速增長嘅趨勢，新濠國際（００２００）評級降至「減持」，瞓低逾４巴仙，報１５銀。
銀娛（０００２７）亦碌低近２巴仙，收報４１﹒５銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。