行業新聞

23/05/2017 17:21

《小傳日記》炒股不炒市,賭仔有戰意!

  《小傳日記》噚晚花旗魚缸又造好已經連升三日,道指收漲89點報20894,逐步向返
二萬一關進發。不過今朝(23日)就發生咗不幸事件,米字國曼徹斯特演唱會發生爆炸,警方
已列為恐襲,至今死亡人數增加至22人,有近60人受傷;唉,真係聽到都令人心痛,願死者
能早日安息!
  外圍發生恐襲,唔多唔少影響咗香江魚缸氣氛,恆指輕微高開後曾經試過倒跌約10點;雖
然有股王QQ(00700)同中資金融股頂住,但整體表現都係呆呆滯滯。恆指最後埋單只係
升起11點收場,報25403;國指就仲有20點進帳收10395。全日魚缸總成交約
848億銀。
 
*阿爺愛保保平保確是寶,富瑞升目標招行高高高*
 
  呢排資金開始轉買中資金融股,皆因阿爺話會支持保險投資重大工程,仲話當前保險業風險
可控;雖然溫馨提示多一句話,唔可以低估局部風險云云。平保(02318)今日就試闖
50銀大關,去到49﹒5銀;雖然埋單只係穩收48﹒5銀,但其實今個月就已經累升最多
13巴仙喇!街坊國壽(02628)兩連升後今日都曾升抵25﹒65銀創約年半高位,收市
就報25﹒05銀。
  至於一班祖國錢莊就各走各,當中招行(03968)表現最勁,獲得富瑞升目標至
38﹒5銀,維持買入評級,刺激招行又急漲近4巴仙收22﹒8銀。但其他街坊就無厘神氣,
四大行基本上都無咩郁動。
 
*QQ280高處不勝寒?通達忽被掟澄清快又爽*
 
  股王QQ(00700)日日破頂,已經唔係咩新鮮事喇!今日又成功上到去280﹒6銀
,將山頂位再向上推高。之不過,始終升咗咁多日,去到高位回返D落嚟都好正常,所以中午之
後,就曾倒跌去番271﹒8銀,但好快見買盤湧出嚟托一托;最後以275﹒2銀完場,執返
身彩!
  另一邊廂,繼瑞聲(02018)同科通(00400)被狙擊而停牌後,今日通達
(00698)亦一度成為洗倉對象急插逾19巴仙。不過,今次就唔關沽空機構事,而係有風
聲指,通達客仔華為同Oppo突然減少訂單云云。公司今次應變得好快,即刻出嚟否認傳聞,
又出通告話考慮進行回購,又開埋分析員會議解畫;總之就強調業務正常,最後通達跌幅大大縮
少至一成收2﹒38銀。
 
*媽媽或賣仔環彩飆呀飆,野村來祝福賭仔在歡笑*
 
  新濠環彩(08198)宣布,阿媽新濠國際(00200)話可能出售所持公司嘅全部股
權,家陣仲係商量嘅階段,批股份佔公司已發行股本約41巴仙,目前就仲未訂立具法律約束力
嘅協議。如果新濠國際出售全部股權,買方就要作出全面收購要約,消息推高阿仔新濠環彩25
巴仙,埋單計報0﹒43銀。而阿媽亦都飛起9巴仙,報19﹒6銀,盤中一度高見19﹒68
銀創逾兩年半新高。
  賓架野村就話馬交(Macau)過去一星期賭收按周升兩成六,並指美高梅
(02282)估值吸引,不過美高梅只有近1巴仙進帳,而街坊銀娛(00027)、金沙
(01928)就分別飄起4巴仙同1巴仙,報42﹒8銀、34﹒65銀。  
 
*惠理今復牌趁消息出貨,師傅遇沽壓241波動*
 
  之前有風吹出話惠理(00806)主要股東謝清海,同海航集團磋商,話打算出售惠理股
權。公司就宣布,謝清海同葉維義確認獲獨立方洽購股權,公司今日復賽,股價反而回落逾4巴
仙,報7﹒51銀。
  康師傅(00322)第一季純利4﹒3億人仔,按年上升15巴仙唔派息,不過公司毛利
就下跌7巴仙,結果股價亦質低逾3巴仙,報9﹒4銀。
  阿里健康(00241)早前話注資買兩間醫療信息軟件商嘅權益,連飛多日之後今日股價
坐過山車,曾經飛起逾14巴仙去到4﹒89銀,不過之後腳軟跣低返逾1巴仙,報4﹒22銀
。同系海爾電器(01169)亦見到買盤,埋單計有2巴仙落袋,報19﹒6銀。請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式
       之申述或訂立任何建議及推薦,讀者務請運用個人獨立思考能力自行作出投資
       決定,如因相關建議招致損失,概與《經濟通》、編者及作者無涉。

全新etnet健康網購,送你【健骨維他命D3(1000IU)】乙樽(價值$108)► 立即行動!

專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力