《小傳日記》細價股洗倉風暴，魚缸高開後回吐

　　《小傳日記》外圍魚缸噚晚（２６日）普遍造好，今朝呢邊魚缸高開３９點。不過，聯儲局
揸Ｆｉｔ人耶倫將會喺聽朝（２８日）凌晨有嘢講，「孖屐」都觀望吓會唔會有加息提示，加上
食晏前突然爆發細價股洗倉潮都影響魚缸氣氛，中午收前居然有超過廿條魚毛仔跌幅超過兩成，
而且有唔少係蒸發八、九成以上，情況仲慘烈過股災，極之恐怖！
　　雖然魚毛仔兵敗如山倒，但好在藍戰士們只係略為回吐。恆指全日只係倒跌３１點，收報
２５８３９點；國貨佬就腳軟３２點，報１０４９８點。全日主板成交有７２５億銀，多過噚日
６巴仙。
　
＊洗倉洗到慌睇見頭擰擰，集成與漢華暴插逾九成＊
　
　　今日喺細價股風暴中中招嘅，原來有好多都係早前「股壇長毛」Ｄａｖｉｄ　Ｗｅｂｂ一早
５月中嗰陣提過；當時Ｗｅｂｂ提出嗰５０隻股票可能涉及莊家網絡，結果今日嚟個「火燒連環
船」，話唔定係集體斬倉都唔出奇！
　　全日跌得最甘嘅頭５隻都喺Ｗｅｂｂ名單中榜上有名，瀉得最轟烈嘅係中國集成
（０１０２７）同埋漢華（０８１９３），分別唔見９４巴仙同９３巴仙，各報０﹒０１６銀同
０﹒０６４銀。另外翠如ＢＢ隻聯旺（０８２１７）、美捷匯（０１３８９）同埋匯隆
（０８０２１）都重創八成以上，認真駭人！
　
＊中銀再破頂可惜我無貨，摩通睇得牛ＱＱ有團火＊
　
　　大摩早排將中銀（０２３８８）「他屐」大升至４６銀，估計未來３年會受惠貸款強勁增長
同淨息差擴張。自從摩笛響起之後，中銀升也升不停，今日再飛起逾１巴仙，收報３７﹒４銀，
仲一度破頂高見３８銀。街坊們就兩邊走，大新金融（００４４０）企高逾１巴仙，報
６３﹒６５銀；東亞（０００２３）就腳軟近１巴仙，收３３﹒４銀。
　　ＱＱ（００７００）都有摩通力撐，預期今年整體遊戲收入會增長三成半，目標上調到
３２０銀！ＱＱ應聲彈高逾１巴仙，埋單２８８銀，亦一度上到２８８﹒４銀歷史新高插旗。手
遊魚仔就冇咁好彩，第一視頻（０００８２）、博雅互動（００４３４）趴低近６同４巴仙；互
娛中國（０８０８１）更插近１４巴仙，得返０﹒０２５銀。
　
＊野記來唱淡ＡＳＭ腳軟，中金大力撐吉利飆返轉＊
　
　　瑞聲科技（０２０１８）獲華泰護航予「買貨」評級，升目標價到１１２銀，瑞聲曾經衝番
上百元大關，高見１０１﹒５銀，全日飛起近２巴仙，９９﹒１銀埋單，勁！
　　ＡＳＭ太平洋（００５２２）就冇咁好彩，被野村唱淡予「沽貨」評級，目標價９０銀，比
今日收市價仲要低近１９巴仙。ＡＳＭ一度直插落１０９﹒４銀，十天、廿天以及五十線統統不
保，埋單跌２巴仙，報１１１銀。
　　砵砵車吉利（００１７５）下個月１８日起改每手買賣單位為１千股，吉利副總裁仲話
ＳＵＶ車型受歡迎到供不應求，吉利獲中金大力推薦，畀２０銀目標價，全日因此衝前４巴仙，
埋單１６﹒１６銀。
　
＊最叻國貨佬缸友愛太保，萬科搞邊科今天不風騷＊
　
　　早前被沽空機構轟炸嘅科通芯城（００４００），市場曾傳過第二大股東姚怡喺６月１日被
「斬倉」，今日股價又再腳軟１１巴仙，報４﹒０９銀，盤中一度低見３﹒８８銀，創兩年半低
位。
　　萬科（０２２０２）就發出咗不明股價升因，表明唔知道Ａ仔（深：０００００２）股價點
解會３日累升兩成半，事關深圳地鐵同鉅盛華都無重大事項要披露；結果今日呢邊就係咁易跣低
約１巴仙，報２２﹒１銀。
　　至於太保（０２６０１），賓架野村話公司管理層最新指引正面，維持公司「掃貨」評級，
麥格理亦話公司業務能力好，孖屐低估咗公司價值，目標價睇到４１銀，今日跳起近５巴仙，報
３２﹒２５銀，做埋今日最叻國貨佬，勁！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。