《小傳日記》道指噚晚（２４日）唔見６６點，今朝香江魚缸微微高開唔夠１點，其後試過
升４２點高見２６８８９，再創超過兩年高位；但缸友們似乎都等緊聯儲局嗰邊議息，大市未見
有明確方向。議息結果將會喺周四（２７日）２：００ａｍ公布，市場普遍預期今次唔會咁快加
息住。今日魚缸只係上上落落，波幅只有８９點；全日最終微升５點，收報２６８５２點。
Ａ場報３２４３點，收跌６點；國貨佬就腳軟３８點，報１０７８２點。
缸外熱到爆，缸內悶到爆，全日主板成交只得７９６億，同噚日差唔多。
＊缸邊靜蠅蠅等聯儲議息，瑞聲出澄清大和在給力＊
大象（００００５）今日好勁，有券商預計大象會加推回購。大象嚟緊下周一３１號就放榜
，係咪加推回購好快就知，但見買盤湧入搶定先，令大象變飛象跑前２巴仙，收報７６﹒７銀，
創埋近九年新高！
有傳喺渣打（０２８８８）香江分行長駐嘅保誠保險銷售人員將會解散，受影響約１２０個
員工改由渣打全數接收。渣打飛起逾２巴仙，報８４﹒８銀。
瑞聲（０２０１８）早前有分析師實地考察公司，之後有風指公司透露第二季增長減慢，瑞
聲而家就澄清話無提過，賓架大和即刻唱好，將瑞聲目標價升到１２１銀。瑞聲扭轉過去兩日累
跌１５巴仙嘅命運，反彈逾１巴仙，報１０６﹒５銀。
股王ＱＱ（００７００）朝早繼續造好，股價今日曾破頂高見３０４﹒８銀，不過埋單要回
回氣，報３０１﹒６銀。
＊大象九年高博回購風騷，融創搞批盪被質有點糟＊
神州磚頭佬融創（０１９１８）噚日先話完現金流好緊要，轉頭隨即折讓近９巴仙配股抽水
，缸友唔賣帳掟貨走人，搞到融創今日急插超過７巴仙，報１８﹒６銀。
恆大（０３３３３）獲德銀唱好，「他屐」由７﹒２９銀升去１５﹒６５銀。雖然都仲係比
現價低，但今日表現唔錯曾經最多彈高咗近４巴仙兼破頂，高見１８﹒０４銀，埋單就升咗近２
巴仙，報１７﹒７銀。
有報道話萬科（０２２０２）有份參與競投大馬磚頭項目，項目開發成本大嗱嗱成１１７億
美金，缸友好似唔多睇好，萬科全日跣低超過２巴仙，報２２﹒１銀。
＊細摩畀個讚招行好招積，巨濤發盈喜和電無乜力＊
內地錢莊招行（０３９６８）出半年業績快報，按年賺多咗１１巴仙去到近３９３億人仔，
摩通就話佢半年盈利好過預期，重申「增持」評級，結果佢今日跑前近３巴仙，收報２５﹒５５
銀，高見２６﹒４銀破頂，係最叻國貨佬。
和記電訊（００２１５）半年少賺一成得返３﹒２億，派３﹒９仙，缸友嫌佢派得少過上年
同期（派４仙），搞到佢趴低２巴仙，報２﹒９８銀。
油服股巨濤（０３３０３）估上半年會由虧轉盈，主要因為聯營公司上半年可能賺到錢，喺
油價湧起超過１巴仙嘅背景下，巨濤彈起近６巴仙，報２﹒６４銀。
＊鐵鳥急急降好孩子領放，大摩來踐踏中煤不太爽＊
官府今日公布高鐵「一地兩檢」詳情，睇返港鐵（０００６６），個價無甚反應。再睇下一
眾鐵鳥，就紛紛借Ｄ意降落，跌超過２％。
中煤能源（０１８９８）估上半年賺１５億至１８億人仔，按年大增，但大摩心水好清咁話
盈喜反映第二季盈利按季有所放緩，搞到佢跪低近４巴仙，報３﹒９１銀。大摩比較睇好神華
（０１０８８），佢就跳起超過１巴仙，報１９﹒３８銀。
好孩子（０１０８６）用超過２８億收購母嬰護理用品及服裝產品品牌，大部分代價仲會溢
價發股找數，結果佢飛起一成，收報３﹒６１銀。
另一邊廂，佳寧娜（００１２６）以８億人仔賣走湖南物業發展項目，雖然預期會蝕１億，
但復牌後仲係衝前２巴仙，收報０﹒９１銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情
