行業新聞

13/03/2018 17:45

《小傳日記》魚缸悶市內銀卻風騷,農行抽水千億最多讚!

  《小傳日記》花旗國魚缸噚晚(12日)個別發展,道指因為工業股無力,回番157點收
報25178,不過科技股力撐,納指成功再創新高,收漲27點報7588點。
  花旗國兩邊走,無大方向,不過唔緊要,香江魚缸今日(13日)都大把新聞,焦點落晒喺
中資金融佬身上。先係農行(01288)計劃發A股籌集千億銀,創祖國增發股份之最,繼而
係阿爺決定將中銀監同中保監合併,兩單大消息夠晒震撼。
  雖然有農行帶領祖國錢莊衝前,不過香江魚缸都仍然Chok到暈,開場微跌24點後,曾
經碌低132點去到31461,之後又忽然回勇,反彈番115點至31709。忽高又忽低
,缸友頭都大晒。好彩,好友喺U盤時段贏咗個馬鼻,恆指微升7點收報31601;國指有錢
莊頂住,跑贏大市,收漲49點報12746。
  魚缸股不炒市,全日成交無太大變動,約有1102億銀。

*農行有消息突然籌千億,街坊叨叨光中行士氣壯*

  農行噚日收市之後公布2017年業績快報,話舊年少少哋賺多咗5個巴仙,淨息差就增加
咗3點子,不過呢個都唔係重點,皆因該行另外宣布,董事會已經批准非公開發行A股,計劃募
集資金規模不超過1000億人仔,係祖國A股增發之最,仲要有國家隊接貨!唔少大行好似中
金同大摩都覺得係正面消息,難怪農行開心跳起逾5巴仙,報4﹒71銀,係是日最好表現國貨
佬。
  另一方面,連阿爺都話支持商業錢莊資本工具創新,擴大補充資本渠道。其他內銀佬普遍都
做得唔錯,建行(00939)同工行(01398)各衝前1巴仙,分別報8﹒59銀及
7﹒13銀;中行(03988)都彈起近2巴仙,報4﹒44銀,係最勁藍戰士。

*銀監併保監風險誓要減,平保腳仔軟新保亦心酸*

  「兩會」又有新消息出台喇,大家最關心嘅金融層面都有份。阿爺今朝就發表機構改革報告
,表示要整合中銀監同埋中保監,組建中國銀行保險監督管理委員會,主要嘅職責係跟住法律同
法規,統一咁監察管理銀行業同保險業,防範同化解金融風險。
  內銀佬今日表現唔錯,不過內險佬就普遍都腳軟軟。平保(02318)碌低0﹒5巴仙,
報86﹒4銀;新保(01336)瞓低近2巴仙,報46銀;太平(00966)跌低0﹒5
巴仙,報30﹒45銀;國壽(02628)最尾就飛返起0﹒4巴仙,報23﹒5銀。

*大摩升目標小象開心跳,電訊佬捱沽聯通最痛苦*

  雖然本地錢莊嘅走勢唔夠神州錢莊勁,但係小象(00011)喺上個月頭嘅低位
171﹒9銀開始跟隨魚缸跳彈床,而且到依家仲維持喺升軌上面,走勢遠比佢阿媽大象
(00005)省鏡。小象仲畀大摩「摩笛」唱好,「他屐」由220蚊升至240蚊,維持
「增持」,缸友好收貨,小象全日跳起近1巴仙,報191﹒2銀,由上個月低位計,反彈超過
11巴仙。
  國務院總理李克強曾經話過,神州手機上網費用貴,三大電訊佬收到風後都好識做不斷減價
,李克強喺兩會期間仲要求佢地要繼續減價,一哥神州移動(00941)早前曾搶先被缸友掟
貨,一度低見70蚊。雖然之後有唔少缸友撈底,但喺減價嘅大環境下,「孖屐」已經唔多睇好
三大電訊大佬表現,大和今日仲降低佢地今明兩年嘅收入預測兼「他屐」,再加埋大摩都出手唱
淡,搞到祖國移動又再一次插水,全日跣低超過1巴仙,報71﹒7銀;中電信(00728)
同樣跌咗超過1巴仙,報3﹒4銀;中聯通(00762)就最重傷,跣低近兩巴仙,報
9﹒64銀。
  創板魚毛百田石油(08011)話喺菲律賓發現咗幾個油氣層,搵到石油就如同搵到金礦
一樣,百田石油坐火箭最多爆升2﹒4倍,高見0﹒51銀,但距離十年前有多嘅歷史高位
13﹒18銀真係差天共地,最後埋單都升咗1﹒6倍,報0﹒39銀。

*藥股好反覆尾市向下碌,好消息散貨金斯瑞急挫*

  金斯瑞(01548)舊年9月前都一直喺低位潛水,但自從旗下醫癌症嘅第四代細胞免疫
療法技術取得進展,加上又同時喺神州少數有呢項技術嘅公司,有關技術概念喺舊年8月開始被
「孖屐」炒起,金斯瑞自然成為缸友掃貨對象,單係舊年9月到依家已經爆升近3倍,勁!金斯
瑞今日又有好消息,話獲神州藥監局批准就呢項癌症療法進行臨床試驗,亦即係話佢呢項技術又
向前邁進一步,今日下半場一開市就即刻最多爆升超過8巴仙至31﹒45銀,但高處不勝寒,
隨即有唔少缸友喺高位「食胡」走人,最終埋單急插近9巴仙,報26﹒5銀,由高位計就倒跌
近16巴仙。
  中生製藥(01177)雖然繼續畀野村睇淡,維持「掟貨」評級,但今朝都仲有得升,而
且仲喺最新山頂位16﹒06銀插旗,但好快就喺高位碌落嚟,最終全日倒跌超過2巴仙,報
15﹒22銀。石藥(01093)今個月開始成為國貨佬指數嘅一份子,呢位新丁氣勢相當強
勁,上個禮拜仲成為升幅最勁嘅國貨佬,噚日仲要破埋頂,但升得咁勁都係時候要唞唞,今日就
跣低近1巴仙,報19﹒38銀。請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式
       之申述或訂立任何建議及推薦,讀者務請運用個人獨立思考能力自行作出投資
       決定,如因相關建議招致損失,概與《經濟通》、編者及作者無涉。

全新【etnet健康】專頁登場喇!立即成為Fans獲得最貼身實用嘅健康資訊! http://fb.me/health.etnet.com.hk
產品簡介

【得獎名單】【etnet x i-access】第三屆聯大投資比賽 即答即賞200份獎品

【etnet x 雅虎香港】美國三藩市TechCrunch Disrupt即睇即答贏獎賞

【DIVA Channel 4周年‧Beautiful Soul】For Fans 西洋書法工作坊