行業新聞

22/06/2018 17:48

《小傳日記》曾穿牛熊線,有驚暫無險;憧憬降存準,好友反擊戰?

  《小傳日記》外圍魚缸繼續受貿易戰影響,道指再走低196點,當然都拖累埋香江魚缸,
今朝(22日)一開市就跣低80點報29215,失守牛熊線(約29296),淡友氣勢如
虹,最多推低大市206點至29089,創埋今年新低,慘。
  好彩阿爺喺大廳,孖屐傳出中央最快聽日(23日)降準,A場調頭收升0﹒5巴仙報
2889。氣氛稍為緩和咗D,香江下半場都趁機扭轉跌勢,倒漲最多140點至29436,
但係收市前無力,最終只得42點進帳,收29338,但都重上返牛熊線,真係有驚無險?不
過,中資金融佬都係無反應,唔係好受降準消息刺激,結果國指都要唔見24點報11339。
全日成交逾990億銀。
  不過老實講,今個月魚缸實在跌得太多,想全數收復返近日失地,睇嚟都無咩可能。但至少
去返5月尾嘅水平,即係30469點水平,咁都可以擺脫「六絕月」呢個宿命呀!

*AIA精神QQ仍腳震,無懼是與非港鐵高高飛*

  魚缸無晒方向,觀望態度勁濃,重磅佬都無咩動靜,股王QQ(00700)呢排喺400
蚊水平浮沉,就連大摩奏摩笛讚QQ喺5月份手遊業務改善,維持增持評級,但都唔係好幫到
QQ,收市只係微微升0﹒2巴仙報397﹒4銀,上唔到400銀關。
  反而AIA(01299)反彈力就勁D,今日去到100天線(約67﹒3銀)就見支持
,向上跳起逾1巴仙收68﹒6銀添。大象(00005)都努力向上衝,由全日最低位
73﹒75銀,去返74﹒4銀平手完場,都算叻哦!
  不過,今日最巴閉嘅藍戰就非港鐵(00066)莫屬,雖然呢排有好多醜聞,搞到佢都好
頭痕,但係野村就唱好,話預計下半年起可以復甦增長,升評級至買入,兼上望50銀添!港鐵
開心到升足全日,收漲逾3巴仙報43﹒45銀,做咗第二威嘅藍戰。
  恆安(01044)做咗今日藍戰升幅一哥,收漲逾3巴仙報78﹒55銀,或有資金流入
基本消費股避險有關。

*半年結就到水緊好懊惱,憧憬快降準錢莊有運行?*

  臨近半年結,再加上中港兩地都有新丁上場,令到孖屐愈來愈水緊,而噚日野村就預計,阿
爺最快聽日會降準,如果真係,靜咗一排嘅內地錢莊一定係最開心喇!睇返公仔圖,其實喺6月
份,幾位錢莊大阿哥,建行(00939)、工行(01398)、中行(03988)同埋農
行(01288)大約唔見5至逾7巴仙,相對魚缸唔見近4巴仙,真係明顯跑輸。今日四位大
佬都仲係腳軟軟,跌不足1巴仙,分別收7﹒38銀、6﹒03銀、3﹒90銀及3﹒77銀。
  而官媒就引述分析人士話,定向降準等貨幣政策,最快一個星期內由央行正式宣布,並且喺
第三季生效。咁咪即係最快7月1號香江回歸日?

*舜宇急澄清高愜佬薦即升,中興有眉目可逃離地獄*

  舜宇(02382)噚日受到利潤率下跌憂慮影響,重挫9巴仙。公司收市後,拿拿臨出澄
清通告,話最近的確有進行反向路演,但只係披露市場發展嘅資料,但無列明有關公司銷售收入
、毛利率同盈利預測數字。再加上今日有高佬維持188銀目標,續列為確信買入,舜宇收市收
復返DD失地,行前逾2巴仙收145﹒9銀。
  中興(00763)(深:000063)A仔就慘到無朋友,連續第七日跌停,好彩香江
呢邊都識得升吓,今日中興H仔收市又試衝前逾1巴仙報11﹒86銀。原來,花旗國商務部最
新消息話,有機會同中興問題達成妥協,並畀佢繼續喺當地做生意,但係強調,如果中興有更多
違規,花旗國要中興關門!

*燃氣佬跳舞新奧獲讚好,細摩升目標重汽開心笑*

  魚缸浮浮沉沉緊,缸友就搵唔受貿易戰影響嘅板塊炒,燃氣佬就受到強勁追捧,當中,潤燃
(01193)急升逾6巴仙收32﹒05銀,仲試過喺32﹒85銀山頂位插旗;街坊新奧
(02688)最近更獲多間大行唱好,野村更讚佢係行業首選,目標價高達93銀!難怪今日
大反擊抽高逾7巴仙收81銀喇,距離目標價仲有近15巴仙水位!
  仲有重型機械佬都成為新寵兒,中國重汽(03808)獲摩通升目標價至15銀,全日由
頭升到落尾,亂市都無有怕,喺14﹒92銀最新山頂位插旗,差DD就到咗摩通目標價喇!埋
單就縮番DD,收漲近8巴仙報14﹒9銀,勁。周末愉快,請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式
       之申述或訂立任何建議及推薦,讀者務請運用個人獨立思考能力自行作出投資
       決定,如因相關建議招致損失,概與《經濟通》、編者及作者無涉。

全新etnet健康網購,送你【健骨維他命D3(1000IU)】乙樽(價值$108)► 立即行動!

專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力