《小傳日記》米字國未議脫歐，香江後市惹擔憂？

　　《小傳日記》米字國首相文翠珊押後原定當地星期二舉行嘅脫歐協議表決，加上華為事件又
持續醞釀，令中美貿易爭端急急升溫，道指隔晚（１０日）仲一度肚瀉式咁走低５０７點，不過
之後喺科技大佬反彈嘅帶動之下，最終倒升３４點，報２４４２３點。香江今日（１１日）跟住
花旗國低開１２８點或０﹒５％之後跌幅收窄，午後ＱＱ再發功，加上藥佬中生製藥
（０１１７７）同埋石藥（０１０９３）今日絕地反擊彈高高，香江全日僅僅走高１９點，報
２５７７１點。主板總成交近６５１億銀減少近８巴仙。
　　國貨收報１０２４５點，走低２８點，或０﹒２７巴仙。滬指就收報２５９４點，升９點，
成交８５４億人仔。

＊麥格理唱好中聯通走高，手機設備佬隻隻都喺寶＊
　　
　　香江重磅藍戰士今日向左走向右走，ＱＱ（００７００）走高１巴仙，報３１１﹒２銀。
ＡＩＡ（０１２９９）同生發發（００３８８）分別走高唔夠１巴仙，報６２﹒３５銀同２２７
蚊。
　　上星期五（７日），三大運營商已經攞咗全國範圍５Ｇ中低頻段試驗頻率使用嘅
Ｐｅｒｍｉｔ。今日中資電訊大佬們個別發展，祖國移動（００９４１）跌近２巴仙，報
７５﹒７銀。中電信（００７２８）今日獲麥格理維持１２蚊「他屐」，仲畀咗個跑贏「孖屐」
評級過佢，全曰升唔夠１巴仙，報３﹒９４銀。中國鐵塔（００７８８）無升跌，報
１﹒２８銀。
　　祖國福州市人民法院裁定蘋果侵犯高通兩項專利，仲唔畀蘋果喺祖國賣「唉瘋Ｘ」等７款舊
型號嘅手機，其中，「唉瘋」仲佔蘋果整體收入嘅三分二。手機設備佬今日好有氣勢，齊齊向上
走高，舜宇（０２３８２）好叻豬，全日升超過６巴仙，報７３﹒８銀，係最勁嘅藍戰士。丘鈦
（０１４７８）跟升４巴仙，報４﹒４銀。比亞迪電子（００２８５）同瑞聲（０２０１８）齊
齊走高近３巴仙，報１０﹒６４銀兼５１﹒９銀。通達（００６９８）升２﹒４４％，報
０﹒８４銀。

＊長和創新低尾市唔失威，博彩收入揚賭股喜洋洋＊

　　文姨姨（文翠珊）係米字國搞到一鑊粥，有過半數議員仲討論緊希望進行「二次公投」，有
傳文姨姨決定延遲脫歐嘅投票安排，之後唐寧街首相府發言人話投票將會繼續進行，小傳真喺
「傻傻分不清楚」；另一邊廂，歐洲法院畀咗個大優惠，就係米字國可自行撤回退出歐盟決定，
今日同米字國相關嘅股份榮辱互見。長和（００００１）盤中低見７５﹒０５銀創近兩年半新低
後反彈近２巴仙，報７７﹒２５銀。電能（００００６）跌唔夠半巴仙，報５２﹒９５銀。渣打
（０２８８８）一樣跌半巴仙，報５８﹒１５銀。大象（００００５）微微碌低唔夠１巴仙，報
６３﹒３５銀。思捷（００３３０）唔見咗逾１巴仙，報１﹒７２銀。
　　霉咗一排嘅濠賭股終於有返小小起色，大行Ｂｅｒｎｓｔｅｉｎ調查指出，馬交１２月頭九
日賭收較去年同期高６巴仙，分析師預料整體１２月賭收較去年同期升最多一成，按月平均增長
２巴仙咁話。永利馬交（０１１２８）今日漲升近２巴仙，報１８﹒３２銀。銀娛
（０００２７）升逾２巴仙，報５０﹒６銀。金沙（０１９２８）升近２巴仙，報３５﹒４５銀
。美高梅（０２２８２）升近３巴仙，報１３﹒７６銀。

＊人幣又反彈內房卻心煩，酒價更加貴潤啤唔閉翳＊

　　今日人民幣中間價又跌３００點子，下午在岸人民幣突然反彈升近２００，內房今日一樣捉
摸唔到。恆大（０３３３３）今日跌０﹒６巴仙，報２４﹒８５銀。碧桂園（０２００７）升逾
１巴仙，報９﹒１６銀。中海外（００６８８）跌近１巴仙，報２５﹒７５銀。至於早前換
ＣＥＯ嘅潤地（０１１０９）今日升近０﹒２巴仙，報２８﹒１５銀。融創（０１９１８）升逾
１巴仙，報２５﹒５銀。
　　大摩就發表Ｒｅｐｏｒｔ表示，祖國消費者將轉向更高價嘅啤酒，預料相關公司更有條件從
中得益，產品升級將推動２０１８至２０２０年嘅平均銷售價格，年成長率仲會高達６巴仙。一
聽到呢個咁開心嘅消息，潤啤（００２９１）立即飛高３巴仙，報２７﹒８５銀。另外，青啤
（００１６８）升近半巴仙，報３０﹒６銀。旺旺（００１５１）跌近２巴仙，報５﹒３３銀，
盤中低見５﹒３１元，創逾１４個月新低，仲要係最差藍戰士，慘！

＊羽絨涉抄襲布衣五連塌　壇金六連漲缸友唔惆悵＊
　　
　　做潮流衫嘅江南布衣（０３３０６）今日好慘，事源被指佢再一次捲入抄襲風波，旗下
ＪＮＢＹ品牌嘅一件羽絨，涉嫌抄襲祖國天貓Ｎｅｗ　Ｙｏｒｋ時裝周發表嘅其中一件作品，江
南布衣今日最多跌超過９巴仙，低見１０﹒９２銀，但收市跌勢收窄，最終只係唔見３巴仙，報
１１﹒７銀，並且已經連插五日，唔見咗超過１８巴仙！
　　另一邊廂，早幾個月神州波鞋一哥安踏（０２０２０）已經講緊收購芬蘭體育Ｂｒａｎｄ　
Ａｍｅｒ　Ｓｐｏｒｔｓ，而最近終於有風聲傳出，不過富瑞就話呢單「刁」，可能會對公司派
息有負面影響，令安踏繼噚日唔見１巴仙後，全日低收半巴仙，報３５﹒８５銀，算係咁喇！
　　合和（０００５４）私有化都算係今個月魚缸嘅大新聞，今日再傳獲第二大基金股東支持，
令到合和今日走高３巴仙，報３３﹒７５銀。
　　魚缸繼續悶局無咩肉食，但金價近日反彈，買咗壇金礦業（００６２１）嘅缸友就賺到笑呵
呵，連升第六日，用今日高位０﹒１０１銀計漲逾一倍，兼創逾一年新高，今日升一成一，報
０﹒０９銀。請請！
　　　　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。