《小傳日記》花旗國嗰邊隔晚傳嚟壞消息，有報道指花旗國擔心神州喺多個貿易領域上唔再
讓步，令隔晚花旗國魚缸表現反反覆覆，三大指數除咗納指有得升，其餘道指同標指都要跌。
香江魚缸靠貿易戰炒咗兩個幾月，今日都要借勢回一回，終止四連升。不過，缸友始終都等
緊ＱＱ（００７００）業績，跌勢都唔係話好大，全日波幅都係１８４點，今日就先低開１０９
點報２９３５７點，其後最多跌２１５點，但好快就有承托，之後最多亦試過收窄跌幅到３０點
，最終全日收報２９３２０點，跌１４５點或跌近半巴仙，主板成交１０３１﹒６９億銀升近
４巴仙。國貨方面就報１１６２４，跌半巴仙或跌６１點。
神州方面就跌唔落，上證收報３０９０，跌不足１點，全日成交逾３４９２億銀人仔。
大隻藍戰士方面，聽日放榜嘅ＱＱ有傳佢會夥拍其他財團競購淡馬錫所持有嘅一成屈臣氏股
權，不過大家嘅重心仍然喺佢嘅業績上，全日表現就平平淡淡，埋單無升跌，收報３７０銀；相
反屈臣氏嘅大股東一號仔長和（００００１）績前就升近３巴仙，報８２﹒５銀。ＡＩＡ
（０１２９９）報完業績開始整固，全日唔見１巴仙，報７７﹒５銀。生發發（００３８８）
今日跟住魚缸回落，唔見近２巴仙，報２７４銀。大象（００００５）跌近半巴仙，報
６５﹒０５銀。神州移動（００９４１）升兩亳半子，報８７﹒２５銀。
中生製藥（０１１７７）噚日炒高約半成，今日回吐逾３巴仙收７﹒１３銀，為跌幅最大藍
戰士，中生今日中午發盈喜料年度盈利大增亦幫補唔到股價。相反，恆安（０１０４４）噚日公
布業績合預期，股價回吐逾２巴仙，今日來過大幅反彈逾半成收６８﹒６５銀，成為全日升幅最
大藍戰士，皆因唔少大行報告維持唱好評級。
＊舜宇業績弱股價又再削，碧服業績索街坊齊唱和＊
舜宇（０２３８２）早前已經出咗盈警話公司盈利會出現倒退，好啦出咗業績，去年純利跌
一成四咁多，但大行野村就依然為佢護航，話暫時維持投資評級「中性」同「他屐」８３銀不變
，今日股價最低見過９０﹒１銀急挫逾７巴仙，但埋單計數跌幅收窄到近２巴仙，收報
９５﹒６銀。瑞聲（０２０１８）就同樣跌２巴仙，收報４５銀。另外，比亞迪電子
（００２８５）走低１巴仙，報９﹒８４銀。丘仔（０１４７８）插近４巴仙，報６﹒４９銀。
鴻騰精密（０６０８８）微升半巴仙，報３﹒８４銀。
噚日碧桂園服務（０６０９８）同中海物業（０２６６９）派成績，前者全年多賺１﹒３倍
，今日股份又再落鑊炒起，收漲一成二，報１３﹒９６銀；後者年度亦多賺三成一，今日股價升
亦超過５巴仙，報３﹒１３銀。兩股表現咁好連帶其他物管佬都一齊起飛，佳兆業物業
（０２１６８）漲超過３巴仙，報８﹒９４銀；雅生活服務（０３３１９）急彈近６巴仙，報
１３﹒５４銀；彩生活（０１７７８）亦升近２巴仙，報５﹒２銀。
＊吉利明放榜回吐難上闖，內房業績勁股價唔定性＊
吉利（００１７５）聽日派成績，但大家都已經有晒心理準備，因為神州汽車銷售銷售都遇
上寒冬，所以大家都無咩精神，而且富豪、奔馳等車企都開始喺神州玩減價戰，所以股價都有下
調空間。吉利今日跌多過２巴仙，報１４﹒１銀。華晨（０１１１４）跪低近２巴仙，報
７﹒４５銀；比亞迪（０１２１１）逆漲逾半個巴仙，報５０﹒４銀。廣汽（０２２３８）同長
汽（０２３３３）齊齊跌逾１巴仙，分別報９﹒１４銀同５﹒５６銀。
業績好撞正魚缸回落都幾慘啊，講緊嘅係今日幾間收到成績表嘅內房佬，好似中海外
（００６８８）業績都好過預期，但係股價都係插水２巴仙，報２９﹒９５銀。雅居樂
（０３３８３）全年多賺１８巴仙，股價依然跌近２巴仙，報１２﹒３８銀。富力地產
（０２７７７）就弱喇，全年少賺六成兼核心盈利亦唔合「孖屐」預期，所以股價試過插水近
４巴仙，不過埋單竟然無升跌收報１６﹒９２銀！金茂（００８１７）年度純利升三成一，表現
跑贏其他街坊，股價急急升近７巴仙，報４﹒７９銀。碧桂園（０２００７）表現靠穩，收市微
微踢高近１巴仙，報１２﹒１２銀。
＊業績低預估小米慘捱沽，龍源業績愁電力股各走＊
美團點評（０３６９０）今日係上市半周年日子，同時都意味住禁售期完結，喺舊年全年蝕
超過千億銀人仔嘅情形下，開市即捱沽，就算匯證維持佢嘅「買貨」評級都救佢唔到，收市瀉近
４巴仙，報５０銀。小米（０１８１０）舊年業績扭虧為盈，但主要原因係來自優先股估值收益
，且而收入增長低過孖屐預期，所以今日收市都要跌近５巴仙，報１１﹒６４銀。同程藝龍
（００７８０）上年賺多１﹒７倍，但公司副董事長兼總裁江浩辭職，攪到業績好都無用，股價
現暗湧，早段最多跌近９巴仙，收市就報１６﹒９銀，軟逾２巴仙。其他新經濟股好似創夢天地
（０１１１９）亦下滑近４巴仙，報５﹒８８銀；美圖（０１３５７）就走低近２巴仙，報
３﹒７１銀。
風電佬今日個別發展，龍源電力（００９１６）上年只係賺咗３９億銀人仔左右，差過孖屐
預期，今日急挫近７巴仙，報５﹒５８銀，失５０天線（５﹒８７銀）及１００天線
（５﹒８３２銀）；金風科技Ａ股（深：００２２０２）宣布，主要股東新疆風能將金風Ａ股質
押嚟補充流動資金，今日Ｈ股隨Ａ股漲停而急升近１３巴仙，報１１﹒２銀；而早前發盈警嘅中
傳動（００６５８）就挫逾４巴仙，報６﹒４銀。其他發電佬都普遍下滑，華能國電
（００９０２）急跌近３巴仙，報４﹒５７銀；潤電（００８３６）軟近２巴仙，報１４﹒１８
銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新etnet健康網購，送你【健骨維他命D3(1000IU)】乙樽(價值$108)► 立即行動！
