《魚缸博客》東瀛國計劃開放賭權,銀娛(00027)大公子呂耀東近日話已經有想法係
大阪開始企劃,今日(24日)就係遞表限期最後一日。但馬交搞賭牌都要合資先可以入場,呂
生想去入哋個場開賭,單拖有無可能啊?
所以去年時大家都估緊,會唔會同一啲東瀛國陀地合作呢?Dynam(06689)係當
地彈珠機大哥之一,自然被睇高一線。雖然暫時無咩消息出台,但大家都望實東瀛呢舊肥豬肉,
因為孖住日資合作成功率點睇都大機會啲啦!
東瀛彈珠機(即台灣稱之為「柏青哥」)收益一直都有穩定增長,甚至技術都向外輸出,剛
剛馬交先批准Dynam嘅彈珠機係展覽擺攤,未來預計馬交都可以有相關嘅彈珠機可以玩到。
博客認為,可能係馬交同東瀛示好嘅一個手段,但馬交六大賭股,邊個同Dynam合作爭睹牌
,仍然未知之數。
睇返Dynam噚日出嘅業績,全年純利達8﹒91億港紙,按年升11%;但睇返全年
EBITDA先增長0﹒9%至22﹒02億港紙,睇怕公司都要開發多啲業務先可以維持增長
啦!
從技術走勢去講,公司係公布業績前已經炒高一轉,業績後就湧現獲利盤。但業績基本睇,
向下穿10蚊關機會不大,近兩個月都係10蚊左右就見反彈,入手呢隻股主要係考慮佢申請賭
牌嘅進度,預料嚟緊每一次Dynam嘅賭牌消息公布,都會成為股價上升動力,現價可考慮分
注吸納,面對嘅風險就係除非佢自己唔申請賭牌啦!缸友可以儲定小小貨底靜觀其變。
《編者按》本欄搜羅即市傳聞,惟消息未經證實,《經濟通》亦不保證內容之準確性。
全新etnet健康網購,送你【健骨維他命D3(1000IU)】乙樽(價值$108)► 立即行動!