按盤價 
《古臣周記》過去一兩星期震驚市場嘅，莫過於連續兩間科網公司畀沽空機構狙擊，其中一
間仲要係藍籌新貴瑞聲（０２０１８），被指利用超過２０個未披露關連人士同可疑帳戶，誇大
盈利。投資者對沽空機構嘅指控，好多時都抱住「寧可信其有」嘅心態，個個雞飛狗走之下，瑞
聲股價就由第一份沽空報告發表前嘅１１１銀，跌到停牌前８２﹒６銀，足足唔見四分一。
阿臣聽到唔少批評話，沽空機構根本冇畀到咩實質證據，佢地靠沽空股票圖利，卻難為一眾
血本無歸嘅散戶。但其實散戶一向跟風炒借勢走，見到大行唱好基金入貨個個就跟住追捧，又有
幾個真係認認真真去睇實質證據？「投資涉及風險」，遊戲規則唔係一早寫明「貴客自負」咩？
＊真金不怕洪爐火，瑞聲命運又如何＊
依阿臣之見，沽空機構今時今日大行其道，正正反映咗證監會同聯交所喺監管方面嘅不足，
未能杜絕「老千股」。有行內朋友就細細聲同阿臣講，有啲會計師樓工作量大，核數時冇足夠資
源去做背景審核，惟有簡單上ｇｏｏｇｌｅ或者百度搜尋一吓公司資料，又點能夠抽絲剝繭搵出
關連公司？畀人鑽空子造假數真係一啲都唔出奇。就以近日為例，山東墨龍（００５６８）、陝
西聯通先後爆出涉及財務、業績造假，講話係「冰山一角」亦亳不誇張。
睇睇往績，中國再生金屬（００７７３）除牌、奇峰（０１２２８）、輝山乳業
（０６８６３）被勒令停牌，沽空機構確實成功搵出唔少問題股份，或者換個角度看，反而係救
返唔少盲舂舂想去買嘅散客。
阿臣始終相信真金不怕洪爐火，好似早年被狙擊嘅恆大（０３３３３）咪一樣翻到身兼屢創
新高，香櫞研究（Ｃｉｔｒｏｎ Ｒｅｓｅａｒｃｈ）反而仲因為資料誤導，涉及市場失當行為
，而被禁止喺香港買賣證券５年。至於瑞聲命運如何，就要放長雙眼睇了。
表列截至５月２４日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
長和 ５００股 ９９﹒６元 １０１﹒３元 ５０６５０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：５０６５０元
剩餘現金 ：２８９８０元
組合淨值 ：７９６３０元
組合本周收益表現：＋ ０﹒９％
組合本月收益表現：＋ １﹒９％（截至上月底止組合淨值：７８１４８元）
組合累計收益表現：＋２２﹒５％（本金６５０００元）
＊數據截至今日１１：３０ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
