按盤價 
《古臣周記》阿臣上星期臨時去法蘭西公幹，好彩冇過去米字國行個白鴿轉，如果唔係就可
能已經絕筆無緣再會各位粉絲。阿臣先借個專欄向倫敦橋恐襲嘅受害者同家屬致哀，亦要向一眾
無懼生命受威脅、盡力救人嘅市民同警察致敬。
＊工黨大打置業牌，年青人最ｂｕｙ＊
英國星期四（８日）就會舉行下議院大選，選前有民調指保守黨只係僅僅領先工黨１個百分
點。不過阿臣就認為，恐怖襲擊對選情未必有太大影響。工黨黨魁郝爾彬話，發生恐襲同英國喺
海外嘅軍事行動不無關係，但二戰歷史教訓話我哋知，「綏靖主義」姑息政策並唔會帶來和平，
反而只會助長ＩＳＩＳ依啲極端組織嘅氣焰。又從數以萬計市民風雨不改，照舊喺倫敦橋恐襲後
出席悼念曼市襲擊嘅演唱會，亦可見英國人唔會就此嚇怕而屈服。
真正令執政保守黨領先優勢由廿幾個百分點跌到單位數嘅原因，係因為提出削減福利計劃，
包括建議減養老福利、長者冬天燃料補貼同取消學校免費午餐。相反工黨就提倡加富人稅、加大
醫療投資、引入大學寬減優惠同協助年青人上車買樓。一對比政綱，搵朝唔得晚嘅年輕人自自然
然就投向工黨懷抱。睇嚟，無論香港定英國，後生仔前途、置業問題一樣嚴峻。
＊留單一市場再派福利咁著數？＊
阿臣雖然身為九十後，都有一個疑問，工黨豪派福利大嗱嗱要使３００億英鎊，但脫歐難免
拖慢經濟發展，又邊得嚟咁多錢？其實，工黨嘅假設係爭取到繼續留喺歐盟單一市場同關稅聯盟
，但歐盟有冇咁大隻蛤乸隨街跳？阿臣就唔敢太樂觀。
無論如何，已經可以肯定保守黨黨魁、首相文翠珊同前任卡梅倫一樣捉晒蟲。文翠珊原先打
算趁高民望搶奪更多議席，依家卻可能連過半都不保，那怕只係損失幾席，都會失去民意依張王
牌去同歐盟博奕。
恐襲、大選、脫歐談判，英鎊睇怕又有排捱打，至於阿臣隻長和（００００１）就要自求多
福了。不過記得舊年脫歐公投鎊匯急插後，長和全年依然多賺６％，李超人實力非凡，阿臣冇理
由唔投以信心一票，一於觀望住先。
表列截至６月７日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
長和 ５００股 ９９﹒６元 １０１﹒２元 ５０６００元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：５０６００元
剩餘現金 ：２８９８０元
組合淨值 ：７９５８０元
組合本月收益表現：－ ０﹒３％（截至上月底止組合淨值：７９７８０元）
組合累計收益表現：＋２２﹒４％（本金６５０００元）
＊數據截至今日１１：３０ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
