《古臣周記－古臣》惟恐魚缸高處不勝寒，部署期權作準備

　　《古臣周記》所謂高處不勝寒，花旗國嗰邊嘅Ｔｅｓｌａ、香江呢邊嘅ＱＱ
（００７００），沽空量近來都累積好多，話晒兩者今年內都升咗唔少，自然惹來空軍嘅關注。
而星期一（１２日）魚缸竟然朝早跌逾三百點，撞正呢兩日花旗國議息，息魔來襲之際，魚缸似
乎同香缸嘅天氣一樣，必經一番風雨！

＊米字國大選塵埃落定，英鎊弱勢長遠更利經濟＊
　　
　　米字國國會大選塵埃落定，上星期超級星期四（８日）大選一役，為首相文翠珊帶嚟一個艱
難嘅局面，執政保守黨攞得３１８席，未能夠過半數得到國會控制權，需要籌組聯合政府。雖然
大失所望，但見慣風浪嘅文翠珊姿態淡定，第一時間拉攏北愛爾蘭民主統一黨入閣，搵嚟屬於疑
歐派嘅夥伴，文翠珊無非都係希望脫歐進程順順利利。
　　大選結果出爐之後，英鎊一度失守２５０天線，不過孖屐對於今次大選有新嘅解讀，認為依
家嘅形勢有利米字國軟脫歐，而英鎊弱勢咗，長遠有利米字國經濟發展呢！無論如何，大選有咗
結果，後市缸友都只會關心脫歐談判進程如何。不過，魚缸適逢同花旗孖屐一樣升咗好多個月，
難免令阿臣有少少擔心一旦魚缸借勢回調，阿臣嘅組合或會受衝擊！
　　
＊提防大市變幻莫測，買入潤地認沽期權保平安＊

　　世事變幻莫測，就連天文台都估唔到香江嘅天氣係點，作為散戶嘅阿臣又點估得中魚缸走向
係如何呢？不過，古臣檢視返組合入面嘅長和（００００１），連英鎊下滑嘅因素都出埋，但股
價都唔見大幅縮水，阿臣相信長和現水平幾乎已經好穩陣，於是決定繼續揸住。
　　阿臣最怕市況調整，焗住要坐貨，到時望住帳面上蝕錢。阿臣見環球投資者都沽空科網巨頭
，於是有樣學樣，亦加入空軍一列。阿臣利用大學時學到嘅期權知識，決定買入幾張潤地
（０１１０９）嘅即月認沽期權，事關藍戰士當中佢走勢相對無乜睇頭，萬一魚缸下行，到時潤
地又下跌的話，古臣就可以賺到錢幫補下。行使價為２１蚊，每張古臣以０﹒１銀掛買，一張成
本只係２００蚊，古臣一於做夠十張。就算古臣睇錯方向，最盡都係輸盡２０００蚊，唔怕傷老
本，真係進可攻退可守！

　　表列截至６月１４日止投資組合表現：
　　
　　－－－－－－－－－－－－－－－－－－－－－－－－－－－－－－－－－－－－－－－－
　　　　　　　　　　　　　　　　　　　　　　股票倉
　　股份　　　　　股數　　　　　　　買入價　　　　　　現價　　　　　　　總值
　　－－－－－－－－－－－－－－－－－－－－－－－－－－－－－－－－－－－－－－－－
　　
　　長和　　　　　５００股　　　　９９﹒６元　　　９９﹒００元　　　４９５００元　
　　－－－－－－－－－－－－－－－－－－－－－－－－－－－－－－－－－－－－－－－－
　　　　　　　　　　　　　　　　　　　　　　期權倉
　　股份　　種類　　　張數　　行使價　　到期日　　買入價　　　總成本　　　　　盈虧
　　－－－－－－－－－－－－－－－－－－－－－－－－－－－－－－－－－－－－－－－－
　　潤地　認沽期權　１０　張　２１元　　　即月　　０﹒１元　　２０００元　　　－－
　　－－－－－－－－－－－－－－－－－－－－－－－－－－－－－－－－－－－－－－－－

　　股票市值　：４９５００元
　　期權市值　：　２０００元
　　剩餘現金　：２６９８０元
　　組合淨值　：７８４８０元

　　組合本月收益表現：－　１﹒６％（截至上月底止組合淨值：７９７８０元）
　　組合累計收益表現：＋２０﹒７％（本金６５０００元）

　　＊數據截至今日１１：３０ａｍ