《古臣周記－古臣》盼林特一改前朝惡習，香江未來毋須太悲觀

　　《古臣周記》新特首林鄭終於上任，佢第一日返工就公開表示，會將增撥嘅５０億銀教育措
施新資源交畀行政會議審議，今朝（５日）就出席立法會答問大會回答議員提問，認真勤力。前
任立法會主席曾鈺成就評價話，梁特同林鄭嘅交接，似乎見唔到一種「互相尊重」，唔通真係一
朝天子一朝臣。阿臣希望林太可以一改前朝惡習，令到香江變得政通人和。阿臣對於自己家園，
仍然抱有少少希望。

＊天氣陰晴不定魚缸晦暗不明，基金獲利離場？＊

　　呢排香江天氣時而大雨綿綿，魚缸亦都晦暗不明，噚日（４日）午收前受到ＱＱ
（００７００）突然重挫拖累之下，魚缸一度大跌逾五百點，ＱＱ更加連２７０蚊都曾經守唔住
，好在今日好友唔服輸，未到十一點好友就將ＱＱ托返上少少，想撈嘅缸友話唔定依家係好機會
。
　　神州人民網發表評論文章，話ＱＱ旗下大熱手遊《王者榮耀》向社會釋放負能量，仲煞有介
事話隻遊戲「陷害了人生」，指當賺錢同傷人並存時，公司要警惕。阿臣覺得一隻咁搵銀嘅手遊
，點都唔夠誘人自殺嘅《藍鯨》咁邪惡啦！所以阿臣就唔認為呢個原因足以令人散水。觀乎一眾
資源股、內房股、賭股等嘅鑊氣收細咗ＤＤ，而噚日魚缸又連五十天線都守唔住，阿臣覺得似係
基金高位ｔａｋｅ　ｐｒｏｆｉｔ多Ｄ！

＊資金流出非為看淡港股，內地煤價料仍高企＊

　　不過，魚缸又唔係一Ｄ利好因素都無，有人話魚缸連續第１８周錄得資金淨流入，又有人覺
得神州流動性充裕，北水繼續落嚟掃貨。不過，魚缸噚日突然嚟一下迎頭痛擊，相信都震散唔少
人嘅信心。查實環球好多國家今個月都會議息，有聰明錢離場睇定Ｄ都係可以理解。阿臣亦唔相
信資金有從香江流走嘅跡象，雖然港匯弱，但係由於花旗國加咗息但香江未跟，所以資金出現套
息交易，令資金由港元流向美金。故此，港匯弱並唔係因為資金睇淡個市而流出，同因套息交易
而流走，兩者係有天淵之別。所以你話魚缸後市會好淡？阿臣又覺得未必。
　　近日二三線內房強之又強，可見北水力量真係銳不可擋，不過熱錢來得快去得快，相信二三
線內房資產價值支撐唔住高嘅市值，遲早都會跌一鑊勁嘅。反而阿臣見到阿爺七月開始限制部分
港口嘅煤入口，睇嚟煤價嚟緊仍然高企，有利好似神華（０１０８８）呢Ｄ煤股，阿臣想喺１７
蚊樓下先買神華，建議大家可以留意下！依家孖屐市況仲未明朗，阿臣以不變應萬變之餘，都會
順便搵定好貨！
　　
　　表列截至７月５日止投資組合表現：　　
　　－－－－－－－－－－－－－－－－－－－－－－－－－－－－－－－－－－－－－－－－
　　　　　　　　　　　　　　　　　　　　　股票倉

　　股份　　　　　股數　　　　　　　買入價　　　　　　現價　　　　　　　總值
　　－－－－－－－－－－－－－－－－－－－－－－－－－－－－－－－－－－－－－－－－
　　長和　　　　　５００股　　　　９９﹒６元　　　　９６﹒３元　　　４８１５０元　
　　－－－－－－－－－－－－－－－－－－－－－－－－－－－－－－－－－－－－－－－－

　　股票市值　：４８１５０元
　　剩餘現金　：２６９８０元
　　組合淨值　：７５１３０元

　　組合本月收益表現：－　１﹒１％（截至上月底止組合淨值：７５９８０元）
　　組合累計收益表現：＋１５﹒６％（本金６５０００元）（２０１６年８月開倉）

　　＊數據截至今日１１：３０ａｍ