《古臣周記－古臣》ＱＱ業績「好壞參半」，短期只宜炒下波幅！

　　《古臣周記》ＱＱ（００７００）上星期四（２１日）收市公業績，一如缸友所料維持唔到
高增長，部分數字較差，亦有啲好過「孖屐」預期，整份成績表勉強叫「好壞參半」，股價都係
無咩起色。今個星期仲因為魚缸氣氛轉差，加上大股東Ｎａｓｐｅｒｓ擬公拆業務上市變相減持
ＱＱ，隻企鵝即時穿埋十天（約２９００４元）同廿天線（約２８８８４元），短期走勢唔通都
要同大象（００００５）一樣無運行？不如等阿臣講下呢份成績表有咩都要注意先。
　
＊ＱＱ非通用會計準計年度純利好過預期＊
　　
　　ＱＱ今次份成績表唔合預期嘅地方，就係佢嘅純利，上年賺７８７﹒１９億人仔升咗約
１０巴仙遜孖屐預期，而單計上年第４季盈利，按年及按季就更加要倒退３２巴仙同３９巴仙到
１４２﹒３億人仔。
　　不過，看官有留意阿臣上次講ＱＱ第三季業績時都知，睇呢類新經濟股，要睇嘅應該係用非
通用會計準則（ｎｏｎ－ＧＡＡＰ）計出來嘅純利，因為當中排除咗現金項目同併購交易所產生
嘅影響，能夠更加真實咁反映現時經營業務嘅表現。睇返ＱＱ上年嘅以非通用會計準則計嘅純利
，全年盈利有７７４﹒６９億人仔增長近１９巴仙，貼近各大行之前預估嘅上限。不同會計準則
計出來盈利有咁大嘅差距，ＱＱ就話主要係因為上年第四季為ＱＱ音樂上市而付出嘅２１億非現
金支出，相比前年末季因為反映咗易鑫（０２８５８）、搜狗同ＳＥＡ上市，而錄得大額已變現
出售收益，就令到今年純利咁差。所以ＱＱ上年份成績表其實係「好壞參半」。
　　
＊手遊收入貢獻下降，其他業務開始爬頭＊
　　
　　細睇ＱＱ今次呢份業績嘅各項細節，遊戲收入就連續第二季下跌，第四季再跌６％到２４２
億人仔；手遊業務上年收入７７８億人仔按年增加２４巴仙，第四季手遊收入１９０億人仔按季
亦增加１２巴仙。由神州恢復批出遊戲版號之來，ＱＱ暫時有８款遊戲獲批，其中「食雞」《絕
對求生》仲未有進一步消息，不過ＱＱ喺業績記者會都有講到，唔排除透過修過內容嚟獲得版號
。
　　不過，ＱＱ王牌手遊業務《王者榮耀》開始後勁不繼，最新伽馬數據本月１４號發表
《２０１９年２月移動遊戲報告》嘅時候，特別追蹤《王者榮耀》嘅流量，發現遊戲上個月喺所
有平台的下載量按年都大減５５巴仙，而今次呢份業績亦揭示手遊業務佔整體收入貢獻首次少於
３０巴仙，反映其他業務開始爬頭。

＊雲業務市佔率逾一成半遠低於阿里巴巴＊　　
　　
　　阿臣講緊嘅係令到大家眼前一亮包括雲業務、支付收入嘅統稱喺其他業務嘅範疇，其中呢個
範疇第四季收入有２４２億人仔增幅達１９巴仙；但業績報告內亦有提到喺整個其他業務嘅範疇
上，收入成本喺第四季亦有１０巴仙嘅按季增長至４９７億人仔，令到ＱＱ喺第四季嘅收入成本
佔收入比例上升至５９巴仙，大摩就話到相關嘅投資成本高於預期。　　
　　據現時花旗國市場研究機構Ｓｙｎｅｒｇｙ　Ｒｅｓｅａｒｃｈ　Ｇｒｏｕｐ嘅研究，
ＱＱ喺神州嘅雲業務市佔率有１６﹒５巴仙，比起阿里巴巴嘅４０﹒５巴仙有一段距離，不過單
計收入去睇雲業務的確保持高增長，其中ＱＱ上年雲業務收入就有一倍增長到９１億人仔，而阿
里雲亦有９１巴仙增長到２１４億人仔，但缸友都要留意做雲業務嘅公司愈來愈多，而且阿臣諗
如果真係因為雲業務而買相關股份，點解唔直接買阿里巴巴仲穩陣呢？　　
　　今次呢分成績雖然畀各間大行唱好，不過其實大摩都有講過幾個ＱＱ未來嘅風險，其中就講
到神州經濟增長放慢可能會影響企業投放喺廣告嘅預期、其次社交平台同娛樂方式改變，前車可
鑑應該就講緊Ｆａｃｅｂｏｏｋ啊！
　　以現價去睇，ＱＱ都應該到咗合理值，而收到份成績表之下，就算喺各大行護航下都無咩大
升幅，今個星期都係同魚缸一齊上上落落，加上最新傳出大股東Ｎａｓｐｅｒ會分拆互聯網業務
上市，變相再減持ＱＱ。ＱＱ短期可能都要等下一波遊戲版號出台先再有上升嘅催化劑，現時炒
下波幅就算喇，如果彈上星期五（２２日）嘅位置（近３７０銀）就要走人喇。
　　
＊潤電減息兼業績差過預期，斬纜不留情＊
　　
　　經濟放緩嘅憂慮再次籠罩住全球，攪到環球魚缸都嚟個大跌，魚缸星期一（２５日）就跌近
六百點，係兩個星期以來嘅低位，滬深股通更加單日淨流走１０７億人仔，係歷來規模第二大。
不過睇返公仔圖啊，現時５０天線（２８２４５點）已經升破２５０天線（２８０９７點），形
成「黃金交叉」，缸友們可以觀望埋今個星期幾隻內銀佬嘅業績如何，因為睇埋成個恆指成分股
，似乎暫時只有內銀佬未被炒起，如果今個星期內銀佬業績造好，隨時可以令魚缸上返二萬九嘅
關口，當然中美貿易開會傾成點，缸友都要留意啦。
　　個股方面，潤電（００８３６）上星期放「核彈」，連阿臣都此料不及，上年淨利潤
３９﹒５億銀減少１４﹒６巴仙，遠低過「孖屐」預期，更加大獲係守唔到三年穩定派息嘅承認
，今年末期息２０﹒３仙，比上年大減７３巴仙，無預警減派息下，令到佢上星期五下畫一開市
已經唔見一成，阿臣見到當然急急腳沽啦，現時息率已經跌到２﹒８厘，７厘息俱住矣！
　
　　表列截至３月２７日（１１：００ａｍ止）投資組合表現：
　　
　　一周買入╱賣出股份
　　－－－－－－－－－－－－－－－－－－－－－－－－－－－－－－－－－－－－－－－－
　　股份　　　　　　每股作價　　　　數量　　　　計及手續費後金額　　　　　盈╱虧
　　　　　　　　　　　　　　　　　　　　　　　　　　　　　　　　　　　（不計手續費）
　　－－－－－－－－－－－－－－－－－－－－－－－－－－－－－－－－－－－－－－－－
　　買入：
　　華潤電力　　　１２﹒３８元　　４０００股　　　４９４４９元　　　（１１６００）
　　－－－－－－－－－－－－－－－－－－－－－－－－－－－－－－－－－－－－－－－－
　　股票市值　　　　　　：　　　　　０元
　　剩餘現金　　　　　　：　９５９４０元
　　組合淨值　　　　　　：１４５３８９元
　　組合本月收益表現：　－　６﹒２４％（截至上月底止組合淨值：１５５０７０元）
　　組合累計收益表現：　＋３８﹒４７％（本金１０５０００元計）（２０１６年８月開倉）
　
　　＊數據截至今日１１：００ａｍ