《小傳日記》人仔大激鬥，缸友留定走？！

　　《小傳日記》阿爺一出手，噚日（５日）人仔就好似坐直升機咁，止跌回升，而離岸人仔隔
夜拆息一度飆升至１５０厘。今日在岸離岸人仔又大跌，驚！阿爺已講到明唔會容忍人仔貶值預
期強化，睇嚟淡友同阿爺之鬥，短期內都唔會咁快完結。
　　至於香江魚缸，今朝都仲趁人仔反彈，恆指高開１２６點報２２５８３，收復番五十天線
（約２２４７６點）。不過，企得唔穩，又隨住人仔走勢曾經碌番晒落去。恆指埋單升４６點，
報２２５０３點；Ａ場軟０﹒４巴仙收報３１５４下，國指都無心機，但都揚１２點報
９６１１。全日成交５８１億銀左右。

＊魚缸升定跌人仔牽著走，賣盤有進展有線高高收＊

　　九倉（００００４）就有線寬頻（０１０９７）未來發展方向嘅評估已經進入最後階段，其
中包括可能出售嘅方案。望穿秋水，有線賣盤好似有新進展，股價應聲飆前逾１７巴仙，報
０﹒８９銀。九倉都跟尾行前逾２巴仙，報５６﹒２５銀。
　　超人噚日出席晚宴前話，雖然脫歐後英鎊大幅貶值，但以港元為單位嘅業績依然唔錯，算係
符合自己預算。長實（０１１１３）、電能（００００６）滿懷信心，齊齊衝前近１巴仙，收
４９﹒５同６９銀。但超人一號（００００１）似乎唔太受落，輕輕碌低近１巴仙，得返
９０﹒１５銀。

＊沙特將減產三桶油即讚，石化與油服開心炒一番＊

　　沙特阿拉伯班油長減產，刺激油價繼續走高。「三桶油」之中，中石油（００８５７）創逾
一年新高，埋單有逾１巴仙落袋，收報６﹒０４銀。中石化（００３８６）更有近２巴仙收穫，
收報５﹒８２銀。中海油（００８８３）慘Ｄ，尾市輕微倒跌！
　　油股雖然走高，但表現仍然不及一班石化、油服嘅街坊。巨濤油服（０３３０３）跑高逾
１３巴仙，收報０﹒８６銀，創近年半新高。安東油服（０３３３７）同中海油服
（０２８８３）前進近１巴仙至２巴仙，收報１﹒１１銀及７﹒４９銀。上石化（００３３８）
亦唔執輸，斬穫逾３巴仙，收報４﹒４２銀。

＊野村來唱好陸發發收到，麥記嗌低吸友邦微微高＊

　　中科院料全年商品房價漲逾３個巴仙，如果預測準確，升幅其實好溫和，有缸友解讀為調控
唔使太雷厲啦！中海外（００６８８）之前獲野村唱好，今日延續升勢，踢高近２巴仙，收報
２１﹒３５銀，廿天線袋袋平安。
　　雖然麥格理質疑ＡＩＡ（０１２９９）今年新業務價值增長情況，但由於股價自去年１０月
以來跑輸恆指，而家或者係「掃貨」機會。缸友似乎亦把握機會，助友邦踢高近１巴仙，收報
４４﹒８銀。
　　龍源（００９１６）獲瑞信睇好為行業首選，預期會繼續受惠限電措施，今日龍源繼續電力
十足，飄高近３巴仙，收報６﹒４２銀。
　　噚日奧傳思維（０８０９１）配售上市，以高配售價２９倍收市，打破創業板自１９９９年
成立以來紀錄，今日唔好畀佢停，再有逾１３巴仙進帳，收報９﹒２９銀，高配售價逾３３倍，
厲害！

＊龍源叉足電思維續看俏，吉利銷售佳個價唔識笑＊

　　馬交金管局同司警偵破內地ＰＯＳ機（刷卡機）非法套現活動，又指將來會以唔同渠道打擊
透過虛擬刷卡消費將授信額度化做現金。雖然德銀話對賭仔影響細，銀娛（０００２７）、金沙
（０１９２８）仍然腳軟約１巴仙，報３４同３３﹒６５銀。美高梅（０２２８２）都走唔甩，
跣低逾２巴仙，收報１５﹒２銀。
　　吉利（００１７５）舊年１２月賣出１０﹒８萬部砵砵車，又創歷史新高，按年計更飆升一
倍。瑞信估計，吉利上半年銷量增長會見得人，但面對競爭對手提供補貼，會有價格下調壓力。
吉利今朝曾經駛前近２巴仙，可惜後勁不繼，埋單倒跌近４巴仙，收７﹒６８銀。街坊東風
（００４８９）上個月砵砵車銷量升逾６巴仙，但都要瞓低逾１巴仙。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。