《小傳日記》魚缸回勇追唔追？ＱＱ反擊勁威水！

　　《小傳日記》颶風艾瑪逼近花旗國佛羅里達州，居民都嚴陣以待做好準備，希望將影響減到
最少；而當地缸友亦擔心艾瑪所造成嘅損失，上星期五（８日）繼續離場觀戰，道指只係微升
１３點收２１７９７。
　　香江魚缸今日（１１日）就好似突然雨過天晴，一班重磅股唞夠後開始反擊，股王ＱＱ
（００７００）、大象（００００５）同ＡＩＡ（０１２９９）都有１至２巴仙進帳，而個別祖
國磚頭佬都延續上星期嘅鑊氣，恆指成功掃走烏氣，彈高２８６點報２７９５５，仲收高於十天
線（２７８０２）添！國指表現就無咁出色，皆因祖國錢莊無咩精神，唔夠力撐起，最終國指收
漲７１點報１１２２１。不過，魚缸就未見太旺場，全日成交約有８９４億銀。
　
＊ＱＱ獲唱好股價向上掃，內房又炒起恆大夠鑊氣＊
　
　　股王ＱＱ獲申銀萬國升目標價，由４００蚊升到４２５蚊，重申「買貨」評級，結果今日跳
起近３巴仙，收報３３０﹒８銀，係今日最叻藍戰士，仲收復埋十天同埋廿天線添！街坊埃芝芝
（００７９９）將授出８３萬股獎勵股份，但今日表現好失色，全日逆市趴低近９巴仙，報
１０﹒７２銀。昔日獲北水炒高嘅風光不復再，慘！
　　永利馬交（０１１２８）擬發美元優先票據，用嚟贖回票據，今朝開市一度彈起近６巴仙至
２０﹒７５銀，但好快就收晒火，最終只係踢高近２巴仙，報１９﹒９８銀。
　　個別祖國磚頭落鑊，恆大（０３３３３）午後突然鑊氣十足，飆前超過一成，報２４﹒９銀
；融創（０１９１８）同街坊雅居樂（０３３８３）齊齊踢起大約６巴仙，各報２６﹒８５銀同
１１﹒０８銀。
　
＊聯婚獲批准中材向前進，盈利向後退「扒打」勁縮水＊
　
　　中材（０１８９３）同中建材（０３３２３）聯婚獲批，將會以換股方式進行，摩通幾睇好
今次婚姻，重申中材「增持」評級，佢哋復牌後前者炒起近１３巴仙，報４﹒０３銀；後者就跣
低近２巴仙，報４﹒９２銀。
　　祖國工信部研究停產傳統能源汽車，新能源砵砵車比亞迪（０１２１１）聽到消息隨即開
Ｔｕｒｂｏ，收市衝前近半成報４９﹒４銀，做埋今日最叻國貨佬。
　　ＰＲＡＤＡ（０１９１３）半年少賺１８巴仙去到近１﹒２億歐元，仲畀麥格理削佢目標至
２５﹒２銀，結果重挫近１４巴仙，埋單２４﹒０５銀。
　
＊丘鈦急急回缸友好倒霉，磚頭又衝高信置最風騷＊
　
　　神州手機鏡頭佬丘鈦（０１４７８）今年頭半年都無風無浪，但一到魚缸８月業績期，呢個
手機設備佬就坐咗火箭，成個８月升咗超過一倍，但升得快就跌得快，上月底喺２３﹒２５銀山
頂位插旗後就碌落山，而呢幾日更跟住蘋果概念街坊跳水，跑輸晒成班街坊，全日插咗１４巴仙
收１４﹒１２銀，以山頂位計，足足插咗超過３９巴仙。高偉電子（０１４１５）上個禮拜二
（５日）喺兩年高位５﹒７８銀插旗後就腳軟，三連跌後再跣低近４巴仙，報４﹒３３銀。
　　香江磚頭佬今日表現雖然冇上個禮拜五咁省鏡，但都唔算失禮，信置（０００８３）一馬當
先升咗近３巴仙，報１４﹒２６銀；喺上一日升咗近６巴仙嘅恆地（０００１２），今日跌返個
斗零，收５２﹒８銀；新地（０００１６）今個星期四（１４日）派成績表，今日埋單都有超過
一巴仙落袋，報１３５﹒６０銀。
　
＊急升又急挫恆騰仍有火，高鵬大反擊正力受重擊＊
　
　　由中國恆大同股王ＱＱ做股東嘅恆騰網絡（００１３６），過去一個月走勢夠晒波動！上月
中開始急升，期間試過飛起１﹒７倍去到０﹒２９５銀，然後插水式跌叔去最低０﹒１８２銀。
今日又試圖反擊炒高近１４巴仙上番十天線，點知唔夠力，埋單只得逾５巴仙進帳收０﹒２１３
銀，有貨缸友真係少Ｄ心血都唔掂。
　　其他細股就依舊炒到㷫烚烚，好似高鵬礦業（０２２１２）喺上周五急挫咗約２７巴仙，今
日就反擊彈高近３６巴仙，報０﹒１９３銀，係最叻嘅細股仔。新焦點（００３６０）就直頭升
到停埋牌，停牌前就衝前逾２５巴仙，報０﹒４９５銀。
　　另一邊廂，正力控股（０８２８３）今日突然玩跳樓機，失驚無神洗倉式插低６６巴仙見
３﹒８銀，但之後大舉收回失地，全日只係跌近４巴仙，報１０﹒６２銀，好似發咗場惡夢咁！
請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。