《小傳日記》油王做領軍，ＱＱ有點震！內房彈不得，迪仔最興奮！

　　《小傳日記》香江魚缸噚日（２５日）爆發內房小股災。美朝緊張，花旗市亦唔好得去邊。
噚晚科技股受襲，Ｆａｃｅｂｏｏｋ、微軟及蘋果等全部受重創，搞到納指跌近１巴仙收
６３７０點；而道指亦腳軟唔見５３點收２２２９６。
　　今個星期又季結在即，基金係時候埋單計數，股王ＱＱ（００７００）受到花旗科技股嘅拖
累，基金佬都趁高位走人，搞到今朝（２６日）開市競價已經瞓低逾３巴仙，恆指更低開１９１
點報２７３０８失五十天線。好彩「三桶油」發力支撐，ＱＱ低位又有買盤湧入，結果恆指成功
拗腰彈，收升１２點報２７５１３；國指更稍為跑贏大市，踢起５５點報１０９６８。全日成交
依然咁旺場，約有９７１億銀。
　
＊納指突捱沽ＱＱ無辜辜，內房歷股災前路仍痛苦＊
　
　　內地磚頭噚日因為調控樓市而跌得好淒厲，其後又聽到浙江銀監局開會，話要進一步規範個
人貸款資金違規流入內地磚。雖然係咁，但噚日急瀉之後總算喘定，一度仲試過彈得幾靚，但可
惜力水唔夠。
　　里昂估內地喺下個月十九大前再收緊樓市，唔駛咁急買內房股；花旗就唔多識驚，話內房銷
售增長會去到出年。融創（０１９１８）淨係腳軟１巴仙，報３１﹒６５銀；龍頭之一恆大
（０３３３３）就輕輕唔見３巴仙，收報２６﹒０５銀；藍戰士中海外（００６８８）就趴低近
１巴仙，報２５﹒２銀。
　　國貨佬萬科（０２２０２）兩日夾埋唔見１１巴仙之後，今日算係喘定番，有唔夠半個巴仙
進帳，埋單２４﹒８５銀；合景泰富（０１８１３）獲里昂升目標價去到８﹒５銀，但都係要發
軟蹄唔夠半個巴仙，報７﹒９９銀。
　
＊新唉瘋淡靜概念唔多醒，瑞聲與舜宇雙雙頭擰擰＊
　
　　噚晚花旗國科網巨擘Ｆｂ唔見近半成，股王ＱＱ一大朝早跟隨趴低超過３巴仙，個心都離一
離真係，好在之後跌幅有所收窄，但最終仍然跣低逾１巴仙，報３３７﹒６銀，失守十天線
（３４１﹒９銀）。另一隻重磅股ＡＩＡ（０１２９９）公布打算收購澳紐壽險業務之後，
Ｓ＆Ｐ確認佢長期發行人評級係「Ａ」，但今日卻唔爭氣，跪低近２個巴仙，報５８﹒３銀。
　　「唉瘋８」唔係幾賣得，其後仲傳蘋果要求「唉瘋Ｘ」零件商減少出貨量六成，搞到瑞聲
（０２０１８）今朝一起身就跣低超過４巴仙，其後慢慢收窄番跌幅，但結果仲係唔見１巴仙，
報１２６﹒１銀；舜宇（０２３８２）仲慘，趴低超過３巴仙，報１１９﹒５銀。
　
＊油價急反彈三桶油舞高，油服順勢上墨龍最風騷＊
　
　　油組稱全球孖屐正在恢復平衡，而土耳其威脅切斷從伊拉克庫爾德地區至該國港口嘅輸油管
道，可能令供應減少，令到油價噚日急升逾３巴仙，布蘭特期油仲觸及逾兩年新高添！布蘭特
１１月期油收高近４巴仙，報５９﹒０２美金，為２０１５年７月以來最高。花旗１１月期油收
高，亦見４月以來最高。受惠油價上升，一班賣油佬當然歡呼啦！好似中海油（００８８３）、
中石油（００８５７）同中石化（００３８６），三者分別有近２巴仙至近４巴仙進帳，分別報
９﹒９銀、５銀、５﹒９１銀。油服佬好似中海油服（０２８８３）咁，亦踢起逾４巴仙，報
６﹒８８銀。山東墨龍（００５６８）就有逾１１巴仙落袋，報１﹒３８銀。
　
＊細摩再發功迪迪飛上空，吉利輕踏前華晨不輕鬆＊
　
　　砵砵車噚日向下衝之後，今日又有買盤買返上去，成功反擊。比亞迪（０１２１１）主席之
前話神州未來會全面用電動車，不過惠譽就覺得神州唔太可能喺２０年內全面禁止燃油車。雖然
係咁，但比亞迪獲細摩再次吹起，繼續維持增持評級，「紅底」目標不變，難怪急反彈之後尾市
仲愈升愈有，最後飛起近１２巴仙，報７３﹒９銀，距離目標價仲有咁遠路，缸友睇吓搭唔搭轉
順風車喇？
　　街坊方面，藍戰士吉利（００１７５）亦衝上近１巴仙，報２２﹒２銀。華晨
（０１１１４）就慘豬豬，碌低近１巴仙，報２１銀。
　　洛鉬（０３９９３）連跌三日共１２巴仙，今日終反彈２巴仙，報４﹒６１銀。Ａ仔
（滬：６０１６００）繼續停賽，話公司籌劃中嘅重大事項，涉及到發行股份購買資產。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。