《小傳日記》魚缸回勇好得戚，內房報復式反擊！

　　《小傳日記》花旗國科技股噚晚（２６日）有番Ｄ起色，加上聯儲局主席耶倫姨姨「放鷹」
，令到孖屐進一步肯定，１２月加息嘅預期，當地三大指數都企番穩。既然外圍魚缸回復番正常
，香江都重回上升軌道，此前受重挫嘅內房佬進行大反擊，蘋果相關股都發威衝番上去。
　　結果，香江魚缸今朝（２７日）微微低開９點後，好快就調頭倒升，最多仲試過踢起１６０
點至２７６７３。不過始終大隻藍戰，好似股王ＱＱ（００７００）、ＡＩＡ（０１２９９）、
大象（００００５），以及中資金融佬都未聯手反擊，所以魚缸埋單都只係袋１２９點，收市報
２７６４２；國指果邊就收漲６７點報１１０３５。
　　但魚缸方向未係好清晰，缸友都係試緊水溫，全日成交就少咗１２巴仙至約８５８億銀。而
聽日（２８日）就係期指結算日，好淡友又要開戰，缸友坐穩Ｄ呀！　
　
＊超人加馬雲孖住發大財，南北船重組缸友齊讚好＊
　
　　超人一號（００００１）話要拍住「支付寶」母公司螞蟻金服成立合資，一齊搞「支付寶
ＨＫ」咁話喎，依個香江版「支付寶」唔講得笑，短短推出幾個月已經有超過１０萬個活躍用戶
，仲有超過４０００個香江知名嘅零售商戶都係用佢！超人一號一向出晒名無寶不落，今次孖實
馬雲同阿里，股價最高見過１０１銀，升破埋幾條平均線啊，但收市就企唔穩，只係衝前咗
０﹒３巴仙，報９９﹒７銀，
　　阿爺要重組國企，大家都估人稱「南船」嘅中船集團，同人稱「北船」嘅中船重工有機會進
行整合，「南船」旗下喺Ａ場嘅兩位囝囝今日都停牌，相信成事機會都唔低。而「南船」係中船
防務（００３１７）嘅大股東，缸友梗係追住佢嚟炒喇！全日飛起逾１２巴仙報１４﹒１銀，勁
！
　
＊車股向前衝迪仔好風騷，蘋果見回升瑞聲終甩難＊
　
　　今日魚缸總算有返Ｄ起色，神州四個轆全線踩油，加上天朝首府話要加快電動砵砵車發展，
下個月會出台指導意見，之前畀細摩睇好會變身成為「紅衫魚」嘅電動車一哥比亞迪
（０１２１１），爆升咗最多超過７巴仙，差ＤＤ就上到８０蚊，高見７９﹒３銀，創咗近七年
半新高，但埋單只係升近３巴仙，報７５﹒８銀。身兼藍戰士嘅吉利（００１７５）近年都開始
大搞電動砵砵車，埋單升咗超過兩巴仙，報２２﹒６５銀，仲順便升破埋條十天線
（２２﹒４７５銀）。
　　蘋果公司插咗四日之後噚日終於一洗頹風，升咗近兩巴仙，跟蘋果搵食嘅瑞聲
（０２０１８）同其他街坊都有得坐順風車，瑞聲同舜宇（０２３８２）一樣升咗近半成，報
１３３蚊同１２６﹒５銀。
　　神州電訊佬聯通（００７６２）話要喺出年試搞商用５Ｇ，電訊設備佬亦都乘機炒上，中興
通訊（００７６３）升咗超過７巴仙，報２５﹒５５銀；京信通信（０２３４２）就彈高近３巴
仙，報１﹒４５銀。
　
＊內房佬反彈世房高佬讚，華南城搶閘缸友有錢擸＊
　
　　前幾日阿爺出手壓住神州幾個城市嘅樓價，嚇到班缸友喺咁掟貨，神州磚頭佬過去兩日都插
晒水，有缸友仲擔心會唔會連一二線城市都會「中招」。不過，缸友未驚完，Ｄ神州磚頭佬今日
全線展開報復式反彈，世房（００８１３）今日畀高佬唱好，「他屐」由１８﹒１銀升至
２２﹒５銀，評級由中性升至買入，並納入確信買入名單，全日一騎絕塵升咗超過１２巴仙，報
１７﹒３８銀；融創中國（０１９１８）爆升咗近１１巴仙，報３５蚊；四條三恆大
（０３３３３）就升咗近４巴仙，報２７﹒０５銀。
　　大阿哥萬科（０２２０２）升咗超過６巴仙，報２６﹒４銀；Ｂｉｇ桂園（０２００７）彈
高咗超過半成，報１２﹒８銀；華南城（０１６６８）就跑得最前，一馬當先升咗近１７巴仙，
報２﹒０７銀，勁。
　
＊瑞信讚協鑫有貨好開心，萬達獲注資急升笑瞇瞇＊
　
　　保利協鑫能源（０３８００）今日就厲害啦，皆因有瑞信俾Ｌｉｋｅ，不單止將「他屐」由
０﹒９銀升到上１﹒４銀，仲將個評級升到上「跑贏大市」，帶動股價彈起近８巴仙，仲收復埋
噚日失守嘅十天線（１﹒０４９銀），最終報１﹒０９銀。
　　萬達酒店（００１６９）斥８﹒７８億銀向控股股東收購萬達酒管，刺激佢跳起逾１０巴仙
報１﹒７銀。
　　數到飛高得最多嘅股仔，就要提到國際商業結算（００１４７），足足飛起咗３４巴仙，破
５０天線（０﹒５０５銀）兼創近兩個月新高，最終報０﹒５７銀。陽光油砂（０２０１２）都
唔差，宣布修改償還債券延期協議，傾掂數，當然開心跳起近２０巴仙，報０﹒２３９銀。
　　國藥（０１０９９）今日畀研究機構ＧＭＴ狙擊，話其現金流有問題，又話刻意粉飾資產負
債表，股價最多跌３﹒５巴仙，但低位買盤好勁，收市仲倒升近半個巴仙報３４﹒５５銀，未來
嘅走勢要睇實Ｄ。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。