《小傳日記》Ａ場復市追落後，香江高位要唞唞！

　　《小傳日記》「十一」加中秋超級黃金周後，Ａ場今日（９日）終於復市喇！同胞們忍手咁
耐，梗係要盡情掃貨喇！Ａ場復市後即急升逾１巴仙，之後仲一度直衝去３４１０高位，創逾
２１個月新高添！不過熱情好快就轉冷，食完午飯返來，升幅大大縮減，最終只收升０﹒８巴仙
報３３７４。
　　香江今朝未開賽前，見到花旗上星期五晚（６日）受到非農就業職位７年來首次下跌，打擊
咗氣氛，雖然道指只係象徵式收跌１點報２２７７３，但香江缸友都非常謹慎，決定沽貨離場觀
戰。恆指低開１７點後，喺中字輩拖累下，最多試過唔見１７６點；雖然生發發（００３８８）
發威頂住，但都無太大作用，恆指埋單都要收跌１３１點報２８３２６，四連升斷纜；國指就碌
低７３點報１１３８５。
　　雖然魚缸回緊氣，但全日成交都唔少，都有９７８億銀。另外，缸友唔好忘記今個星期三
（１１日），我哋首位女特首林鄭月娥將會宣讀任內第一份施政報告，房屋政策方面隨時有新嘢
，記得昅實《經濟通》喇！
　
＊四連升斷纜交投不冷淡，食品逆市漲瑞信畀個讚＊
　
　　瑞信唱好食品股，旺旺（００１５１）就食住條水順勢向上，今日曾經見過５﹒９７銀創一
年半高，全日都飛起６巴仙，報５﹒９４銀，係是日最叻仔藍戰士！街坊康師傅（００３２２）
仲厲害，跳起８巴仙報１２﹒５４銀，盤中高見１３銀，係近兩年嚟嘅高位。
　　蒙牛（０２３１９）獲瑞信將目標價由１２﹒８銀大升到２５銀，足足差唔多有成倍，評級
都由「跑輸大市」上調到「跑嬴大市」，刺激股價彈高近２巴仙，報２２﹒３５銀。萬洲
（００２８８）都有份獲上調目標價，成功逆市衝前近１巴仙，報８﹒４２銀。
　　顯示器概念股今日手拖手炒高，皆因有最新數據就估計，神州喺２０１９年將會成為全球最
大嘅平板顯示生產基地，信利（００７３２）飛起近三成，報３﹒３２銀，排喺升幅榜第二位。
　
＊顯示有錢途信利飛三成，車仔齊倒褪緣何唔精靈＊
　
　　砵砵車股雖然喺神州嗰邊就有好表現，但香江呢邊就受大市拖累，差唔多全部都腳軟軟。當
中比亞迪（０１２１１）算比較叻仔，皆因建銀國際就維持「跑贏大市」評級同目標價８８﹒５
銀，加上位於北美嘅電動大巴廠擴建正式竣工，盤中高見過８３﹒７銀，但又係高處不勝寒，收
市打回原形報８０﹒３５銀。吉利（００１７５）就唔多掂啦，因為上星期已經累計彈起咗２４
巴仙，所以今日在所難免回吐近２巴仙，報２６﹒８５銀。華晨（０１１１４）跌低２巴仙，報
２２銀；廣汽（０２２３８）跣低逾１巴仙，報１９﹒３８銀。
　　瑞信話要降低馬交下個月嘅賭收增長預測，大降去到１０至１３巴仙，仲指過去嘅黃金周賭
收表現一般般，搞到賭股佬齊齊瞓低。銀娛（０００２７）腳軟３巴仙，報５３﹒６銀，係今日
最差表現藍戰士；金沙（０１９２８）就跌低近３巴仙，報３８﹒５５銀；新濠（００２００）
跣低２巴仙，報２１﹒８銀；美高梅（０２２８２）瞓低２巴仙，報１７﹒６４銀。
　
＊賭股玩回吐ＴＶＢ收高，中興Ａ靚仔Ｈ股有點糟＊
　
　　自從神州電信佬話要喺大搞５Ｇ之後，工信部官員早排仲話５Ｇ技術測試已經進入咗第二階
段，即技術方案實驗，同５Ｇ有關係嘅股份由上月尾到而家炒高咗無數次；加上今日Ａ場同港股
通開返工，而５Ｇ股份一哥中興通訊（００７６３）（深：００００６３）有富瑞大升目標至
４０蚊，今朝搶先出閘升咗超過３巴仙兼破埋頂，最新山頂位去到３１﹒１銀。之不過，高處不
勝寒，埋單倒跌超過兩巴仙報２９﹒４５銀。不過，Ａ仔就威水得多，升咗近６巴仙，報
２９﹒９８銀。
　　ＴＶＢ（００５１１）早排回購遇到證監會嘅阻滯，之後ＴＶＢ喺司法覆核贏咗，今朝一復
賽就野馬出閘，最多升咗超過６仙，高見２８﹒１銀，埋單只係報２７﹒５銀，升咗超過４巴仙
。
　　講返林鄭將會喺星期三（１１日）公布任內首份《施政報告》，缸友早前期盼嘅農地交換政
策似乎無咩聲氣，加上花旗國今個禮拜就要開始縮表，本地磚頭今日唔多硬淨，新世界
（０００１７）同長實（０１１１３）跌咗唔夠１巴仙，前者報１１﹒４６銀，後者報
６４﹒６５銀；恆地（０００１２）同信置（０００８３）就逆市升咗唔夠１巴仙，報
５３﹒４５銀同１３﹒８４銀。
　
＊金九與銀十高追心都實，眾安紅底前缸友鬥快質＊
　
　　神州磚頭價格近呢幾年坐穩火箭，阿爺睇唔過眼持續搞咗幾次調控，今年嘅「金九銀十」成
為鏡花水月；喺啱啱過咗嘅黃金周，以北上廣深為首嘅一線城市成交全線插水，頭九個月嘅成交
更跌四成，啲磚頭佬即時冇運行。中國奧園（０３８８３）跑輸所有街坊，跪低超過７巴仙，報
４﹒６１銀；大隻磚頭同樣跌得深，融創（０１９１８）跌咗超過半成，報３８﹒６銀；四條三
恆大（０３３３３）跣低超過３巴仙，報２９﹒１５銀。
　　即使龍光地產（０３３８０）上個月銷售按年升咗超過七成，但今日都要陪跌，跣低超過
４巴仙，報８蚊；百仕達（０１１６８）雖然揸住半新丁眾安在綫（０６０６０）嘅內資股，但
對眾安曾逼近紅底無厘反應，全日收市更挫低咗６巴仙，報１﹒４１銀。
　　再睇下眾安，上周坐完火箭今日就坐過山車，朝早先跣低近半成，之後又突然爆高咗超過４
巴仙，喺最新山頂位９７﹒８銀插旗，之後又有一班缸友埋單食胡，埋單計跌咗超過３巴仙，報
９０﹒８銀。不過，有耐性嘅缸友如果由眾安入缸起都仲未食胡嘅話，每手賺成３１１０港紙。
請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。