《小傳日記》魚缸好風騷，大象九年高！施政揭盅前，磚頭佬進攻！

　　《小傳日記》香江魚缸噚日（９日）只係回一回氣，估唔到咁快又可以再起飛。本來今朝
（１０日）恆指開市微微踢高８點後，大部分時間都窄幅上落，小傳仲以為會係悶市一場。點知
食完中午飯之後，好友趁特首林鄭月娥聽日（１１日）公布首份施政報告前，突然出兵掃高香江
磚頭佬，恆地（０００１２）、新世界（０００１７）開晒Ｐａｒｔｙ！最緊要係，大象
（００００５）有高盛點名升目標價後，當堂精神百倍，一度見７９﹒６５銀創九年新高添！
　　磚頭佬加大象領軍，魚缸再現升勢，完場踢起１６４點報２８４９０。勁！中字輩早排升得
咁勁，仲要Ｄ時間回氣，國指全日只象徵式揚３３點報１１４１８。
　　缸友有番Ｄ信心，魚缸又旺場番，全日成交約有９１５億銀左右。
　
＊首置上車盤農地亦有價，地主手拖手缸邊笑哈哈＊
　
　　林鄭聽日公布任內首份施政報告，佢之前話會補充喺政綱入面提出嘅「首置上車盤」建議，
小傳收到風，當局建議推出嘅港人首置上車盤，考慮以公私營合作模式推行，入息限額仲高過居
屋添！除此之外，就無傳出任何新辣招嘅消息，香江磚頭佬放下心頭大石！當中，新世界
（０００１７）係今日最威藍戰士，全日有逾５巴仙落袋報１２﹒０４銀，實在可喜可賀！農地
概念股恆地（０００１２）彈高逾３巴仙，埋單５５﹒２５銀，同時仲獲大和重申「掃貨」評級
，「他屐」維持６３﹒５銀添；街坊新地（０００１６）亦吹起近２巴仙，報１３１﹒８銀！
　　眾安在綫（０６０６０）噚日創上市新高見９７﹒８銀後見獲利回吐，今日輕微反彈至
９２﹒７銀之後，沽壓漸增，更一度跌到得番８４﹒８銀失守埋８５銀添，尾市跌少好多，但仍
逆市無咗逾２巴仙，報８８﹒８銀。
　　大象（００００５）將會喺後日（１２日）除淨，兼獲高佬將「他屐」由８３銀升至８７銀
，評級就維持「掃貨」評級，全日成功夾高逾１巴仙，收報７８﹒６銀，盤中一度高見
７９﹒６５銀兼創埋九年高添，勁！
　
＊大象會跳舞眾安續回吐，ＱＱ輕踏前街坊高高高＊
　
　　雖然魚缸上半場嘅走勢比較悶，股王ＱＱ（００７００）亦只係微微踢高近１巴仙，報
３５１﹒２銀，但同佢有關嘅親朋戚友，今日就輪住飛起喇！當中，華誼騰訊（００４１９）彈
高３４巴仙，以全日最高位０﹒５１銀收市，創近１０個月以嚟嘅高位，成交高達４﹒１９億，
勁！恆騰網絡（００１３６）自從８月中開始已經反覆炒高啦，今日都仲有力，跳起近９巴仙，
報０﹒４２５銀，市值曾經一度升破３００億銀，勁！
　　仲有，金山軟件（０３８８８）都衝前咗近５巴仙，報１９﹒４２銀，高見過１９﹒５４銀
，升破五十天線（１９﹒２３６銀）。
　
＊阿里甚靚仔親戚好好揮，國電力供股表現有點曳＊
　
　　噚晚喺花旗國嗰邊阿里巴巴股價造好，踢高近２巴仙收報１８２﹒０９美銀，仲曾經一度破
頂添！香江呢邊嘅親朋戚友即刻叨叨光。阿里健康（００２４１）最多曾衝前過１５巴仙見
４﹒６２銀，最後跳起近５巴仙，報１９﹒４２銀；海爾電器（０１１６９）有瑞信唱好，第一
次就畀個「跑贏大市」嘅評級，飛起４巴仙，報２０﹒３５銀，盤中見過２０﹒６銀，一次過升
破五十天同百天線；中國動向（０３８１８）彈高近８巴仙，報１﹒４９銀；雲鋒金融
（００３７６）衝前近１巴仙，報７﹒０８銀；阿里影業（０１０６０）跳起近６巴仙，報
１﹒３４銀。
　
＊通達搞分拆有貨開心笑，集成與盛良逆市齊插水＊
　
　　中國電力（０２３８０）宣布計劃「三供一」，集資最少２０億銀，雖然同時獲法巴同中信
建投唱好。法巴將評級由「持有」調升至「掃貨」，「他屐」就由２﹒７４元升至２﹒８５元；
另一邊廂，中信建投就首予「掃貨」評級，「他屐」２﹒８銀。之不過，要做「伸手牌」，捱沽
難避免；隻股全日仍跌逾５巴仙，報２﹒４７銀。
　　通達（００６９８）擬分拆手提同埋平板電腦外殼製造業務喺主板上市，仲會以特別中期息
向現有股東作實物形式分派，每持有４０股獲派一股，全日開心飛起近４巴仙，報２﹒２１銀。
　　中國集成（０２９９９）話已經通過咗「二十合一」嘅普通決議案，結果全日大插４１巴仙
，埋單０﹒１１８銀，係全日表現最差嘅魚毛。盛良物流（０８２９２）噚日收市後話，會同華
晨汽車集團附屬華晨國際汽貿及上正大，就建議喺神州成立一間合資公司訂諒解備忘錄。盛良今
日重歸魚缸之後，全日最多飛起至４﹒６銀，未幾就突然被人係咁質，結果全日冇咗２８巴仙，
報２﹒８８銀，慘！請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。