按盤價 
《小傳日記》侵侵果然係「找數真漢子」，喺未做花旗國揸ＦＩＴ人嘅時候，已經講過話會
廢除前總統奧巴馬任內搞嘅政策，繼之前醫保方案後，侵侵又退出伊朗核協議，仲話會對伊朗實
施更嚴厲出口制裁。伊朗揸住唔少石油，又同時係油組第三大成員國，呢次制裁令唔少缸友認為
，中東石油供應會再度緊張，搞到油價今個禮拜都彈起咗唔少。
環球魚缸嘅氣氛近排都死氣沉沉，難得有返油價跳彈床嘅好消息刺激，除咗「三桶油」彈起
之外，ＱＱ（００７００）今朝仲衝破埋４００蚊大關，帶動魚缸朝早高開１８０點，之後仲最
多升咗３１５點，高見３０８５１點。
到咗下晝，ＱＱ仲愈戰愈勇，最多彈高３巴仙，高見４０６﹒６銀，而ＡＩＡ
（０１２９９）都跳起超過兩巴仙，但內銀股今日唔多爭氣冇乜動靜，魚缸大部分時間都升唔過
３００點，最終埋單升咗２７３點，報３０８０９點。全日成交９３１﹒７億銀，較噚日多近
１１巴仙，
ＱＱ就領漲一眾重磅藍戰士，全日跳起近３巴仙，報４０６﹒２銀，為升幅第二大藍戰士。
ＡＩＡ就升咗兩巴仙，報７１﹒１銀。大象（００００５）都彈起超過１巴仙，報７７﹒１銀。
＊超人終榮休嚟緊多息收？油價創新高油佬續風騷＊
小傳嘅偶像誠哥今日「Ｌａｓｔ Ｄａｙ」，亦都係最後一次主持股東大會，唔少長情嘅缸
友都表示好唔捨得，事關長揸嘅缸友身家都唔知升咗幾多倍。對於自己公司股票，誠哥更加好有
責任話，只會買入唔會掟貨，因為要考慮埋其他缸友利益！誠哥榮休前仲向缸友大派定心丸，話
如無意外，未來派息只會多唔會少，一於有錢齊齊搵！
不過，長和系街坊今日表現就唔算好突出，長和（００００１）同電能（００００６）跌咗
唔夠一巴仙，長建（０１０３８）就升咗唔夠１巴仙，報６２﹒６銀。長實（０１１１３）就冇
乜點郁，報
６７蚊。
另一焦點，國際油價噚日應聲彈起超過３巴仙，布蘭特期油更喺三年半高位插旗，「三桶油
」今日繼續大發神威，對油價變動最敏感嘅中海油（００８８３）就抽高近３巴仙，報１３﹒９
銀。中石油（００８５７）就跳高近兩巴仙，報６﹒０５銀。中石化（００３８６）一樣升咗近
兩巴仙，報８蚊。
＊舜宇縮晒水瑞聲走得帥，華虹績前衝中芯氣勢虹＊
舜宇（０２３８２）公布上個月嘅手機鏡頭出貨量，按年增加咗六成，好過預期，仲有大摩
同埋摩通齊齊唱好添，刺激股價喺初段最多曾經跳起近半成，不過開心得一陣就縮晒水喇，仲曾
經倒跌過。最終就只係輕輕踢高近１巴仙，報１４３﹒３銀。街坊瑞聲（０２０１８）雖然被瑞
信毫不留情地大削「他屐」，由２０７銀一下子降至得返１４３銀，不過佢今日表現仲好過舜宇
，彈起近２巴仙，收報１１９﹒５銀。可能缸友憧憬佢下星期一（１４日）份季績有驚喜？
半導體佬氣氛好熱鬧，成班齊齊衝前。所以即使中芯（００９８１）首季賺少咗近六成，佢
都一樣照升近６巴仙，埋單報１０﹒７８銀。街坊華虹（０１３４７）今日收市後都派成績，鑊
氣仲勁，收市跳起８﹒３４巴仙，報１９﹒４８銀。
＊煤價繼續飆神華開心跳，賭佬無力水美高梅愁緒＊
光大證券出咗份報告，話祖國進口煤政策收緊，帶動今個星期動力煤價繼續上漲，一眾煤炭
佬齊齊開ｐａｒｔｙ！神華（０１０８８）飛起逾３巴仙，報２０﹒４５銀，唔單止突破咗５０
天線（２０﹒３９９銀），仲做埋最好表現藍戰士。
街坊兗煤（０１１７１）都一樣造好，彈高半成，埋單報１０﹒９２銀；伊泰煤炭
（０３９４８）就跳起近１巴仙，報９﹒３銀。
大灣區規劃有望今個月出台，不過濠賭佬普遍無咩力水，永利澳門（０１１２８）碌低
０﹒３巴仙，埋單報２９﹒８銀；美高梅（０２２８２）跌低近１巴仙，埋單報２３﹒１銀。銀
娛（０００２７）就較好，衝前近１巴仙，報６８﹒４５銀。
＊再炒易手升１６４７醒，中能建好慘食白果喊喊＊
ＳＨＩＳ ＬＴＤ（０１６４７）噚日復牌宣布易手之後，已經炒起８５巴仙，估唔到今日
都仲有得彈起近７６巴仙，收報３﹒２２銀。兩日已經累漲咗２﹒２５倍，勁呀！
另一條魚毛就高處不勝寒，正力控股（０８２８３）連日炒高，不過今日午後就急瀉過最多
近五成。全日仍然碌低近４１巴仙，報２﹒９３銀，但月內都仲累漲４５巴仙。
合富輝煌（００７３３）公告話，會夥拍保利房地產拓展地產代理業務，帶動佢初段飛起過
１６巴仙，不過最終縮咗水，只係踢高９巴仙，報３﹒７７銀。
中國能源建設（０３９９６）勁陰公豬，好夢落空。ＭＳＣＩ宣布，唔會將納入中國指數，
搞到呢條魚毛喊都無用，跣低１９巴仙，報１﹒２４銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》如何搞好家庭關係？關係破裂幾時要放手？修補關係切忌讓XX充昏頭腦！► 即睇
