《古臣周記》中東局勢緊張加劇，中線部署中石油追落後！

　　《古臣周記》中東局勢緊張關係升溫，繼沙特阿拉伯煉油設施喺上月中遇襲之後，上星期一
艘伊朗運油船亦受襲爆炸，孖屐擔心影響石油供應，油價亦因此一夜飆升。上星期，花旗國總統
侵侵（特朗普）宣布，將會由敘利亞北部撤兵，呢個舉動無疑令區內局勢更添不明朗因素。
　　過去油價好大程度上都受地緣政治等因素主導，未來走勢會喺點？三桶油又應該點樣部署？
阿臣今日就同大家簡單講下石油股呢個板塊！

＊花旗國撤兵敘利亞添不穩定因素＊
　　
　　中東石油資源豐富，亦因為咁經常成為大國博奕嘅戰場。上月１４日，沙特嘅石油設施遭到
襲擊，令成個國家嘅原油產量因此減半，國際油價因此急升逾一成。一向外交上支持沙特嘅花旗
國就將矛頭指向伊朗。區內緊張局勢持續，上星期五（１１日），伊朗一艘運油輪爆炸，有指唔
排除係同恐怖襲擊有關。但呢次對油價嘅刺激就相關溫和，只係升咗約２巴仙。
　　另一邊廂，花旗國總統侵侵喺今個月宣布從敘利亞北部撤軍，話係為咗擺脫荒謬同無休止嘅
戰爭。有報道引述花旗國國務院嘅高級官員講，目前撤走嘅美軍只有２０人左右，絕大部分即約
１０００名駐當地嘅美軍仲留守喺度。有分析指，侵侵咁做係要兌現競選承諾，並將外交重心轉
移番去亞太地區。但侵侵撤兵嘅舉動就被其他盟友甚至黨內抨擊，指責佢不負責任。
　　如果花旗國未來逐步撤離中東地區，土耳其將會對當地庫爾德族人進行更嚴厲嘅打擊，仲有
機會令極端組織「伊斯蘭國」趁政治亂局重組勢力，嚴重威脅區內嘅穩定。

＊沙特恢復產能，焦點落在明年會否延長減產＊

　　除咗地緣政治嘅因素，石油供求亦左右油價嘅長遠走勢。喺供應方面，目前有１４個成員國
嘅石油出口國組織，又稱油組（ＯＰＥＣ）係最主要嘅石油供應組織。喺油組九月嘅報告顯示，
組織每日產量按月下降１３２萬桶，至每日２８４９萬桶；而全球最大產油國沙特九月嘅原油產
量因為遇襲事件，按月減少６６萬桶至每日９１３萬桶。不過，沙特能源大臣阿卜杜勒阿齊茲親
王日前（１５日）就話，１０月同１１月嘅石油產量已經可以恢復番正常水平，達到每日９８６
萬桶。
　　隨住沙特恢復產能，油價已經回落返去飆升前水平。考慮到明年全球經濟將會放緩，降低對
石油嘅需求，油組將會喺１２月開會，決定會唔會延長減產協定。油組、俄羅斯同其他產油國喺
今年１月以來實行每日減產１２０萬桶，以支持油價，協議之前獲延長至明年３月。如果進一步
延長協議，對中長期油價會帶來支持。

＊美國頁岩油產量上升，但油組下調非產油國明年增幅預測＊

　　另外，侵侵上任以來一直都炮轟高油價，並要求油組唔好減產。其實，花旗國產油嘅規模亦
唔細，更一度超越沙特。根據花旗國九月公布嘅數據，９月頁岩油每日產量達８７７萬桶，連續
第七個月上升並創歷史新高，而１０月嘅產能更增至８８４萬桶。不過，油組９月嘅報告預計，
基於哈薩克斯坦同俄羅斯預期增長產量下滑，將明年非油組國家產量增長預測下調５萬桶至每日
２２０萬桶。
　　喺需求方面，國際能源署（ＩＥＡ）上星期五因為全球經濟成長減緩石油需求，再度下調今
明兩年嘅石油需要預測，今年同明年嘅每日產量增幅分別下調６﹒５萬桶和１０萬桶，至每日
１００萬桶同１２０萬桶。不過，目前花旗國同神州有望盡快落實首階段嘅貿易協議，之前同歐
洲嘅貿易戰亦暫時停火，加上有傳米字國同歐盟嘅脫歐協議磋商當中，雙方分歧已明顯收窄，漸
趨穩定嘅經濟形勢有望改善原油需求。

＊三桶油點部署？＊

　　雖然明年需求可能會減少，但近期地緣政治局勢愈來愈緊張，亦相信油組為咗穩定油價而好
大機會延長減產，所以阿臣睇好油價繼續有上升空間，但長遠大升嘅機會就較微。因此，對油價
比較敏感嘅中海油（００８８３）就唔會掂住，而中石化（００３８６）做開煉油產品，油價上
升反而令佢股價受壓。而喺股價走勢方面，近日中石油（００８５７）呈雙牛買入訊號，走勢好
過中海油同中石化，加上股價算接近年內低位，可望追落後。因此，阿臣打算趁中石油回落至
５０天線時，大約３﹒９銀水平買入一手。
　　另外，之前阿臣講金嘅時候提過，會趁ＳＰＤＲ金ＥＴＦ（０２８４０）跌穿１１００銀水
平買入部署，而今日呢隻股份都跌穿呢個水平，所以阿臣就喺現價買入一手作中長線部署！

　　表列截至１０月１６日（１１：２０ａｍ止）阿臣投資組合表現：

　　股份　　　　　　股數　　　　　平均買入價　　　　　　現價　　　　　　總值
　　－－－－－－－－－－－－－－－－－－－－－－－－－－－－－－－－－－－－－－－－
　　港股：
　　金界　　　　　　２０００股　　　　９﹒６５元　　　１３﹒４０元　　２６８００元
　　煤氣　　　　　　１０００股　　　１６﹒００元　　　１５﹒２４元　　１５２４０元
　　ＳＰＤＲ金ＥＴＦ　　１０股　１０９７﹒００元　１０９７﹒００元　　１０９７０元
　　－－－－－－－－－－－－－－－－－－－－－－－－－－－－－－－－－－－－－－－－
　　股票市值　　　　：　　５３０１０元
　　剩餘現金　　　　：　１０９８２１元　　
　　組合淨值　　　　：　１６２８３１元
　　組合本月收益表現：　　　＋１﹒７％（截至上月底止組合淨值：１６０１０５元）
　　組合累計收益表現：　　＋５５﹒１％（本金１０５０００元計）（２０１６年８月開倉）

　　＊數據截至今日１１：２０ａｍ