《小傳日記》ＱＱ破頂好風騷，魚缸成交年半高！

　　《小傳日記》聯儲局聲稱維持今年合共加息３次嘅預期，孖屐暫時毋須擔心加息步伐會加快
，魚缸噚日（１６日）急升近５００點。到夜晚，「侵侵」發表預算案，話會增加對醫療行業嘅
監管成本，累到花旗魚缸回軟返。荷蘭方面，執政黨維持最大黨地位；歐洲一隻潛在「黑天鵝」
飛走咗，大家都放心Ｄ！
　　香江呢邊今朝繼續強勢，高開８７點報２４３７６，仲一度突破舊年最高位２４３６４點，
創１９個月以嚟新高２４３８５。雖然之後有啲高處不勝寒，魚缸曾經倒跌返５０點，但最終埋
單計數都有２１點落袋，收２４３０９點。至於國貨佬就唔見咗１２點，收報１０５１３。
　　魚缸升勢似乎減弱咗，不過全日成交都仲有１２１３億銀，比噚日多近１９巴仙，亦係逾年
半以嚟最高紀錄。成交咁激，但生發發就無乜心機，跟市跌近半巴仙。
　
＊黑天鵝飛走好友即放心，成交千二億發發不興奮＊
　
　　股王ＱＱ（００７００）噚日係港股通（深）成交金額最多股份，祖國缸友應該對佢下星期
三（２２日）派嗰份業績好有信心。ＱＱ有北水滋潤，今日一開場就以破頂姿態登場，之後更再
上一層樓，去到２２２﹒８銀。大摩近日已奏起「魔笛」，維持增持評級，目標價２４０銀不變
。今日ＱＱ散場報２２２銀，有近１巴仙落袋。未上車嘅缸友，不妨考慮吓。
　　大象（００００５）又開始頭痕了，ＣＥＯ歐智華接受米字國稅務部門調查，睇吓有無涉及
不當稅務行為。雖然歐智華出年就會退任，但揸ｆｉｔ人被查，大象點都無心機，收市跣低唔夠
１巴仙，報６４﹒１５銀。
　
＊ＱＱ創新高大象不風騷，花旗來踐踏煤氣難風騷＊
　
　　神華（０１０８８）上個月商品煤產量升咗１４巴仙，今日放榜嘅佢，率先衝前近１巴仙，
報１６﹒４６銀。阿爺話煤價鋼價無大幅上漲條件，唔知之後會唔會影響到佢呢？
　　煤氣（００００３）舊年純利７３﹒４１億微升０﹒５巴仙。花旗話表現麻麻地，即使佢派
末期息２３仙，兼十送一紅股，依然腳軟近１巴仙，報１５﹒０８銀。
　　而金沙（０１９２８）宣布派末期息１蚊，結果行前１巴仙，收３５﹒１銀。
　　新秀麗（０１９１０）之前拎成績單，全年賺２﹒５６億美金多三成，賓架瑞信、野村齊齊
唱好升目標。佢今日再踢高逾９巴仙，埋單２７﹒８銀。
　
＊績靚大行讚秀麗真威威，砵砵開倒車表現非常曳＊
　
　　中字輩即將進入放榜高峰期，早排開晒ＴＵＲＢＯ嘅砵砵車股，就喺下星期放榜前向後褪，
當中下星期五（２４日）派成績嘅長汽（０２３３３）就以高達２７億銀成交入後波近９巴仙收
市，報８﹒８４銀，係全日第４多成交額魚毛。
　　街坊吉利（００１７５）成績就會喺早兩日，即係２２號揭盅，不過都難逃獲利回吐厄運，
收挫１０巴仙報１１﹒２４銀，成交金額２８億銀，係第３多成交額嘅魚仔。仲有廣汽
（０２２３８）跌得更勁，由２月份約１０月左右一路升到去近日約１４銀高位，足足累升咗約
四成。難怪埋單要瞓低１０巴仙收１２﹒３６銀喇。
　
＊雲裳研轉板踢高來慶祝，２６９批盪教育有錢途＊
　
　　雲裳衣（０８１２７）話，研究緊轉主板上市，一支火箭飆高４８巴仙，報３﹒７銀，仲係
全日最叻嘅魚仔。
　　中國資源交通（００２６９）溢價近５８巴仙配股，買牧草同農產品種植商六成權益，結果
亦跳高逾１７巴仙，報０﹒１４９銀。
　　楓葉教育（０１３１７）就獲券商中信建投力讚，升級籲「買」，再上調「他屐」至７﹒７
銀，應聲彈起近１０巴仙，收６﹒３８銀。之不過，都唔及得街坊大地教育（０８４１７），佢
噚日爆高近４９巴仙，今日又再飛起近４３巴仙，收報１﹒７銀。勁！假期愉快！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。