《小傳日記》新年靈猴好百厭，「熊」盤低收七百點

　　《小傳日記》正當缸友們高高興興拜年之際，外圍魚缸卻跌個四腳朝天，花旗魚缸連跌４日
期間唔見約五百點失守埋萬六關。美聯儲主席耶倫隨即穩定軍心，暗示受外圍經濟影響，可能會
放慢加息步伐。之不過，畢竟假期間外圍已經跌足咁多日，ＡＤＲ指數跌到不堪入目，魚缸喺猴
年首個交易日「熊」盤低開八百點左右再失十天線（１９１８４）同埋萬九關，之後窄幅上落，
全日波幅唔夠兩百點，魚缸最終插７４２點，報１８５４５點，曾創自２０１２年６月低位。
　　Ａ場仲係忙緊拜年同搶紅包，仲未開市，但國貨佬率先唔見３９６點，收報７６５７點，亦
都曾創近７年低位。缸友可能仲未放完假，今日主板成交只有６６９億銀。

＊外圍日日插紅盤要大撻，低開復低收淡友戰鬥格＊

　　大象（００００５）再度傳出今個星期日會就係咪搬屋扑鎚。未搬家，先遭大摩唱淡，削價
至５４銀，評級降至「減持」。大笨象今日碌穿５０蚊，得番４９﹒５銀，無咗逾５巴仙。至於
渣打（０２８８８）仲差，遭美銀美林削目標價，蒸發咗逾７巴仙，收報４６銀。
　　超人一號（００００１）收到歐盟委員會飛鴿傳書，反對３英國與Ｏ２合併，認為會損害英
國流動電話市場競爭。超人一號碌低近２巴仙，收報９３﹒６銀。長江基建（０１０３８）表現
頑強，逆市踢高逾１巴仙，收報７４﹒２銀，仲創埋上市新高！
　　生發發（００３８８）總裁李小加開年指今年壞消息不斷，考驗缸友嘅智慧同耐心。生發發
今日受挫，碌低逾２巴仙，收報１６３﹒２銀。大大隻嘅ＱＱ（００７００）更趴低近６巴仙，
收報１３５﹒９銀。缸友睇嚟真係要相當耐性先能夠破釜沉舟！

＊藍籌幾盡墨跌市搵奇葩，信置新世界今天誇啦啦＊
　　
　　聯儲局主席耶倫見到近排環球孖屐風高浪急，出席花旗聽證會都暗示可能要減慢加息。睇怕
今年花旗幾時加息又有得玩「估」遊戲。加息放慢，信和置業（０００８３）逆市踢高逾２巴仙
，收報１０﹒２２銀。新世界（０００１７）亦企穩升唔夠半巴仙，收報６﹒０６銀。兩隻能夠
逆大跌市向上嘅藍戰士，請鼓掌！
　　其他本地磚頭股就繼續隨市碌低，長實地產（０１１１３）同新地（０００１６）就齊齊唔
見逾２巴仙，分別收報３９﹒３５銀及８０﹒６５銀。
　　九倉（００００４）旗下荷里活廣場農曆年假生意額升咗一成，隻股早段都有個一輪靚仔，
可惜最後都未能迎難而上，失落逾３巴仙，收報３６﹒０５銀。

＊油價再尋底三桶油閉翳，內險與內銀你曳我更曳＊

　　油組最新一份月報指出，今年油市供應過剩達７２萬桶，多過上次月報估計嘅５３萬桶。加
上油價繼續疲弱，「三桶油」再成捱打目標，中海油（００８８３）全日無咗逾５巴仙，收報
７﹒４５銀。中石油（００８５７）同中石化（００３８６）亦分別碌低５巴仙至６巴仙，收報
４﹒４７銀及４﹒１銀。
　　魚缸慘遇暴風雨，內險、內銀成重災區。財險（０２３２８）料舊年多賺四成，不過今日仍
唔見逾２巴仙，收報１１﹒８８銀，但已經係跌得少。壽仔（０２６２８）、平保
（０２３１８）同中國太平（００９６６）就分別碌低近６巴仙至７巴仙，仲要鬥創新低添。另
外，工行（０１３９８）同中行（０３９８８）齊齊唔見約４巴仙。

＊金價越千二金股跳隻舞，日圓急升值東瀛遊很惱＊

　　「孖屐」避險情緒高漲，缸友們掃高金價至１２００美金水平，仲順手炒高埋金股；靈寶黃
金（０３３３０）、招金礦業（０１８１８）同埋紫金礦業（０２８９９）逆市大升介乎近８巴
仙至一成。
　　市場亦有大量資金流入日圓避險，搞到日圓係咁升值，美金兌日圓已經落到去１１１水平。
啲Ｙｅｎ貴曬，東瀛遊（０６８８２）即刻挫近６巴仙，收報２﹒１３銀。
　　１月底大健康（０２２１１）急瀉５９巴仙，原來係大股東被強制平倉，另外２月初訂立嘅
配售協議就因為市場不穩定而要終止，結果今日復牌後碌低一成半，報０﹒９５銀。請請！
　　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。