《小傳日記》ＰＭＩ醒神，魚缸瞌眼瞓；中移受重創，街坊齊腳震！

　　《小傳日記》今日（２３日）個市真係好悶，全日高低波幅只得約１７５點；成交靜到拍烏
蠅，全日得５０６億銀，又少咗近１８巴仙，再一次創約三個月新低。
　　其實，近排魚缸走勢愈嚟愈唔受外圍影響，就算出面風大雨大，都照舊喺二萬三關窄幅上落
。好似噚晚（２２日）道指跌咗成１５３點，結束三日升勢，香江今朝都只係低開約百點，之後
仲因為匯豐中國１０月ＰＭＩ初值去番５０﹒４，略勝預期兼創三個月高位，刺激魚缸彈番上去
。不過，Ａ仔場反高潮，一度跌穿二千三關，搞到香江都跌多咗Ｄ。好彩，恆指完場都只係唔見
７０點收報２３３３３；國貨佬仲有１１點落袋添，收１０４３８。
　　今日個市跌得唔多，但原來有成９０８隻股份都向下碌。還記得早幾日小傳講過，只怕暴風
雨前夕係特別寧靜嗎？缸友們，打醒十二分精神睇實個市啦！

＊美股急回吐Ａ仔好曳曳，電信族三寶今回真閉翳＊

　　祖國電訊股就全線「扯白旗」，傷得最重嘅係今日收市後放榜嘅聯通（００７６２）。市傳
聯通同中電信（００７２８）申請第三批４Ｇ實驗試點，涉及２３７個城市；咁積極發展４Ｇ，
當然係好消息啦！不過，可能缸友見祖國移動（００９４１）份季績唔多省鏡，所以對聯通都唔
敢抱太大期望，加上個市又難捉摸，都決定要錢唔要貨，搞到聯通收市碌低３﹒５巴仙收
１０﹒９２銀，創約半年新低。中電信都難逃一跌，埋單急挫逾逾２巴仙收４﹒６９銀。　
　　一哥祖國移動都跌得亦好勁，唔單止９０蚊不保，仲以近全日最低位收市，報８８﹒１銀大
跌逾３巴仙，推低大市５４點，成交高達逾２７億銀，遠遠拋理所有股份。

＊油價碌呀碌危危８０蚊，油價勢跟貼重貨心都震＊

　　仲有另外一個「計時炸彈」，就係反映全球經濟前景嘅油價。花旗國原油庫存連續兩星期大
幅增加，搞到油價又再次跌到嚇親人，１２月期油足足唔見逾２巴仙，每桶只值８０﹒５２美金
，８０銀大關真係指日可穿…
　　除此之外，富瑞呢個時候仲踩多腳，下調油價預測，仲將三大石油股嘅目標價都通通降低。
最受油價影響嘅中海油（００８８３）就率先「中伏」，今日埋單碌低近２巴仙收１２﹒４４銀
，再一次跌穿十天線（約１２﹒５銀），如果連今個月中１１﹒９８銀低位都失守埋嘅話，下一
站隨時１１銀見。姊妹公司中海油服（０２８８３）都遭受同一命運，急挫近５巴仙收
１８﹒０８銀。反而街坊中石油（００８５７）同中石化（００３８６）就夠晒硬淨，全日無咩
升跌。

＊大象好硬淨懶得理風雨，阿爺夠關顧鐵路開快車＊
　
　　仲有呢排靜咗好耐嘅大象（００００５），今日雖然除淨，不過股價都企得好穩，尾市嗰陣
買盤仲明顯湧晒出嚟，倒升番０﹒５巴仙收７８銀，以近全日高位收市。就算有外地傳媒爆料，
集團喺米字國涉綑綁式銷售，搞到被有關當局調查，都影響唔到大象今日表現，勁！
　　另外，近日受寵嘅鐵路相關股都繼續逆市向上衝，發改委又再批復鐵路同機場項目，投資額
高達１５００億人仔。再一次獲得阿爺寵幸，一班鐵路股想唔升都難喇！北車（０６１９９）繼
續做代表，一度升４巴仙見７﹒９銀，又次破頂，埋單都有約３巴仙落袋報７﹒８４銀。其他街
坊都有１至逾２巴仙進帳，真係恨死隔籬。

＊股仔熱變冷你掟我又掟，微電子家居同樣遇重挫＊
　　
　　之前市旺，就梗係禾雀亂飛，家陣無晒方向，呆呆滯滯，好多細股都急瀉番落嚟。今日跌得
最轟烈嘅中國微電子（００１３９），以逾１﹒３億銀超大成交插低逾１９巴仙，收０﹒２７銀
。過去五個交易日，就已經蒸發咗近七成股價，差唔多打回原形，去番７月尾未炒高時嘅低位。
　　仲有中國家居（００６９２）食完午飯返嚟，突然出現「洗倉式」暴瀉，喺短短五分鐘之內
，一度重挫最多逾三成，但好快就彈番Ｄ上去，埋單都仲要唔見逾１２巴仙收０﹒８６銀，一支
大陰燭瀉穿全部平均線，認真誇張。
　　小傳溫馨提示，呢幾日天氣轉涼有雨，秋涼好添衣噢！請請！　　

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。