極速報價  |  詳細報價  |  互動圖表  |  成交  |  新聞  |  評論  |  影片  |  相關證券  |  公司資料  |  派息  |  賣空
00005 滙豐控股
即時 按盤價 升61.150 +0.050 (+0.082%)
相關新聞

03/07/2015 17:59

《小傳日記》A場續尋底,阿爺要諗計;香江難獨善,好友甚閉翳!

  《小傳日記》為咗救A場,阿爺可以去到幾盡?!眼見A場食咗瀉藥,閒閒地都唔見5、6
個巴仙,愈出手護盤,就跌得愈急;家陣連「國家隊」匯金都出手,講明會打擊惡意沽空、仲傳
出中金所臨時暫停19個沽空帳戶,總之咩辦法都出齊,但就統統無用。今日(3日)A場早上
插完一輪,一點鐘左右曾經彈一彈,點之原來係糖衣陷阱,之後愈跌愈恐慌,結果插低近6巴仙
收3686點,認真得人驚!
  香江呢邊仲要等希臘公投結果,四面楚歌之下,魚缸又點能倖存呢…跟住外圍向下碌,尾市
亦仲愈跌愈多,逾1600隻股份陣亡,唔夠100隻打勝仗,二萬六大關亦曾經失守,收市報
26064點跌218點。國貨佬指數蒸發175點收12608。
  好得人驚嘅一日,全日成交1489億銀。

*中午彈一彈彈完立即散,陽光抱大地心情卻不盞*

  中港魚缸都彌漫住恐慌情緒,咩基金互認開跑、「深港通」隨時開車等好消息都無人理會,
個個都爭相掟貨。早排牛市嗰陣,獲全城大行熱捧嘅生發發(00388)已經風光不再,今日
仲以53億大成交碌低逾3巴仙收259﹒8銀,260關不保,想撈底嘅缸友不妨比多DD耐
性,等到250蚊附近先入第一注吧。
  A場弱勢難逃,三個星期內足足暴瀉近29巴仙,創1992年以嚟最大三周跌幅。ETF
孖寶2823同2282插低3及4巴仙,總成交高達170億左右,佔大市成交逾11巴仙。
部分券商、內險股都隨市受壓,細隻D嘅第一上海更插近一成,新保(01336)大跌逾5巴
仙。

*思捷成奇葩成交有異樣,大象與渣打今天好隱陣*

  大跌市期間,都會多咗大手成交,過氣藍戰士思捷(00330)開市無耐就錄得近12億
銀大手,差唔多係全日成交咁滯!之後果然有古怪,雖然歐洲嗰邊仲係無咩進展,但思捷一度逆
市抽高一成,雖然最後打回原形,最終差唔多無升跌收7﹒25銀,但喺大跌市中算係唔錯啦!
  中廣核電力(01816)今朝一度挫近6巴仙,但11點左右突然錄得超過10億銀大手
,之後股價就逐步回番上去,結果全日僅微跌1巴仙,收報3﹒83銀,認真古怪。
  另一邊,巴西嗰邊調查大象(00005)同渣打(02888)等15間環球錢莊有無操
控外匯,巴西當局就話有強烈跡象睇到有反競爭行為。結果大象企定定收報69﹒55銀,渣打
就踢高DD收125﹒8銀。
  國貨佬嗰邊,比亞迪(01211)繼續碌,收唔見6巴仙報41銀,跌穿百天線
(41﹒22銀)見支持,但仍然係表現最差國貨佬。街坊華晨(01114)獲大摩維持
「增持」,就逆市衝前2巴仙,讚!

*車仔與軍工你低我亦低,四新丁上場榮辱相互見*

  大跌市下軍工股亦未能獨善其身,航天控股(00031)今日又跣低9巴仙,報1﹒47
銀,差唔多跌番去未炒高前約1蚊嘅水平喇…連李超人有揸住嘅中航國際(00161)都唔見
 逾4巴仙,收報6﹒46銀;中航科工(02357)就跌得最轟烈,約4億銀大插14巴仙
收6﹒29銀,大陰燭插穿百天線(約7﹒1銀)。
  今日4位新丁喺跌市日登場,表現都算對得住缸友,萬景(02193)超購約1800倍
,又夠細粒,雖然以1﹒1銀差唔多全日低位收市,但都畀比招股價0﹒8銀高38巴仙,每手
帳面賺1200銀。辰興發展(02286)收市報3蚊,啱啱好守住招股價;彩客化學
(01986)就浮水逾1巴仙咁大把,收4﹒06銀。由卜蜂(00043)以介紹上市分掛
上市嘅正大企業(03839)反而失色,開市報8蚊,但收市得番5﹒71銀,比開市價少咗
近三成!

*阿里兩姊妹齊重挫一成,細股被洗倉撻得甚誇張*

  阿里系今日就跌到一仆一碌。當中,阿里健康(00241)公布收購天貓事項將構成反收
購,已向聯交所提交新上市申請,結果唔見一成收7﹒1銀;仲未見有作品嘅阿里影業
(01060)今日亦唔見以6﹒6億銀重挫一成,慘!
  今日照舊絕大部分股份都係向下走,細價股相當淒涼,威華達(00622)入股民豐
(00279)旗下放貸業務,結果威華達今日大插近兩成,民豐亦唔見8巴仙。
  正道(01188)仲恐怖,洗倉式蒸發近四成收0﹒355銀,一支超大陰燭插穿五十天
線(0﹒515銀)及百天線(約0﹒44銀);中國瀛晟娛樂(00209)亦急瀉逾37巴
仙,兩個交易日已累跌五成,驚!假期愉快,請請!  

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式之
       申述或訂立任何建議及推薦,讀者務請運用個人獨立思考能力自行作出投資決定
       ,如因相關建議招致損失,概與《經濟通》、編者及作者無涉。

全新節目《說說心理話》原生家庭對成長有咩影響?改善溝通有計可施?► 即睇

備註: 即時報價更新時間為 28/03/2024 18:00
  港股即時基本市場行情由香港交易所提供; 香港交易所指定免費發放即時基本市場行情的網站
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力