《小傳日記》魚缸終見三字頭，ＱＱ平保要唞唞！

　　《小傳日記》相信唔少缸友噚晚都畀香江夜期嚇親，皆因竟然驚現３１３４１點癲價，大升
約１５００點，雖然收市只係升２５２點報３０１０２，但最驚驚係，生發發（００３８８）確
認咗唔係錯盤，唔少缸友都滿腦子問號。
　　點都好，既然夜期同香江ＡＤＲ最後都突破三萬關，而花旗魚缸又欣欣向榮大升，今朝
（２２日）好友都蓄勢待發，準備落場殺敵！果然恆指開市就衝高２６９點報３００８７，創十
年高位，之後由重磅大象（００００５）代替股王ＱＱ（００７００）同埋平保（０２３１８）
領軍，恆指之後飆升３８１點高見３０１９９，再創十年高位，唔少缸友都忍唔住問：唔通大時
代重臨？！
　　之不過，恆指午後明顯回復冷靜，多隻大藍戰都開始高處不勝寒，只得大象、生發發同中資
錢莊頂住，全日魚缸收市升少好多，踢起１８５點收３０００３，不過守得住三萬大關，讚；國
指埋單都只得８４點進帳報１１９５８。至於成交就唔使問，全日旺場到不得了，繼噚日直逼千
六億後，今日又再次錄得差不多成交金額，勁！
　
＊藍戰兩邊行ＱＱ終低走，生發發有力大象亦積極＊
　
　　雖然大市慶烚烚，但並唔係所有重磅藍戰都一齊升天！之前升得太多，已經連續四連陽嘅
ＱＱ，今日回氣唞唞，唔見近１巴仙，報４２６﹒８銀。仲有溫馨提示，公司下星期就會被恆指
公司降低喺魚缸嘅比重，小心成為淡友攻擊藉口。而近日一樣強勢嘅平保，今朝創上市新高
８７﹒１銀之後，亦都調頭唔見逾２巴仙，報８４﹒１銀，成為表現最差嘅藍戰士。
　　相反，大象今日接力發威，表現不知幾硬淨，跳起近２巴仙，報７６﹒９５銀，仲試過見
７８﹒１銀，創逾１個月新高。而呢兩日魚缸成交咁旺，生發發亦叨光彈高近４巴仙，報
２５４﹒２銀。
　
＊金軟賺得多好友笑呵呵，內銀氣勢勁民行勁收升＊
　
　　金山軟件（０３８８８）第三季純利增６８巴仙，瑞信唱好，但野村就維持他屐唔變，不過
今日股價都交到貨，踢起近一成，報２３﹒６５銀，成交高達近１４億銀，旺到不得了。
　　祖國華融（０２７９９）今朝錄得超過７億股市前大手交易，佔已發行Ｈ股股本近３巴仙，
每股造３﹒５３銀，涉資合共２６億銀，不過股價未見有大異動，靠穩飛起近１巴仙，報
３﹒６５銀。
　　另一邊廂，瑞信早前調整多間神州錢莊嘅他屐，預計盈利都有低至中位數嘅增長，民行
（０１９８８）、招行（０３９６８）就分別有逾４巴仙同近１巴仙進帳，報７﹒８８銀、
３３﹒３銀。至於建行（００９３９）同工行（０１３９８）就一齊衝前近２巴仙，報７﹒０１
銀及６﹒３３銀。
　
＊萬科再進攻破頂好輕鬆，藍戰士街坊也來叨叨光＊
　
　　內房佬被人搶咗咁耐風頭，今日終於威水返Ｄ啦。不得不提就係萬科（０２２０２），雖然
噚日（２１日）已經急升咗超過７巴仙，不過都依然有力再上，最多曾經升過逾６巴仙，高見
３１銀創上市新高。最終升幅收窄，不過都仲係跳高逾２巴仙，收報２９﹒８５銀。街坊融創
（０１９１８）都好強勁，踢高２巴仙，報３９銀；「四條三」恆大（０３３３３）都飛高逾
１巴仙，報２９﹒６５銀。
　　藍戰士中海外（００６８８）都唔差，午後發力最多曾升近４巴仙，高見２５﹒１銀突破廿
天線（２４﹒７６５銀），最終彈起逾２巴仙，報２４﹒７５銀；潤地（０１１０９）緊隨其後
，衝前逾２巴仙，報２２﹒２銀，高見２２﹒４５元突破十天線（２２﹒２５銀）。
　
＊半新丁失威易鑫無氣勢，鐵鳥升得勁東航係最醒＊
　
　　半新丁光芒不再就眾所周知啦，即使今日喺大市突破三萬點嘅強勢底下，都要舉白旗認輸，
閱文（００７７２）同雷蛇（０１３３７）都分別見過上市以嚟嘅低位，盤中最低見
８７﹒２銀同３﹒９銀，最終分別跌低近５巴仙同逾１巴仙，報８８﹒５５銀同埋４﹒０４銀。
　　易鑫（０２８５８）就比較反覆，雖然同樣都係創過上市新低，不過去至中段突然有力拗腰
反彈喎，真係估佢唔到，彈高近４巴仙報７﹒３８銀，可惜都仲係低過７﹒７銀嘅招親價。
　　中資航空佬今日就夠晒架勢，南航（０１０５５）表示有意擴充中美航班，刺激股價最多彈
起過１２巴仙，高見７﹒５銀，最終跳起近９巴仙報７﹒２６銀；國航（００７５３）都唔弱，
高見９﹒２９銀創逾兩年高，跳高近７巴仙收報８﹒８３銀，係是日最叻國貨佬；東航
（００６７０）都創過逾兩年高，衝前１１巴仙，報４﹒９２銀，叻！請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。