《小傳日記》魚缸向下碌，手機佬想哭；唔夠九百億，成交係咁縮！

　　《小傳日記》花旗國魚缸上星期五（２０日）舉晒白旗，道指收低２０１點至２４４６２，
除咗科技佬陣亡拖累外，美債收益急升，都引發資金流走嘅擔憂。至於香江呢邊嘅走資恐慌，就
總算暫告一段落，但係前景未明，缸友仍然抱觀望態度。香江魚缸繼續喺就快痴埋一齊嘅平均線
度浮浮沉沉，今日（２３日）收市仲要唔見１６３點報３０２５４；國指收低５４點報
１２０００。成交就愈來愈靜，比上星期五少咗逾１１巴仙得番８８２億銀，係今年以來最少成
交嘅一日呀（唔計２月１５號半日市）！
　　炒股不炒市下，個別板塊受消息主導，主要嘅焦點包括，手機設備孖寶驚咗蘋果公司成績差
，骨牌效應一齊跌；大象（００００５）炒加息及回購，逆市密密升；平保（０２３１８）炒分
拆平安好醫生（０１８３３）上市等。
　　
＊ＱＱ無心機捱打有點悲，好醫生招股平保即歡呼＊

　　外圍科技佬腳軟，連累埋股王ＱＱ（００７００）被人質，差ＤＤ就跌穿３９３﹒４銀今個
月最低位，慘。雖然各大行基本上都繼續睇好，而公司旗下騰訊音樂亦有傳下半年去花旗上市，
但都敵不過淡友呢排嘅攻擊，收市都要碌低近２巴仙報３９４銀，距離１０天線（約
４０５﹒８２銀）又遠咗ＤＤ喇。
　　講開上市，平保旗下有「平安好醫生」之稱嘅平安健康醫療，喺今日正式開始招股！等咗咁
耐，終於等到今年第一隻「巨無霸」上市，各大券商早已預留數以百億計嘅孖展額。有券商估計
，平安好醫生將會超購５００倍，可能要認購２００手先獲得１手，囝囝咁受歡迎，平保當然威
到盡，一度逆市跳起逾２巴仙報８３﹒３銀，不過收市前縮番，只係漲近１巴仙收８２﹒０５銀
。

＊大象炒放榜８０蚊在望？聯通季績靚股價好標青＊

　　重磅大象呢排表現都非常唔錯，原來不知不覺間，已經由月初約７２﹒４銀，密密咁升到去
７７銀樓上，連５０天線（約７６﹒８銀）都收復埋。除咗炒加息憧憬外，業務方面，公司啱啱
喺米字國開咗股東周年大會，主席杜嘉祺重申，喺可見將來嘅年度派息水平，都會維持喺每股
５１美仙；而新任ＣＥＯ范寧就放風話無改變回購政策，喺合適時機會再考慮。缸友即刻聯想到
下個月４號，大象派季績時可能會有消息，齊齊掃貨等揭盅，今日最高去到７７﹒４５銀，但收
市前跟市腳軟，最後只微微踢起０﹒３巴仙收７７銀，不過如果成績靚，要上番８０蚊都唔係難
哦。
　　藍戰聯通（００７６２）就喺上星期五收市後，公布一份省鏡成績表，首季多賺２﹒５倍至
３０億人仔，好過孖屐預期，富瑞仲加多句話，聯通仲係被低估當中，叫買入目標望２３﹒６３
銀添！聯通當然開心衝前逾３巴仙收報１０﹒７４銀。

＊唉瘋銷量減手機佬齊喊，藍戰位置危聯想好閉翳＊

　　手機設備孖寶繼續做「難兄難弟」，全因為有分析指蘋果嘅「唉瘋Ｘ」（ｉＰｈｏｎｅ　Ｘ
）可能會喺今年停產，市場就繼續擔心唉瘋嘅銷量，搞到手機佬氣氛唔太好。舜宇
（０２３８２）碌低近７巴仙，報１３２﹒７銀，５０天線（１３８﹒８３銀）都穿埋，係是日
表現最差藍戰士。街坊瑞聲（０２０１８）就好少少，但其實都要跌２巴仙，報１１９銀。
　　聯想集團（００９９２）今日就慘喇，唔單止繼續受花旗國嘅間諜指控影響，市場有分析認
為，聯想集團有可能會喺下個月４號收市後公布嘅恆指季檢，被剔出藍戰士行列，嚇到佢一開市
就急挫過近６巴仙，低見３﹒５８銀創六年半低。好彩之後都收復返部分失地，全日只係跌低
０﹒５巴仙，報３﹒７７銀。
　　
＊季績勝預期ＡＳＭ彈起，炒風難持久華虹唞一唞＊

　　ＡＳＭ（００５２２）首季賺逾６億銀，雖然按年計減少１６巴仙，不過都比預期好。公司
預計神州加快晶片發展，公司暫時未見到貿易戰對訂單有實際影響。野村就睇好公司，將他屐升
到１２５銀，評級「掃貨」，但都唔夠花旗睇得「牛」，讚公司主動式鏡頭導位設備繼續增長，
上望１７２銀添呀！難怪股價埋單計有近２巴仙進帳，報１１０﹒４銀。
　　街坊方面，上星期炒祖國會加速發展半導體行業，不過今日氣勢減弱，華虹（０１３４７）
唔見１仙，報１８﹒４６銀，離上市新高１９﹒８８銀又遠咗一步！獲阿爺力撐嘅中芯
（００９８１）亦高處不勝寒，回軟近３巴仙，報１０﹒３４銀。
　　個別魚毛當中，細細粒嘅煜榮（０１５３６）喺２月初宣布，控股權將會易手至
Ｔｅａｍｗａｙ（０１２３９）副主席何笑明，之後股價都無咩鑊氣，點知今日以逾３億銀成交
炒高７１巴仙，收３﹒２４銀，創晒上市新高，勁！Ｔｅａｍｗａｙ都有近７巴仙落袋收報
０﹒０４９銀。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。