《小傳日記》俄國濕滯魚缸好閉翳，油股反彈賭仔繼續曳

　　《小傳日記》噚晚（１５日）外圍驚濤駭浪，戰鬥民族俄羅斯加息都唔多掂，盧布試過再挫
超過兩成，股市都不能倖免。「孖屐」不其然回憶起９８年俄羅斯試過違約，搞到恐慌指數
ＶＩＸ急升１５巴仙。好在油價先插後靠穩，令歐洲股市最終都能夠升逾２巴仙，一洗頹風，但
花旗個魚缸就仍然腳仔軟。
　　香江魚缸今朝都出現過一線曙光，微微高開２７點，但好快就倒跌，未捱到中午就已經試過
失守埋１０月份低位２２５６６。結果，全日恆指跌８４點，報２２５８５點。今日藍戰士表現
一般，但Ａ仔場仍然好旺，繼噚日上證綜指衝番上３０００點後今日繼續向上闖，高收１﹒３巴
仙，拖住國貨佬向上走１３２點，收報１１２６９點。
　　全日主板成交重上千億，達１０７８億銀，臨近佳節開始收爐，應該幾難再次挑選之前「８
連破」紀錄。

＊外圍繼續亂個心繼續酸，Ａ仔再抽上國貨跟一轉＊

　　賭仔今日繼續無運行，有傳聞話阿爺會加強打擊經馬交賭場嘅洗黑錢活動，會推出重大措施
打擊幾十億美金非法資金，調查人員仲可以ｃｈｅｃｋ銀聯交易紀錄云云。銀娛（０００２７）
插咗８巴仙有多，創埋超過一年低位４１﹒４５銀，真係令人心寒。除咗係跌得最甘嘅賭股外，
佢仲係表現最差嘅藍戰士，最終跌８﹒２巴仙，報４２銀。緊隨其後嘅係金沙（０１９２８），
亦都挫６﹒２巴仙，報３７﹒９５銀。
　　賭仔風光不再，阿爺堅決打貪嘅形象鮮明，加上收入數據一直麻麻，唔知幾時先升得番。習
主席將會出席澳門回歸１５周年；係咪要撈底，都係等埋主席去完馬交有咩發表先算。

＊賭仔被追掟欲博先企定，油股頁岩氣低位見回升＊

　　國際油價先跌後回穩，花旗國期油曾經創５年半低位，最後微升。睇嚟靠出口石油同天然氣
搵食嘅戰鬥民族可以喘一喘氣。雖然只係略為靠穩，但油股都反彈唔少，中石油（００８５７）
最多試過反彈近３巴仙，而最終收漲２﹒４巴仙，報８﹒２５銀。早前８銀守得好穩，無論油價
點插都跌唔穿，相信呢個水平有強大買盤支持；如果有機會再回落番去８銀水平可以考慮入番啲
短炒。而中海油（００８８３）今日都反彈番０﹒７巴仙，早幾日喺９﹒７銀左右（２０１２年
１０月低位）都有好大支持，缸友都可以諗諗博反彈。
　　反彈力道最勁嘅反而係頁岩氣股，百勤油服（０２１７８）反彈８﹒２巴仙，報１﹒３２銀
，重上１０天線（１﹒２８５銀左右），但價位都仲係屬於低水平。早前有傳油王就係為咗要做
低頁岩氣股呢個對手，先唔減產，一於以本傷人云云；之不過花旗國頁岩氣業逐漸成熟，實在好
難做得低。

＊券商碌呀碌何必問理由，君安好頭痕今天低低收＊

　　有消息話券商資本規定遲啲會出台，加埋今日Ａ仔場繼續有好表現，點知班券商表現就偏偏
走晒樣。祖國券商三巨頭以銀證（０６８８１）跌得最甘，唔見咗成３個巴仙有多，中信証券
（０６０３０）同海通證券（０６８３７）軟約２個巴仙。細細粒嘅中州證券（０１３７５）會
幫間Ａ股姐妹公司承銷配股，都唔見咗近６個巴仙，收報８﹒４１銀。
　　班香江券商又點呢？國泰君安（０１７８８）副行政總裁去咗北角飲咖啡，收市挫７﹒６巴
仙報５﹒６９銀。其他街坊都無冇運行，敦沛（００８１２）同第一上海（００２２７）分別走
低一成同８﹒７巴仙。

＊兩新股登場撻得認真傷，富貴潛三成呷哺也惆悵＊

　　臨到年尾，新股輪住上場招親，但係表現都麻麻地。今日首度亮相嘅有做殯葬生意嘅富貴生
命（０１４３８）同喺祖國搞火鍋店嘅呷哺呻哺（００５２０）。前者噚日暗盤已經唔見咗兩成
，嗰勢咁唔惦真係嚇怕咗唔少缸友。朝早一開波已經得番２﹒３６銀，之後繼續深潛，最低得番
１﹒９５銀，比招親價低３５巴仙，臨尾都叫有番啲起色，收報２﹒１銀，每手唔見咗９００銀
。
　　至於呷哺呻哺都難逃潛水嘅命運，開市冇耐就向下潛，最低見過４﹒４銀，收報４﹒５４銀
，比招親價低３﹒４巴仙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。