《小傳日記》恒大瘋炒內房Ｈｉｇｈ，ＱＱ唞氣無人Ｂｕｙ！

　　《小傳日記》花旗魚缸今晚假期休市，所以上星期五（２６日）晚已經充滿
Ｈｏｌｉｄａｙ　ｍｏｏｄ，三大指數都無咩點郁。而香江呢邊都一樣，雖然今日係期指結算日
，但係聽日（３０日）端午節期假前，缸友都無心戀戰，全日成交只得６０８億銀左右，不過當
中近８巴仙就流晒去中國恆大（０３３３３）身上，今日強勢爆升２３巴仙完場，繼續帶旺一班
二三線街坊添。
　　除咗內房佬落鑊外，電企佬都係今日焦點，不過股王ＱＱ（００７００）就選擇唞唞氣，逆
市跌逾１巴仙做咗最差藍籌，加上其他重磅藍戰都無力，恆指亦難望有超好表現，埋單只係有
６２點落袋收報２５７０１，但都叫做寫下七連升佳績；國指就象徵式行前３９點收報
１０６１９。
　
＊大市七連升今天再高收，缸邊靜蠅蠅明日爬龍舟＊
　
　　恆大繼續落鑊大炒特炒，飆升近２３巴仙，報１５﹒２銀，仲一度破頂高見１５﹒７８銀，
破過二千億市值！連帶其他神州磚頭佬都發威，融創（０１９１８）、越秀地產（００１２３）
彈高逾１０同９巴仙，收１２﹒９同１﹒４銀。摩通話，睇好碧桂園（０２００７）多過恆大，
大升「他屐」４７巴仙至１１銀，碧桂園應聲飛起逾９巴仙，收９﹒４銀。
　　瑞房（００２７２）向萬科（０２２０２）出售重慶項目逾７９巴仙權益。瑞房估計會賺到
１９﹒３億，結果跳起近７巴仙，報１﹒８９銀；萬科亦跟住衝前２巴仙，報２０﹒７５銀。
　
＊巴巴又濕平聯華即爆上，海天購餐飲你搶我又搶＊
　
　　阿里巴巴又「濕平」喇！今次被睇中嘅幸運兒，就係聯華超市（００９８０）！今朝一開市
聯華超市就「嘭」一聲炒高上去，原來阿媽上海百聯集團已率先宣布，話轉讓１８巴仙聯華超市
股權畀阿里巴巴（中國）網絡技術。雖然無講到賣幾多，但係缸友已不問價掃貨，聯華一度爆升
近３４巴仙至４﹒２１銀，之後仲停埋賽添。泊到好碼頭，聯華都急不及待復賽，中午就出通告
確認好消息，不過都係無提到價錢，缸友「謹慎」計都無進一步掃貨，埋單約有逾２４巴仙落袋
收３﹒９２銀。
　　海天天線（０８２２７）斥約一千萬人仔收購深圳上市嘅中科雲網（深：００２３０６）
０﹒３３巴仙。一睇中科雲網個名，相信唔少缸友都以為同科網有關吧？！唔知係咪咁樣，今日
海天天線升到唔識停，收漲３９巴仙報２﹒４１銀！但其實中科雲網係做團膳業務，即係餐飲業
…。
　
＊花旗來唱好電力好有力，揸實隻港鐵何須再尋覓＊
　
　　一班電企佬早排炒完合併消息後就靜咗落嚟，今日全靠花旗出手唱好，又再次成為缸友受捧
對象。當中獲花旗大升目標價至６﹒８銀嘅華電國際（００９０２），就開心跳起近６巴仙收
６﹒１７銀，成交大增至３﹒８億銀；街坊潤電（００８３６）獲升目標至１８銀，亦衝高近６
巴仙收１６﹒２６銀，係最威水藍戰士，讚！
　　公用股港鐵（０００６６）又有好消息，西鐵錦上路站第一期物業發展項目，由信置
（０００８３）、中海外（００６８８）同嘉華（００１７３）組成嘅公司以市場預期上限投得
，有傳港鐵可以獲得分紅同埋５巴仙銷售純利，難怪港鐵跳起逾３巴仙收４４﹒５銀喇。
　
＊有線堅易主抽升後打和，無線輕踏前港視跌得多＊
　
　　有線（０１０９７）開股東特別大會，「三供五」供股易主永升亞洲嘅方案獲８９巴仙贊成
通過。主席吳天海話，供股仲需要等通訊事務管理局審批，最快７月底就會知結果，又話今日已
經決定即刻申請有線電視牌照添。有線有救，佢一度飆高最多１２巴仙，但最終只能打個和無升
跌，收０﹒５８銀。阿媽九倉（００００４）、會德豐（０００２０）就快甩到身，分別跳高唔
夠半個巴仙同逾１巴仙，報６６﹒４５同５８﹒６銀。
　　ＴＶＢ（００５１１）遲啲先寄回購股份文件，話要等埋申請司法覆核嘅結果。佢今日復出
缸湖，微微行前逾１巴仙，埋單２９﹒２銀。再睇埋隻港視（０１１３７）連升多日後散水，收
跌１７％。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。