《小傳日記》減稅降費下季來，中港魚缸齊喝采！

　　《小傳日記》本來預計今個月舉行嘅「習特會」，據報要到下個月先舉行，攪到花旗國嗰邊
嘅缸友都唔夠擔買貨，三大指數個別發展，只有道指微升７點收報２５７０９點，標指同納指就
分別跌２點同１２點，分別報２８０８點同７６３０點。不過，缸友聽都唔使咁灰啊，因為神州
副總理劉鶴又再同花旗國貿易代表萊特希澤傾電話，並喺文本上有實質進展，加上神州總理李克
強喺人大記者話，會喺４月起減增值稅，５月起降社保費率，中港魚缸今日當然齊齊開香檳賀一
賀。
　　香江今朝本身都無咩方向，低開７點報２８８４３點，不過正當大家以為今日會好似噚日一
樣悶局嘅時侯，神州嗰邊又比到驚喜大家喎！總理李克強喺今日人大記者會上話，今年會進行更
大規模嘅減稅降費，金額達２萬億人仔，並計劃由下個月１日起減增值稅，５月起開始降社保費
率，所以神州缸友聽到有曬時間表之後，Ａ場今日又再衝高收復３０００關口，香江隨後亦跟住
上，先上二萬九，繼而早高上到２９２０４點，同今年高位比只有３６點差距咋！最終魚缸全日
收報２９０１２，升１６０點，升幅逾半巴仙，主板成交１２１４﹒５５億銀增加２６巴仙。國
貨就收報１１５０８，升半巴仙，或升６０點。
　　神州嗰邊聽到「有水」自然造好，全日升３１點或１巴仙，收報３０２１點，全日成交
３４４７億人仔。
　　大隻藍戰士方面普遍造好，ＡＩＡ（０１２９９）今早公布業績好過「孖屐」預期，去年年
底止新業務價值有２３巴仙升幅去到３９億美金，不過中港兩地新業務價值就受累高基數效應，
分別跌２４巴仙同３９巴仙，加上獲利盤湧現，最終跌兩毫半子，報７８﹒５銀。
　　噚日（１４）再有遊戲版號出台，不過ＱＱ（００７００）就無份，但魚缸氣氛好缸友都唔
理喇，ＱＱ最終全日升半巴仙，報３５９銀。生發發（００３８８）繼續發威，升近１巴仙，報
２７４﹒８銀；大象（００００５）就升２毫，報６４﹒８５銀；神州移動（００９４１）升半
巴仙，報８５﹒９５銀，最高見８６銀創近兩年高。

＊賭牌可延期美高梅起飛，神州樓房升潤地表現醒＊
　　
　　兩隻馬交賭佬澳博（００８８０）同美高梅（０２２８２）今朝無啦啦停牌，嚇到缸友以為
咩事發生。原來係兩個獲馬交政府延牌，同其他賭企一樣到２０２２年年中先到期，幾間大行見
到當然出力唱好。澳博同美高梅下晝復牌股價已經好似坐火箭一樣彈上，最終前者升近２巴仙，
報８﹒８３銀，後者亦勁漲４巴仙收１５﹒２銀；而其他賭佬亦齊齊跟上，一哥銀娛
（０００２７）同金沙（０１９２８）就齊齊升３巴仙，分別報５２﹒９銀同３８﹒３銀；新濠
（００２００）升逾２巴仙，報１７﹒７銀；永利馬交（０１１２８）升近２巴仙，報
１８﹒０６銀。
　　路透預計上個月神州七十個大中城市新建商住房樓價同比有逾一成升幅到２０個月高，缸友
聽到當然入場買，其中潤地（０１１０９）公布咗上個月銷售逾９０億人幣，按年升近一成九，
今日股價漲３巴仙，報３１﹒２銀；碧桂園（０２００７）亦升逾１巴仙，報１１﹒３銀；中海
外（００６８８）就彈１巴仙，報２８﹒４５銀；時代中國（０１２３３）畀瑞信大升「他屐」
七成二到１７銀，評級「跑贏孖屐」，今日全日急升近８巴仙，報１５﹒０４銀；「四條三」恆
大（０３３３３）就走高４巴仙，報２５﹒８５銀；融創（０１９１８）升近半成，報
３５﹒７銀；越秀地產（００１２３）獨憔悴，唔見３巴仙，報１﹒７７銀。

＊社保降保費內險好閉翳，中央抑商機券商未回氣＊
　
　　Ａ場急漲，但一班中資金融佬就個別發展，不過神州就話可能好快就會成立獨立嘅存款保險
機構，幫助破產內銀佬退出市場，以免將風險蔓延至成個金融體系，加上總理５月開始降社保費
率，攪今日內險佬兩邊走，平保（０２３１８）業績之後獲工銀亞洲升「他屐」接近１成到９９
銀，漲１巴仙收報８６﹒２５銀連升五日；新華保險（０１３３６）升近３巴仙，重上廿天線
（約３７﹒９５銀），報３８﹒４銀；國壽（０２６２８）就升一格，報２１﹒２銀；但財險
（０２３２８）就跌１巴仙，報８﹒９８銀。
　　中資券商佬近日受政府嚴打場外配資、加上神州券行發表龍頭券商股嘅沽空報告，中資券商
股走勢都持續低迷，但今日上證上返三千關口佢地都有斬獲嘅，華泰六八八六（０６８８６）升
１巴仙，報１５﹒７４銀；招商證券（０６０９９）漲近１巴仙，報１１﹒３８銀。不過，中信
建投（０６０６６）都仲未回氣，下跌近１巴仙，報７銀，中信証券（０６０３０）亦軟近１巴
仙，報１７﹒８銀。

＊肉價望炒起豬肉股歡喜，未有新突破５Ｇ股再挫＊
　
　　缸友都等緊豬肉價再漲，帶動豬肉佬萬洲（００２８８）兩連跌後反彈近５巴仙，報７﹒８
銀，更加係今日表現第二好藍戰士；中糧肉食（０１６１０）亦漲近４巴仙，報２﹒８３銀；惠
生國際（０１３４０）踢高近４巴仙，報０﹒２０２銀；不過，雨潤食品（０１０６８）就跌逾
２巴仙，報２﹒０４銀。
　　神州發展電力物聯網同推動５Ｇ嘅消息睇嚟都消化得七七八八，今日５Ｇ概念股走軟，神州
鐵塔（００７８８）跌近３巴仙，報１﹒８銀，穿十天線（１﹒８４１銀）；長飛光纖
（０６８６９）自從因為光纖纜線投標結果後，被大行唱淡已經開出七支陰燭，今日回一回氣，
反彈近２巴仙，報２２﹒１銀；中通服（００５５２）就軟近２巴仙，穿５０天線（７﹒４３４
銀），報７﹒４２銀；京信通信（０２３４２）挫逾２巴仙報１﹒７３銀，四連跌幅度逾１４巴
仙！
　　祝缸友們周末愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。