《小傳日記》好友唞夠又出兵，魚缸再升士氣勁！

　　《小傳日記》香江魚缸噚日（１９日）雖然六連升斷纜，不過花旗魚缸仲未止漲，道指噚晚
又輕輕踢高２５點收１８５５９點，雖然好「象徵式」，但都叫係造就八連升，係自２０１３年
３月錄得十連升後最長紀錄，勁！
　　既然道指仲有力衝高，香江好友唞咗一日後，今日又再重新出兵！恆指低開２６點報
２１６４６後，好快就重拾升勢，之後仲愈戰愈強，最多升２２２點報２１８９５，又創下今年
新高，一班香江磚頭佬仲好鬼搶鏡添。恆指以近全日高位收市，報２１８８２漲２０９點；國指
就只得３４點落袋報９０２３，成交約５８５億銀左右。
　　溫馨提示，聽晚就係歐洲央行議息，而香江下星期一（２５日）就會開始收市競價，缸友們
留意吓喇！

＊花旗八連升有點象徵式，香江大踏步好友確係醒＊

　　魚缸今日又創下今年新高，唔少藍戰士都開心慶祝，數一數，今日已有６個藍戰士至少創下
５２周新高，而其中九倉（００００４）同中海油（００８８３）都創下逾年高位，前者仲同南
豐一齊發展山項豪宅單位，賣價好靚，平均呎價成七萬銀，難怪股價有力踏前近４巴仙，收
５２﹒３５銀，而中海油就行前近２巴仙。信置（０００８３）表現仲勁，甚至試過跑得比５年
半前快，埋單１３﹒９８銀；港鐵（０００６６）股價就愈升愈有，屢創高位，完場時駛前近
２個巴仙，報４３﹒０５銀。講開地產股，大摩話下半年樓價或者會升５巴仙，仲首選推介新地
（０００１６），令佢衝前左逾１巴仙，埋單１０９銀；同行恆地（０００１２）同會德豐
（０００２０）表現更好，分別駛前逾３巴仙同近３巴仙。
　　
＊地主認真惡你高我更高，聯想搞ＡＲ粉絲齊話好＊

　　聯想（００９９２）傳會拓展手遊業務，共同開發一款國產擴增實境（ＡＲ）手遊，可能今
年底或明年初登場，唔通係見到Ｐｏｋｅｍｏｎ咁成功就想撈埋一份？但有高層指佢哋其實早喺
２０１４年已經開始布局ＡＲ。結果今日股價踢高３巴仙，報５﹒２１銀。
　　中海物業（０２６６９）料半年多賺一倍，今炒高１８巴仙，收報１﹒４１銀；同系藍戰士
中海外（００６８８）購中信股份（００２６７）物業組合獲通過，前者打個和，後者升近１巴
仙。
　　當年奶油豬同奶茶好出名嘅翠華（０１３１４），上市至今只有４年半多Ｄ，忽然宣布大股
東打算賣盤，唔通「一生一世」，長相廝守只有童話先會出現？不過魚缸係現實嘅地方，賣盤始
終係落鑊嘅好消息；德銀對單刁看法正面，維持目標價２﹒５銀同「買入」評級，難怪復牌後急
升近一成半，收報１﹒５７銀。

＊翠華擬賣盤德銀畀個讚，電力齊發熱鬥快跑上山＊

　　靜咗一排嘅電力股齊齊發光發熱，當中，中國電力（０２３８０）上半年發電量同售電量都
多咗１５巴仙，即時刺激股價飛上逾５巴仙，報３﹒０３銀；街坊華能國際（００９０２）都衝
前逾３巴仙，報４﹒６銀。而噚日被大和削目標價嘅華潤電力（００８３６）都無懼唱淡，隨大
隊踏前近５巴仙，收１２銀。　
　　另一邊廂，中資電訊商都有數據公布，聯通（００７６２）上個月４Ｇ淨上客比５月少咗６
巴仙，令到佢曾經腳軟近１巴仙，依家微跣０﹒２巴仙，埋單７﹒８６銀；大阿哥中移動
（００９４１）成績就省鏡Ｄ，６月份按月多咗７個巴仙嘅４Ｇ淨上客量，不過股價都唔係好有
力，只係輕輕行前近１巴仙，報９４﹒４銀。

＊匯思又爆升集成亦好勁，半新丁落鑊愈炒愈精靈＊

　　噚日急升九成嘅匯思太平洋（０８１４７）今日再爆升４９巴仙，係今日升幅王，曾經彈高
９６巴仙！
　　中國集成（０１０２７）都好勁，彈高超過９巴仙，而且有成交配合，有近７億股，係平時
嘅４２倍。
　　半新丁今日都好生猛，星亞（０８２９３）急升近２４巴仙，收報１﹒５銀，高過招股價１
蚊一半；ＦＵＴＵＲＥ　ＤＡＴＡ（０８２２９）高見１﹒４９銀破頂見回吐，倒跌近２６巴仙
收場，報０﹒９４銀；星星地產（０１５６０）今日亦唔見近１１巴仙，報２﹒７９銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。