《小傳日記》兩地魚缸放煙花，中銀香港笑哈哈！

　　《小傳日記》花旗國議息記錄顯示６月加息機會極微，不過二手樓同失業數據就較差，一好
一壞互相抵銷之下，花旗魚缸無太大變化。但祖國魚缸繼續強橫，今日抽高１２８點或２﹒８巴
仙，收報４６５７點。
　　香江魚缸今次都終於爭番一口氣，今早高開近２００點，之後受祖國強勢帶動下曾經上過二
萬八關，可惜最尾要行番少少落嚟，完場升４６９點或１﹒７巴仙，報２７９９２點。雖然二萬
八得而復失，不過都一舉收復十天線（約２７５８７點）同廿天線（約２７７８６點）。勁！
　　國貨佬漲３０１點或２﹒１３巴仙，收報１４４３３點。全日成交約１４２５﹒８８億銀。
　　賽後，中證監公布同香江證監會簽訂備忘錄，香江基金同祖國基金互認，會喺７月實施，多
咗條水喉揼水入香江，唔怪得魚缸今日提早慶祝啦！
　
＊百麗超美麗傳聞因隻貓，旺旺康師傅大步齊向前＊

　　今日魚缸大升，藍戰士好多都水漲船高，最叻仔係百麗（０１８８０），事關有傳佢同阿里
旗下天貓合作，加強賣鞋方面嘅合作，上年百麗已經喺天貓度賣咗５億人仔貨，但係百麗發言人
又否認簽咗協議，真係亂！但股價仍然急升近１３巴仙，收報１１﹒１６銀。
　　兩隻食品藍戰士今日亦有好好表現，旺旺（００１５１）同康師傅（００３２２）分別大升
近４巴仙同埋半成，康師傅仲要一口氣升破十天同廿天線，有貨嘅缸友今次真係和味！
　　另外，長和（００００１）同和黃（０００１３）今日齊齊創新高，分別收升半個巴仙及近
２巴仙，各高見１７３﹒４銀同埋１１８銀歷史高位。下周二（２６日）就會係和黃同大家最後
見面嘅日子，同一日長地（０１１１３）就會同大家見面。

＊媽媽愛寶寶中銀走出去，破頂升一成粉絲如痴醉＊

　　中銀香港（０２３８８）孖住中行（０３９８８）發公布指，中銀香港諗住賣晒南洋商業銀
行股權。另外，中行打算轉讓東盟地區業務畀中銀香港。中銀香港有媽咪錫錫，有得「走出去」
，股價飆高８巴仙，報３３﹒１５銀，創埋上市新高。中行都有逾２巴仙入袋。街坊聽到都開派
對慶祝，工行（０１３９８）同招行（０３９６８）分別都有逾１巴仙至２巴仙進帳。
　　神州有媒體傳出，內地將公布養老金投資改革方案，神州班保險佬聽到齊齊開派對慶祝。平
保（０２３１８）走高逾５巴仙，報１１９﹒２銀，創超過七年半新高。街坊國壽
（０２６２８）同太保（０２６０１）都行高３至近５巴仙，分別報３８﹒５５銀及
４３﹒２５銀。

＊阿爺夠關顧內險開香檳，高銀系兩股一彈一微跌＊

　　漢能（００５６６）前日（２０日）離奇暴跌後停牌，事件仲搞到火燒運環船。市場噚日
（２１日）傳出高銀係漢能嘅財務顧問，是以高銀地產（００２８３）同高銀金融
（００５３０）齊齊大插。主席之後澄清話所涉及嘅只係自己私人公司，唔關呢兩間上市公司事
。高銀地產上番近５巴仙，報１５﹒０６銀。高銀金融先升後跌逾３巴仙，收報１６﹒９２銀。
　　魚缸今日突然好生猛，個個追入啲大隻佬，搞到早排細細粒逆市爆升嘅參賽者今日要行番落
嚟。百靈達（０２３２６）噚日怒插逾４成後，收市扭腰企穩，但嚟到今日終於走唔甩，唔見咗
近２５巴仙，報９﹒１銀；仲係最大跌幅嘅參賽者。其餘嘅仲有星美控股（００１９８）同融保
金融
（０８０９０）分別都唔見咗約８巴仙至１５巴仙。

＊股仔各走各有喜亦有悲，荔園燕歸來遠店高高高＊
　
　　今日有三隻抽水股但隻隻命運都唔同。亞洲資源（００８９９）今日復牌之後大升２３巴仙
。佢地折讓超過四成配股畀西安交通能源，仲同時發埋ＣＢ，換股價有溢價，總共抽水９億銀左
右。另一隻中國賽特（００１５３）溢價１５巴仙配股，結果今日亦有１２巴仙進帳。
　　和諧汽車（０３８３６）就無咁好運，佢今日唔見咗６巴仙，呢架車仔先舊後新配股，比前
收市價折讓１４巴仙。
　　遠東系今日表現幾好。荔園將於下月２６號開幕，一於大家齊齊懷舊合皮一番。結果遠東酒
店（０００３７）今日大升１７巴仙，遠東控股（０００３６）亦踢高３巴仙。假期愉快，請請
！
　　　　　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。